SAṬHAHCHHUAK PEK MAI A NI

Hmanni deuh khan MNF sorkarin an Flagship Programmed SEDP-ah Dragon Fruit chingtute mi 95 hnenah Rs 30000/- (Cheng singthum) ṭheuh an sem tih ka lo hre ve a. Loneitute ka lawmpui a, MNF sorkarin tlaikhawhnua an Flagship programe an hawng (launch) thei kha a lawmawm hle a ni. 

Hei hi erawh ka ngaihtuah. Dragon Fruit hi SEDP ah khan a tel lova. Hor­ticulture Director in a dil avangin tunah an telh hnuhnawh niin a lang a; Pilot Project-ah an hmang zui ta hial a. 

Cheng sing thum ṭheuh an sem hi a beitham hle a, Upa in “Saṭhahchhuakpek’ an tih hi a ni. Inthlan dawna an in zawrh dan kha cheng nuai thum aia tlem lo a ni a. Cheng nuai thum dawng turin an dawn loh phah ang tih a hlauhawm hle mai. 

MNF Sorkar Flagship Prog­rame (SEDP) tihhlawhtlin nana mi 95 chauh an thlangte kha a mak hlei hlei a ni. Chu pawh chu Undivided Aizawl District chauh lehnghal. Chief Minister leh Party President-in ropui takin a hawng dawn emaw tih laia Sericulture Minister Pu K Beichhua-in SEDP a hawngte kha mipuiin mak kan ti dawn hle a ni. 

MNF sorkar hun chanve dawn an hman tawh hnuah a hming maia an Flagship Programe an hawng hian ngaihtuah a tithui hle mai a. Ram siam tak tak hi an tum lova, lalna leh thuneihna chan bak hi engmah an ngaihtuah lohzia a tichiang hle mai. 

SEDP an tih hi sorkar programe ṭha lamah an hmehbel zel ang a, project tak tak neih hi a rinawm lo ta viau a ni.