Retheihna leh Vote hralh....

MPF leh Political Party te hi vawi tam an thawkho tawh a; kum 2008, 2013, 2018 MLA inthlan te, kum 2009, 2014, 2019 MP inthlanah te, kum 2009, 2012, 2015, 2020 VC thlan te, kum 2010, 2015, 2020 AMC inthlante leh kum 2012, 2015, 2020 Local Council inthlanah te thawhho tawh a ni. Heng thawhhona hrang hrangah hian engkim a felfai chuang lo, mahse a chhe lutuk tur a veng a ni. MPF hmalakna hi Political Party, Kohhran leh tlawmngai pawl te remruatna ang a kal a ni a, political party lam hian hnawk tih deuh chang an nei ṭhin.

MPF huang chhunga thawhhona aṭanga inhnuhdawk ngam chiah si lovin, zalenna chep tiru takin an awm niin a lang. Democracy khawvelah hian rorel tura intlansiakna kawng bumboh tak paltlang ngai a awm a, hemi kawngah hian zalenna, dikna, chanvo inzahsak tur a ni. Inthlan boruak hi a hniam tak tak thei lova, VC aṭanga MP inthlan thleng hian boruak rit tak a inphumru vek a ni.

MPF hian heng boruak ṭha lo hrang hrang benghniam turin ke a pen a, hun khirh tak tawh chang te pawh a nei a ni. MPF hminga che chhuak te hi mihring famkimlo an nih ve tho avangin khawi emaw lai ah chuan sawisel tur leh rualkhai lo taka kal chang te pawh a nei ve a ni. Chutihlaiin, a pumpuia thlirin MPF kaltlang hian inthlanna boruak muanawm kan nei a ni.

MPF thuthlung hnuaiah Political Party te chu vote lei zawnga hmalak leh hralh tura voters te vehthlem a rem lovin, tih loh tawp tur a ni. Vote hralh chungchang hian ngaihtuahna kawng hrang hrang a siam a, pulpit tlang aṭanga vote hralh loh tur tih mai hi chu awlsam tak a ni. Vote hralh lo tura miretheite au khumtute hi vote hralh mamawh miah lo an ni tlangpui a, dinhmun ṭha zawk aṭanga ke pen an nih chu. Kristian ramah hian rethei leh hausa inkar a zau ta viau mai a, mi tam tak chuan thingtlang rethei te retheihzia leh khawpui a cheng miretheite nun hahthlakzia an hre phak lo.

Political Party te election campaign dan eng emaw chen kan lo hriatpuiin a tak ramah kan lo zir chiang ve tawh a, vote hralh chung changah thlir dan inbukna a na hle. Thingtlang retheite dinhmun hniam tak hi Kohhran ai chuan Political Party hian a chiang zawkin eng nge tihtur tih hi an man em em a ni. Inthlan dawnah rawn che chhuakin miretheite chaklohna zawnah an rawn dek a, sum rawn hmathehin retheihna in a tuam mek chhungkua ten an lo thlir kar mai a; “kan party candidate hi lo vote ula cheng chutizat kan pe ang che u" tih thu hian a rawn deng dawn tih ka kut dinglam tihtlukin an chiang a ni.

Chuvangin he ṭawngkam hi nitin kawla ni chhuak chhiara ram lam luhchilh ṭhin te leh thawh tur zawnga khawpuia vak vak ṭhinte tan chuan hnar har tak a ni - an lo Amen a nih pawhin an demawm lo e.

Pulpit tlang emaw vantlang dawhsan aṭanga vote hralh lo tura miretheite au khumtute hian retheihna awmzia an fiah lo a ni. MPF badge bel a duty ten zan khawthim hnuaiah Party worker chevel vilin daikil karah an tlum bo zuk zuk a, mirethei ten kum tam an lo nghahfak Party sum leng vel chu an lo dang chat hmiah hmiah a. MPF hian hna ṭha tak chu an thawk e, mahse a phek lehlam kan keu chuan mirethei beidawng hmel leh meialh en lai a lo lang si. Hetianga mirethei zawkte kan umzui ngam ang hian, mihausa dik lo taka Political Party thurualpui ṭhinte hi umzui ngam ve ila ṭha tur. Mirethei kan ralkhat chhaih a, ngam zawng tih vangin vote hralh chhuah chhuahin kan chhuah a, na tak takin kan dem a. Inthlanpui kumah a duh fir ber ang zia zangin sum um loh tur tiin kan au dup dup a. Miharsa leh retheite chu vote hralh tiin ṭawngkam ngaihthlak hrehawm khawpin thu kan chhuah khum a. Chhungkaw khawsak harsat avanga cheng tlemte melh ngawih ngawihtute hi dem mai lovin an harsat­na phurhpui ila, an zahawmna humhim a nih theihnan puih an ngai a ni.

Chuvangin, Sorkarin miretheite khai chhuahna programme hrang hrang a neihte hi dik taka rethei hnen a thlen theih nan nasa zawkin au chhuahpui ila, inthlan kuma chuk hrep lo hian . Miretheite khaichhuah kawnga ring rawlh chuang si lova, inthlan dawna ngam zawng mirethei zawkte au khum leh chiam hi sual a ni. Vote hmanga sum um ngai lo turin kan inkhai chhuah a ṭulin ram hian a mamawh takzet a ni.

Vote hlutna hi a neitu aiin party worker ten an hre chiang zawk. Kum tam tak chhunga an thil enghelh ber a nih miau avangin vote neitu vehthlem dan pawh an thiam. Khawpui chhunga MLA candidate te hi thingtlang lama in candidate te ai chuan sum seng tlem turah kan ngai tlangpui a, mahse a ni ngawt lo. Khawpui chhungah hian miharsa tak tak, mi in hnuai luaha thawh tur remchang apiang thawk mawp mawp mai an ṭhahnem hle a. Dam mawh hritlanah pawh private damdawiin pan ngam lo, sorkar damdawiin pan hram hram ṭhin an ni. Harsatna in a tlakbuak; nitin sum thawhchhuah dan tur kawng dapa ar bo zawng ṭhin te hian an vote hlu leh zahawm tak an hum zo lo a nih pawhin thiamchanna chin an nei ngei ang.

Chhungkaw khawsakna in rahbi a rah tleu meuh chuan, chhungkaw zahawmna humhim hleih theih a ni tawh lova, mahni inthiamlo chungin Party lam tawktarh sum hawpui a ṭul leh ṭhin. Political Party ten mirethei te sum hmunah sum an chelek hi thil dik lo a nih thu kan hria, hnawksak pawh kan ti. Hnawksak ti hle mahila, vawiinni anga mi duham ten kan state sumpai an eiral a, retheihna an peipun chhung hi chuan a bo lovang.

Vote kaltlanga sum dawn leh chelek hi dan chah kan duh a, a theih chin chinah Pathian thu nen kan hmehbel a, mahni vote hralh lo turin kan in chah fo. Vote hralh tih phei chu a than dan a mawi lovin a hralhtu nih pawh a zahthlak a ni. Political Party te lei theih nih chu a tlawmthlak kan ti, mahse mamawhna in mi a ur thluk tawh chuan zah dawn a har a, ram hmangaihna pawh a dai thei mai awm asin.

Kohhran lak runthlakna ramah hian kan Kohhran mite retheihna avanga rinawmna humhim zo lo an awm em? Khawtlang nuna inpawh leh inluhchhuah tak kan nih lai hian kan ṭhenawm khawvengah retheihna avanga hum sual dai mek an awm em? Tlawmngai pawl ṭha tak tak nena khawsa kan nihna hian retheihna a um bo em? heng zawhna te hi a taka min chet chhuah tirtu ni se ava duhawm em!

Unit hruaitute an rawn kal ang a, in vote kha lo hralh reng reng suh u, tia thuchah hi thuchah nung a nih theih nan, sorkar nghak kher lovin retheihna um bo hna i thawk ang u.

- Rosangzela, vh