Education Revolution 4.0 Chona

Tun lai ram tam zawkte chuan “Industrial 4.0 leh Education 4.0” tiin revolution thar an kalpui mek a. Khawl thil lama hmasawnna leh danglam thutna (industrial revolution) a lo thlen hian zirna lamah a sawhkhâwk hmuh tur a awm ṭhin a, zirna huangah hmasawnna rahbi thar hmuh tur a awm ṭhin a ni. Educator-te chuan keiniho hi “Education 4.0” huna cheng mekte kan ni an ti a, zirna lama system pakhat Bloom’s Taxonomy chu an ngâi pawimawh hle bawk. Kan râm zirna system hian Bloom’s Taxonomy system hi a kalpui ve em tih leh zirna inher danglam zelin a hrin chhuah “Education 4.0” chona hmachhawn tur hian ruahmanna a nei em tih hi ngaihtuah a ṭul tak zet a ni. 

Industrial revolution

Industrial revolution hmasa ber kha kum 1784-ah a inṭan a. Tui lum khû chakna hmangin khawl leh buangrua chi hrang hrang siam chhuah a ni a, mihring kut leh ke, tha leh zungzam hmanga thawh ṭhin hna tam tak chu khawl ṭha hmanga thawh a lo ni ta a. Chu hmasawnna chu “Industrial 1.0” emaw “industrialization” tia koh a ni. Kum zabi 19-na kan chuangkâi a, electric ṭha kan lo hmang thiam a, chu chuan thil siam chhuah lam (mass production)-ah sâng takin min vawrh chho leh ta a. Chu hmasawnna chu “industrial 2.0” emaw “electrification” tia koh a ni. Tichuan, kum 1969 hnu lamah electronic bungruate chuan industrial revolution-ah hmun pawimawh tak a rawn luah chho zel a, chu chu “industrial 3.0” emaw “digitalization” tia koh a ni leh a. Tun  laiah Internet of Things (IoT) thlipuiin min nuai leh a, Smart Phone aṭangin Smart Home, Smart Garden leh Smart City titein hma kan sawn leh duak duak a ni ber mai. He hmasawnna (Smart Revolution) hi “industrial 4.0” tia koh a ni a, he “industrial 4.0” hian nasa takin zirna a sawi danglam a, hmasawnna namén lo a thlen a ni. 

Education revolution

Lehkha a zira inzirtîr leh chhinchhiah (lecturing and memorization) hun kha “Education 1.0” tia koh a ni a. Internet hun a lo thleng a, zirna huang a lo zau va, Internet-in zirna lamah nasa takin zirlaite a pui a, chu hmasawnna chu “Education 2.0” tia koh a ni. Hun a lo kal zel a, hnaa hman ṭangkâi tur hriatna pe chhuak thei zirna (knowledge-producing-education) kalpui a ni leh a, chu chu “Education 3.0” tia koh a ni leh a. Tun lai Technology lama hmasawnnain ni tin thil thar a rawn her chhuahpui a. Thil thar siam chhuak thei tura zirna (innovation-production education) kalpui a ngai ta a, hei hi zirna huanga chona lian tak lo irh chhuak chu a ni. Zirna kalpui dânah “zirtîrna leh inzirna chuan thil thar siam chhuah lam a tin zawn ngei ngei tur” tih a lo nih takah chuan, zirna kalpui dan sâwi dang lam loh chi a ni ta lo va. Hetiang zirna kalpui hi Bloom’s Taxonomy system-ah chuan level sáng ber a ni. 

Bloom’s Taxonomy

Zirna kalpui dân tur chungchangah American Educational Psychologist Bejamin Samuel Bloom-a rawtna Education System Taxonomy chu educator-ten an thláwp hle a, a hmingah Bloom’s Taxonomy an vuah nghe nghe a. He Taxonomy-ah hian zirna kalpui dân level paruk lai a awm a, chungte chu (1) remember – chhinchhiah tura zirtir, (2) understand – hrethiam tura zirtir, (3) apply – a taka hmang tura zirtir, (4) analyze – endika zirchiantir, (5) evaluate – thil hlutna chhuichhuahtir leh (6) create – thil thar siamchhuak tura zirtir te a ni. Number indawt dân hi level indawt dân leh insân hleih dân a ni nghal a, “chhinchiah tura zirtir” hi level hniam ber a ni a, “thil thar siam chhuak tura zirtir” hi level sâng ber a ni. Level sâng ber, thil thar siam chhuak tura zirna kalpui leh hemi kawnga hmasawnna hi “Education 4.0” tia an koh chu a ni.

4C

“Education 4.0” nena inkungkaih tlat, zirna huanga pawimawh tak chu 4C tia an sawi ṭhin Communication, Collaboration, Critical thinking leh Creativity-te hi an ni. Heng C palite hi kum zabi 21-a zirna ṭha leh ṭha lo tehna an ni ve bawk. Inbiakpawh thiamna te (Communication Skill), midangte nena thawhho thiamna te (Collaboration Skill), buaina chingfel zâwnga rilru khalh kal thiamna te (Critical Thinking Skill) leh ngaihdân thar leh suangtuahna thar hmanga thil thar siam chhuah thiamna te (Creativity Skill) hi education quality tehnaah an ngâi a ni. 

Eng dinhmunah nge kan din le?

“Industrial revolution 1.0” aṭanga “4.0”-ah hian keiniho hi eng revolution-ah hian nge kan la awm? Khawvel huap zirna inhêr danglam mêk “Education 4.0” hunah hian kan cheng ve tawh em? Bloom’s Taxonomy system-a level hniam ber “Hei hi zîr la, hei hi chhinchhiah la, by-heart rawh” tih hun kha kan tlân pêl ve tawh tak tak em? Kan ram zirna hian kum zabi 21-a zirlaite mamawh zirna ṭha 4C hi a pe ve thei ngût ang em le? 

THU LAKNA HNAR

Ong Zin Linn. “The Necessary Qualities and Challenge of Education Revolution 4.0 in the 21st Century.” The Voice Weekly Journal, April 1-7, 2019:23.