Hmeichhe candidate in nei dawn em? -1
Nimin mai khan International Women’s Day kan lawm a, Aizawlah ringawt pawh hmun hrang hrangah lawm a ni. Chawhma lamah JM Lloyd Hall, Synod Office-a kan lawm zawhin Sikulpuikawnah Women in Black programme kan hmang leh a. Khatah khan mi 60 vel ding kualin placard kan keng a, tunlaia Mizo hmeichhiate mamawh hrang hrang ziak khawm chu kan keng ther fur mai a.
Chung zawng zawng karah leh Assembly session hnuhnung ber kan han thlir liam vung vung karah chuan zaidap si mahse aw ring tak sia lo irhchhuak chu, “Hmeichhe candidate in nei em ve?” tih hi a ni. Hei hian kumin a election lam a hawi niin a lang.
Hmeichhe candidate neih chu engnge a pawimawhna, hmeichhia an nih avangin eng sawngsawhlawtna nge a thlen ang! A chhanna tur in rinsiak a ni a, chung inrinsiakna zingah chuan hengte hi an pawimawh-
1) MLA ṭhenkhat chu an ngaihtuahna an hmang thiam lo, ram ṭhatna tak tak turin an rilru an seng thiam lo a nih hi. Thenkhat aia fel tur leh ngaihtuahna seng thiam, hmasawnna tur planning thiam leh ngaihsak peih an tam tih pawm a ni. Mipa hian ro in rel rei tawh lutuk a, in peih tawh lo ni berin a lang. Thil vei tak tak pawh in nei tawh lo.
2) National issue lian tak tak, kan ram/ state pawh min sawi nghing dawt theite kha sawichhuah a hlawh lo tlat. E.g. Farm Bill te, NEP, UCC, 1/3 reservation for women. Hmeichhia, rorel tham chu MLA nei ila chuan kan ram hian hma a sawn ngei ngei ang. Kan kawngte a ṭha sawt ang a, kawngkawi ulh lutuk te hi ngaimawhin a tihrual deuh dante an zawng ang a. Tuihna tikiam zawnga ramngawt ṭhiat zawnga kalte hi hmeichhia hruaitu chu nei ila an phal ka ring lo. In chhunga che ber leh eirawngbawltu leh ngaihtuahtu chu nu an ni a, tui hi an lungkham teh asin.
3) Farm Bill te hi kan mamawhzia hre duh lo nge hre pha lo, kan website hi kan ram thla a ni a, department angte pawhin a ni ang chu. MSP- Minimum Support Price te hi sorkar official website aṭanga a lan dan chuan kuthnathawktute hnen a thleng pha lo. Loneitu, nu te hian MSP te hi Tlumtea thlirin an thlir a, Mautam aṭang phei kha chuan an thlirna mit pawh a tung et ut zo ta. Engtikahnge an hmuh ve ang?
4) Kan sorkarin thlaithar zuartute hmun a pe thei lo a ni chek ang kawng dung, kea kalna tura inzawrh a lo ngai ta. Mipuite hian kan eitur, kan chawhmeh zuartute hi kawng i kian zawk ang u, a tam berte hi nu fanau enkawl, zankhaw taireka a tuka zawrh tur ṭhut tlaivarpuitute an ni. Hmeichhia ram hruaitu chu nei ila kan hmeichhia, chhungkaw eizawngtute dinhmun hi chu a ṭha deuh ngei ang...
- Dr. Lalrinawmi Ralte