India rama CM upa ber tih kha

February 17, 2023-a Vanglaini Article 'India rama Chief Minister upa ber leh naupang ber' tih Lalmuanpuia ziak kha a ziah tum lam hriatthiam a harsa a, Mizoram Chief Minister Pu Zoramthanga hi India rama CM upa ber a nih thu a rawn ziak a, tunah hian kum 79 a ni tawh a ni. Arunachal Pradesh CM Pema Khandu chu CM naupang ber kum 44 mi a nih thu a rawn ziak lang bawk.

Ka ngaihtuah ta neuh neuh a, kha article-a kan hmuh chu India rama CM upa dang kha chu mipuiin an duh em em chhan kha a awm ṭhin. CM upa ber dawttu chu Kerala CM Pinarayi Vijayan a ni a, he pa hi kum 2016-ah khan thlan tlin a ni tawh a, a hnathawh ṭhat vangin thlan tlin nawn a nih mai bakah Kerala state hmasawnna ropui tak a thlen avangin an ngaisang a, Kerala hi term khat bak CM an tling nawn ngai lohna a ni chung hian a tling nawn ngat a, Pu Zoramthanga aiin kum khatin a naupang a ni.

CM upat lama pathumna chu Odisha (Orissa tih ṭhin kha) CM hi a ni a, Naveen Patnaik hi kum 77 mi a ni tawh chungin mipuiin an duh a, kum 2000 aṭang khan CM a la ni char char a, kum 23-a CM nihna a lo nih tawhah mipuiin a hnathawh ṭhat avangin an la iai lo. Kum upa hrim hrim hi state dang pawhin an iai lo a, hna an thawh ṭhat phawt chuan upa deuh pawh ni se an la thlang tling zel a ni.

State dang kan thlir chuan CM kum naupang zawk thlan an intihhmuh a, naupang te te kum 40-50 inkar CM hi India ramah an lo tam hle a ni. Kan CM hi a kum upat avanga hnawl tur a ni lo a, a thawh ṭhat chuan thlan tlin leh tur a ni a. India rama CM upa ber record a la chelh chhunzawm thei dawn a ni. A thawh ṭhat loh chuan a kum a upa tawh nen mipuiin kan chawlh hahdamtir thei bawk a, mipui kutah a awm a, a kum upat vanga sawi hnawm mai loin a hnathawh aṭangin teh ila, India rama CM upa ber kan neih mek hi kum 5 dang Mizoram enkawl chhunzawm turin a hnathawh leh rorel dan han thlir hian kan la duh em? tih hi kan tehfung tur chu a ni.

- David Lalawmpuia