Lungleiin an la theihnghilh lo

Lunglei Municipal Council inthlan atan inbuatsaihna a kal ṭan a, Lunglei hmangaihtu an pung thar nasa hle a ni!!!!!

Chhim mipuite inṭawm theih tur RTPCR khawl dawng duh loa chhuanlam fahrah tak hmanga Lunglei mipui nunna aia Political Party dah lal kha Lunglei mipui hian an theihnghilh mai theih ka ring lo.

Lunglei hi tun hma aṭanga thluak awmna lam a ni a, Aizawl hoin an nawm an maka an khawih kual mai mai laia an MLA rual Lunglei tana an au chhuak ngam lo kha theihnghilh theih a ni lo.

Lunglei hian chhim leh Hmar zawnga boruak an vawrh ṭhin avangin ka support vak ngai lova, a thil tih dan kha kei chuan ka pawmpui ve ngai dawn lo a ni. A chhan chu, regionalism hian kan ramah bu a khuar hläu zinga mi ka ni tlat a ni.

Mahsela hripui hlauhawm lai taka Lunglei mipui nunna aia Politics dah sanna kha chu a dik lo hulhual si a ni. Aizawl aṭanga Expert kalten Laboratory a din theih dan an sawi pawh pawm duh lovin an sawi harsa lui a, khatih lai khan Lunglei mipui hian Vote an nei tih an hre lo em ni le?

An hma an ngaih loh mipuite chuan vote an thlak leh dâwn ta a, mahni bial aia MNF hruaitu Aizawla awmte hläu zawk Lunglei MLA rual hi an campaign ngam tawh dâwn em ni?

Congress leh ZPM khan hei hi advantage ah lâk lo tum lo ula aw. Ram kaihhruai dana hmasawnna zawk zuar ula Lunglei MLA rual chet chhiat zara sorkar tum ngawt loin mahniin tih tum mumal tak lo nei ve rawh u.

Congress pawh Lunglei awp khawp­in hman kum lawk­ah in tling a, Lunglei aiin Party in dah hmasa zel a. ZPM pawh la tlin ve loh hi thianghlimna a ni lo a nia, tuna in party kal dan a thianghlim tawk em? tih hi a pawi­mawh chu a ni.

LMC result mai mai hi chuan eng mah a nghawng chu ka ring lova, Lungleia MNF MLA bialah hlir inthlan a ni dâwn a, a him chin aṭangin kan lo ral thlir ang.

- Vanlalmawia,  Tuikual South