CM RELIEF FUND KHA? HE LAMAH AW!

Kan hriat ṭheuh angin kawng chhia avangin road block siam a ni a. Kolasib DC leh a team te bengvarna a zarah driver leh handyman tangkhang Rapid Antigen Test an han neih sak a, pathum lai Positive an hmu ta mai a. Test runpui an neih hnuah mi 43 zet an lo postive reng mai a ni. 

Vairengte gate lamah test runpui an han nei leh a, driver leh handyman zingah mi pali an lo positive leh a, Seṭhawn naupang leh Vairengte a duty pakhat chu a lo positive reng tawh bawk. Kan che tlai nge kan che hma tih hi hriat a har ta viau a, chet loh tawp ai chuan a ṭha ta hrim hrim tho a ni. Mizoramin tun ṭum hi kawng chhia kan vanneihpui ber ṭum a la ni awm e.

Assam aṭanga Mizoram rawn lut apiangte chu test an ni zel dawn a, an test chho zel bawk. Nimin August ni 11, 2020 pawh khan Rapid Antigen Test hi neih zui zel a ni a, postive hi an awm chho zel turah a ngaih theih tawh a ni. Nitin test hlawhchham a awm dawn lo a ang viau mai. Positive apiang chu Kolasib District-ah an chambang ta zel mai a ni. 

Kolasib tlangdungah VC inthlan a hnaih avangin VC te kaihhruaina hnuaia awm VLTF te an hman theih tawh lo a, Kolasib tlangdung lirthei tlan velnaa awm YMA te an hah ngat ngat hle. A bik takin Vairengte YMA an rim leh ta tlauh tlauh hle mai bawk.  

Mizoram hian Covid-19 boruakah hian hlawm lian deuh deuh thil thleng kan nei a, Pakhatnaah chuan lockdown runpui kha a ni. A pahnihnaah chuan phai lam aṭanga rawn haw runpui kha a ni leh a, a pathumnaah chuan sipai lam an positive sup sup hi a ni leh bawk. 

Tun ṭumah hian driver leh handyman te an ni leh ta a ni. Tun ṭuma an chhui zuinaah hian driver leh handyman te hian vanduaithlak takin duty pakhat leh civilian naupang pakhat an lo kai hman ngei niin a hriat bawk. 

Vairengte gate kal tlang hian motor sing tel a rawn lut tawh a, screening phei chu belh buai fe tham a ni tawh. A thawktu lam pawh zawh thut chi pawh a ni tawh lo a ni. Thawktute hi hna ngheta thawk lo te an ni a, sawrkar hian VIP te an kal chang chauha duhsak lovin ngelnghet deuhin duhsakna lantir se la a duhawm khawp mai. Anni aia Front line worker hi an awm kher lovang. 

Mizoram chhuahka lamah Rapid Antigen Test runpui a awm leh ta a, Kolasib District lamah positive apiang dah an ni zel dawn a. Tunah pawh driver leh handyman postive 47 zet nimin zing lam thleng kha chuan an awm ta a ni. 

Sawrkar ruahmanna hi a ṭha tawk lo a ni lo a, chet velna tur pawisa a ngai ta ber hi a ni.

 

Ka hriat sual loh chuan Covid-19 thil vela lirthei an hman tawhho pawh an hman man District Administration, Kolasib lam hian an la pe thei lo. Driver tangkhang pawisa nei lo chawm ngai an lo awm bawk a, ramri lamah duty in dah ngai reng bawk nen CM Relief Fund hi ren lutuk lovin sawrkar hian Kolasib District lamah vawm thla teh se. A chuang a ngai lo kher lovang. Ba sa pek a ngai. Ba awm sa pek awm si loa bat zel ringawt hi a dik lo a ni.