Politician Senior te nge mi thar?

Kum 2017 khan sorkar laipui chuan General Bipin Rawat chu Army Chief thar atan a thlang a. A aia senior pahnih - Lt. Gen. Praveen Bakshi leh Lt. Gen, PM Hariz te chu a kaisan khalh a. Kum 1983 aṭanga seniority hlira Army Chief an lo thlan ṭhin dan chu a danglam ta a ni.

Defence Minister Manohar Parrikar chuan Army Chief an thlan dan chu sawi fiahin, "Seniority chauh hi criteria ni se la, Computer pawhin ‘date of birth’ enin a thlang thei dawn asin! Army Chief thlang turin Cabinet Committee for Appointment hi a awm a ngai miah dawn lo tihna a ni. Engpawhnise, sipai hotute hi an performance endik a ni a, an ṭha em em vek a, thutlukna pawh kan siam thei lawk lo. Intelligence bureau report thlengin kan en a, a ṭha ber tur kan thlang chhuak mai," a ti.

India Defence Minister thusawi behchhan deuh hian Mizoram lamah han lut ila. Kumin November thla tawp lamah MLA kan thlang dawn a. A bikin party lian pathum MNF, Congress leh ZPM te chuan candidate atan tute nge an thehchhuah ang, tih hi ngaihtuah loh pawh tum i la, rilruin a vei tlâng a. Model code of conduct rules-in min phuar hmain thla sarih (7) ché ché a la awm.

Kan ram party chhung boruak hi seniority leh kum tam lam hian hmun a chang sâng viau a. Party hruaitu inkhaidiat dan aṭang pawhin an hriat theih. Engnge a thiamna, a dik em, engnge a zir chhuah, engte nge experience a neih, a mizia, a personality, a rinawm em, a huaisen em, a tumruh em? tih te hi kan ngaihtuah tam loh lam tak a nih hmel.

Kum tam hrim hrim, tei rei tawh, Zawhte upata upa, senior zâwkte an nihnaah hruaitu chan kan chantir deuh zel a. Tute party pawh nise, dinhmun sâng taka an dah, thiamna nei mumal si lo te hian party hmasawnna tur an ti ṭhuanawp duh khawp a! Hei hi party hrang hrangah hmuh tur a awm.

MLA candidate tur thlang tur bîk ‘Nomination Committee’ an insiam ṭhin a. Anni chuan, he hi ram tan a ṭha ang em? bial mipuiin an duh meuh em, thawhpui theih mi a ni em, tih lam ngaihtuah lem lovin, ‘a lo senior ve tawh a, a lo thawkrim tawh a,’ tiin, candidate criteria atan seniority hi an hmang duh viau a. Chutiang chu kumin hian kan hmu leh ang em? Zoram mipui thlirna-ah hian thiamna leh hmangcháng hriate duhna hi a lian zêl dawn a. Candidate tur pawh kan duh fir tulh tulh ang.

Engpawhnise, mi senior hrim hrim an ṭha vek lo, tihna lam a ni lo a. An tawn hriat neih ang angte hmang ṭangkai tur leh, a zaí-zâp tura a tel zel pâwl an awm hi chu tihmakmawh lam a ni zawk a. Mi thar hlang leh tawnhriat nei miah lo te kuta ram rorelna dah chu thil hlauhawm tak a ni zawk ang. Chutih rual chuan tunlai thiamna leh changkanna inher chak lutuk mil zawnga rilru buatsaih peih lo te leh, a intuai hriam zawnga ke pên pha meuh lo te chuan chawlh na-châng an hriat erawh a hun viau tawh.

Hetih rual hian ṭhangthar, mi lar, mi challang (celebrity) kan tih ang chi te pawh en uluk an ngai hle ang. Central leh state dang kan en pawhin, vawi khat na na na chu vote an hui duh khawp mai. Mahse, an party inkhaihhruaina leh tih dan phung zawm thiam lo, a tla chawpa inzir mi ni bawk si lo te chu thlantlin an nih chhûnga thil ṭha tih sawizui tur hnutchhiah miah lo, reh zui ta vang vang an ni duh châwk!

Chuvangin ṭhalai zingah ṭha tak tak, hmasawnna leh ram hmangaih takzetna thinlung pu, tunlai hma­sawnna ‘information technology’ man pha bawk si, ram hruaitu atana awhawm tak tak an awm ṭeuh lai hian, ‘a lar a lawm,’ tih vang ringawt te, thil inti hre tak, hman tlak si loh kan zuar ṭeuh palh ang, tih hi a hlauhawm khawp mai.

MLA ni lai mi 40 te hi an ding leh vek dawn a nih pawhin, party tin hian hmun âwl an nei ṭheuh va. Chutah chuan, hmel thar kan hmu dawn nge, 2018-a vanduai ta te kha an lo kir leh ang, party lian pathumte hian an bial ruak te a ding tur chu an hual fel thawkhat vek tawh niin a lang a, a ṭhen phei chuan an puang ti-tih tawh a.

A pawimawh ber pakhatah chuan thiamna sang vâwrhtawp, Scientist, Pofessor leh Ph.D nei pawh ni se, HSLC pass lo pawh ni rawh se, rorelna hmâ-ah zâm lova, huaisenna leh dikna nen, mi taima tak an nih phawt chuan, thiamna chungchuang neih leh zir san vak lohna hi a danglam tehchiam lo. Budget te hi an sawi harsa viau ṭhin a, mahse, kan mamawh tâwk leh kan chanvo dah a nih dan hriat mai hi a tawk viau.

‘Ṭhalaite khawvel a ni a, lehkha­thiam thei fâl tak nih a ngai,’ tihte hi kan ram politics mamawh ber a ni ngawt lo bawk. Zir sâng deuh deuh Minister kan nei nual tawh. Mahse, central dawr kawnga zei-hawi vak lo an ni duh fo. Chutah chuan politics danglamna chu a awm ve tlat a ni. An zir sânna ang hû, Engineer, Doctor leh Lawyer tih te, filmstar an nih mai avang te, ‘a lar alawm’ tih mai mai vangte-a thlantlin, Assembly House-a beisei pha leh si lo kan hrawn ṭeuh tawh. Hetiang hi ṭum khat bâk MP/MLA atana lo lang zui ta miah lo pawh kan nei nual.

Chuvangin, Union Defense Minister sawi ang deuh khan, Seniority emaw zir sânna chauh hi tehna (criteria) a nih dawn chuan, Party Nomination pawh siam buai ngai lovin, MLA candidate turte chu Computer mai pawhin a thlang thei vek dawn tihna a ni. Chuvangin, party-ah 'a senior tawh alawm,' tih vang leh ‘a ni hi a lar alawm’ tih mai vangtein tute mah hi thehchhuah loh ngam a hun a. Vote hui thei tur chu kan duh ṭheuh rualin, a dik em, a fel em, a rinawm em? tih leh an personality te hi kan tehna ni hlawm thei se a duhawm hle ang.

- Zobiakvela (Masena)