Empowering Consumers Through Clean Energy Transitions (15th March - World Consumer Rights Day 2023 pual)

Khawvel pum huap Consumer te ni pawi­mawh tak kan lo thleng leh ta, Consumer zawng zawngte he ni pualin chibai ka buk a che u. Kum hmasa lamah khan Digital Finance lam hawiin (Fair Digital finance) hun kan lo hmang tawh a, kumin hian Consumer te tih chakna “Empowering Consumers Through Clean Energy transition” tih chu thlan a lo ni ve leh ta. Khawvel hi a lum chho telh telh a, hei hi tih daih emaw a nih loh chuan kan chenna Planet hi reilo teah chenna tlak loh a ni thuai thei a ni. A bik takin kum 2030 hma ngeia kan tih tur tam tak a awm a, step kan lak loh chuan boruak chhia lo pung zel avanga khawlum zual zel hian chhiatna chi hrang hrang a thlen ṭeuh thei a ni. Kawngka khar hnan kan ni ṭep tawh a, hun ṭha a liam zel a. Hun khirh tak kan tawh hma ngei hian Consumer te harh ila, i ṭangtlang ang u. Heti lam hawi zawng hian Consumer te tihchak ni rawh se kan han ti a ni.

Khawlum zual zel hi boruak chhia (Greenhouse gas – CO2) vang a ni a, boruak chhia lo tam chhan chu Factory leh Motor etc aṭanga meikhu bawlhhlawh chhuah tam vang a ni. Transition period hun tlem a la awm lai hian boruak chhia tichhuak lo zawngin khawsak tum ila, theihtawp i chhuah ang u tiin thupui chuan min ngen a ni.

Kum 1962 March ni 15 ni khan US President John F Kennedy chuan Consumer te thlavang hauhna leh an dikna chanvo an neih dan - Right to Safety, Right to be informed, Right to choose, Right to be heard te chu US Congress-ah a puang a, he ni pawimawh tak hi khawvel pum huap Consumer inzawmkhawm pawl , Consumers International chuan World Consumer Rights Day atan a puang a. Kum 1983 aṭang khan khawvel huapin hman a ni ta a, vawiin thlengin thupui neiin hman ṭhin a lo ni ta a ni.

Consumer International hi kum 1960 khan din ṭan a ni a, Headquarters hi London-ah a awm. Consumer Pawl dinna hmasa ber chu Denmark niin kum 1947 khan Consumer Organization a lo ding daih tawh a ni. Tin, Great Britain-ah kum 1955 khan din a ni a, India ramah hian kum 1986 khan Consumer Protection Act (CPA 1986) passed a ni.

World Consumer Rights Day kan hman chhan ber chu Consumer-te hian kan thil leiah zalenna zau tak kan nei a, kan duhzawng kan thlang thei a. Kan thil lei tur hriat chian hmasak te, man man taka thil lei te, thil him ṭha leh tlo lei hi kan right a ni. Consumer-te hi kan pawimawh em em a, vawiin hi kan lungawi loh chuan danin min chhan thei a ni tih kan hriat thar lehna ni pawimawh tak ni se. Kan dikna chanvo humhalh ngam turin i huaisen ang u. Thil leituin harsatna a tawhin District Capital tinah District Consumer Redressal Commission a awm a, inthlahrung miah lovin ziakin thlen ṭhin tur a ni.

WCRD 2023 kan lo thlen mek lai hian Consumer te himna leh damkhawchhuahna hi UNO, Sorkar leh thuneitute leh mithiamte hian mut mawh hnar mawhah neih se. Kan chenna planet leh a chhunga chengte himna hi tun kum zabi a liam hma ngei hian 'number one' ah neih nise, boruak tibawlhhlawh a khua tilum zual thei, energy kan hman nasat ho te thlak dan emaw tihnep theih dan turah theihtawp chhuahin hma la se. Chutiang tur chuan mipui nawlpuite pawh min zirtir se, Consumer te tihchak ni bawk se.

Tin, he ni pawimawh tak kan lo thlen hian Consumer te rilru sukthlek leh ngaihtuahna te pawh a danglam a pawimawh hle mai. Nitin khawsak phung leh khawvel tlona lam tur ngaihtuahna seng nasa lehzual ila, kan chenna dimdawih a ngaihzia hre thar leh ila, environment leh boruak tichhe thei lam chi reng reng hnualsuat ngam ila, i do tlat ang u.

UNO EGR 2020 in a sawi angin kum 2030-ah chuan boruak ṭha lo Greenhouse Gas - Carbon dioxide etc tihchhuah te hi kan tih tlem hle a ngai dawn a ni. ERG 2022 chuan Paris Agreement tihlawhtling tura hmalak a nih lohzia a report bawk. A manganthlak hle mai. Kum 2030 hma ngeiin boruak ṭha lo kan tihchhuah te kan tihniam fe a ngai dawn a, kan khawsak phung te, kan mamawh thlan dan te kan thlak a ṭul dawn a ni. Thil thar chi hrang hrang hmuhchhuah leh chinchhuah a ṭul a, mahni hmasialna thinlung ṭha lo te paih a ngai a ni. Kum 2030 hma ngeiin Greenhouse gas kan tihchhuah hi kan tih hniam fe a ngai. Engmah kan tih loh chuan CO2 gas a tam tawlh tawlh dawn a, khawvel hi a lum telh telh ang. Tun aṭanga reilo te ah khawvel hi 2.8 Celcius degree in a lum lehzual ang. 45% in CO2 tihchhuah kan hniam ngei ngei a ngai dawn niin mithiamte chuan an hria.

United Nations Framework Convention on Climate Change (COP27) November 2022 chu Egypt-ah neih a ni a, hetah hian Climate change avanga ram harsatna tawk leh chutiang ang tuar dinhmun hlauhthawnawm a dingte dawmkanna leh ṭanpui theihna dan tur an ruahman a, a lawmawm khawp mai. Amaherawhchu vanduai thlak takin he Meeting pawh hian boruak chhia tih tlemna tura hmalakna leh thiltih te a tlem thu sawi lan a ni tlat mai. He khawvel hi Pathianin a duh taka a siam, mihringte leh thilnung dangte tana min pek a nih angin duat taka kan enkawl a ngai takzet ta a ni. A ṭul anga insiamrem leh dan leh dun thleng pawhin kan ennawn a, thil thar emaw dan thar siam ngam a hun ta.

Kumin thupui hian mi zawng zawng Warning min pe se, min beng harh hram se. A bik takin ram hruaitu, politician, mi hausa, Manufacturer, Industrialist, Scientist, Techno­logists, Educationist, Economist etc te an harh chhuah a va pawimawh em. Tun ang renga kan kal a hma kan lak loh chuan khawvel hmalam hun hi a thim viau mai a, chu hun chu kan thleng ṭep tawh a ni. Hei hi hun pawimawh lai ber mai “Transition period” kan tih chu a ni. He transition period hi kan hman thiam leh thiam lohah thui tak a innghat dawn a ni. Ram hrang hrang bakah UNO ang pawhin pheikhai rual takin ruahmanna chak lehzual siam ni se, strict taka dan lekkhawh a nih theih nan UNO pawhin tun aia nasain hma la se a lawmawm hle ang.

Hun inthlak mai tur kan hmachhawn mek lai hian mitin tih theih hmasa ber chu boruak ti lumtu - Carbon dioxide leh Gas dang pechhuak thei Oil chi hrang hrang - Petrol, Diesel leh Lungalthei etc te hman tlem hi a ṭul hle mai. Tin, heng bakah hian zawi zawiin energy kan mamawh te hi thil dang aṭanga kan lak a ngai dawn a ni. Thil thar hmuhchhuah te pawh a ṭul dawn a, dan thar te pawh kan mamawh dawn a ni. Consumer ten kan theihna mual mualah aw chhuah ila, sorkar, thuneitu leh thil siamchhuaktute hma la turin i kar bawk ang u. Keimahni ngei pawh hian kan nundan phung tidanglam ngam ila, Consumer te a taka kan chet chhuah a ngai ta e.

Khua tilum zual thei Greenhouse Gas kan tih te hi changkanna in a hrinchhuah kan ti thei awm e. Heng changkanna te hi nei tho siin, boruak chhia kan tihchhuah tlem emaw hi kan tum ber tur chu a ni ang. Boruak tibawlhhlawhtu lar zualte chu :-

Industry : Khawvela Direct leh Indirect a Greenhouse gas pe chhuak tam ber chu Industry te hi an ni. Tin, Direct a tichhuak tam ber dawttu a ni bawk. Consumer te hmakhaw thlir ngaihtuahin leh kan survive zel theihna turin kawng hrang hranga hma lak a ngai ta viau a ni.

Paris Agreement anga hmasawn tur chuan Industry-ah electric tha chakna hman tam hret hret dan ngaihtuah a ngai a. Thilsiamna hmuna electric hman theihna dan tur hi kum 2030 ah chuan 35% leh kum 2050 chho vah chuan 55% a nih a ngai dawn a ni. Kum 2019-ah electric hman ṭangkaina rate 28.5% a nih laiin 2020 ah chuan 28.4% a ni thung. A hnufual zawngin kan la kal a ni. Electric thahrui hian boruak chhia a pechhuak ve lo a ni.

Cement leh Steel siamna kawngah hian kawng dang ngaihtuah emaw Carbon lam hmanna tih tlem a ṭul ber mai. Mamawh tih tlem dan pawh ngaihtuah chhuah a ngai bawk ang. Carbon hman tih tlem dan tur hi 2030 ah chuan 40% leh 2050 ah chuan 85% vel a nih a ngai dawn bawk a ni.

Fuel ṭha ber ni thei tur Green Hydrogen (GH2) : Factory lian pui pui thahrui (energy) atan boruak chhia siam ve thei lo, Green Hydrogen (GH2) hi mithiam te chuan number one la ni turah an ngai a, ral ve thei lo, him bawk si chu a ni. A bik takin cement, steel leh chemical siam chhuahnaah Lungalhthei, Oil etc aiawh thei tura beisei a ni. Beiseina sang tak khawvelin a neiih chhun leh game changer ni thei tur niin mithiamten an ngai. Tin, GH2 ṭhat lehna chu Cell kaltangin electric current a siam chhuah theih cheu bawk a ni. Heti lamah hian chak zawka hmasawnna a awm theih nan sorkar te, Scientist te leh technologist te an ṭan lehzual a ngai. Sum pawh nasa taka sorkar leh company ten an sen ngam a ngai dawn a ni.

Recycling of waste material : Khawvel hi a ngai reng a, thil dehchhuah a pung zel a, ekchhia chi hrang hrang nitin a lo pung chho zel a. Heng hi tinep tur chuan kan hmanraw neihsa leh hman duh tawh loh te hman ṭangkai leh theih dank an zir a ngai a, hman nawn fo dan kan zir thiam a ṭul ta. Hei hi kan zavaia kan tih theih ṭangkai em em mai chu a ni. Thluak hman chuan thil paih mai tur te hi ṭangkai takah a chhuh theih ṭhin a ni.

Decarbonization : Carbon Dioxide pechhuak thei hi hmang tlem hret hret tura hma kan lak a ngai. Hemi atan hian sorkar leh dan siamtute an pawimawh em em a, zawi zawia Fossil fuel kan ban hret hret a ngai a ni. Tun hun aṭang hian full decarbonization kawng kan zawh a ngai. Thilsiamna hrang hrangah CO2 pechhuak thei energy resource kan hnualsuat ngam a hun takzet ta. A helna kawng a lo nuam vak lo a nih pawhin kan tawrh a, kan tih hram hram a ngai ang. Heti lam kawngah hian Consumer te nasa lehzuala tih chak an pawimawh khawp mai. Consumer tam zawkten an sukthlekna lam apiang kawng a eng chak ang a, an hnualsuat miau chuan thilsiamchhuaktuten CO2 pe chhuak tam thei an tiltiahsan vetial tial mai dawn a ni. Mahni hma chauh sialna lam hawi politics, mimal leh ramten an neih ṭhin hi i do tlat ang u.

Transportation : Zin veivah nan motor, lawng leh thlawhna te kan hmang nasa a, heng khawl tivir tur hian Carbon dioxide pechhuak thei kan hmang nasa a, boruak a chhia a, a kum telin khua a lo lum ta ṭhin a ni. Greenhose Gas tihchhuah aṭanga 25% hi heng aṭang hian a ni.

Shift to low-emitting modes of transport : Gas ṭha lo pechhuak tlem thei chi kan uar a ngai. Tin, Public transport kan uar a ngai. Battery hmang chi cycle te uar chhoh tawlh tawlh a ngai dawn.

Khawvelin a nghah mek Electrict Car & Bus/ Truck : Electrict motor hralhchhuah hi 8.3% (2021) chauh a la ni a, kum 2030 ah chuan 35%-95% leh kum 2035 ah chuan 100% a nih a la ngai dawn. Electrict hmang chi ho te hi oil thun a ngai ve lova, boruak chhia an pechhuak lo a, a down hunah charge leh mai tur a ni. Hmasawnna chak takin kal zel se, ram hruaitu zawng zawngte hian heti lama hmasawnna a kal zel theih nan policy ṭha thei ang ber siam rawh se. Lawng leh thlawhna te pawh boruak chhia pechhuak tlem zawnga kawih her a pawimawh khawp mai.

Solar Energy : Nizung chakna hmanga kawlphetha siam chhuah leh nizung thahrui hmang khawl tihkal hi a pawimawh em em mai a, a manhla dawn bawk a ni. Hmasawnna chak takin a kal zel a pawimawh em em a, nizung aṭanga thahrui neihna tur technology ṭha lehzual khawvelin a mamawh a, a nghakhlel tawh takzet a ni. Mizoramah pawh Solar plan lian tham tak (Vankal solar plant 20 MW) siam mek a ni a, tun thla chhung hian zawh hman beisei a ni. Tin, roof top solar plan policy hi consumer ten kan ngaih pawimawh theih nan sorkar hian chak lehzualin hma la se a ṭha ngawt ang.

Research beih leh thil thar duanchhuah a ngai : Sorkar, bank leh financial institution ho te hian carbon pechhuak tlem thei lam project atana investment te an ngaih pawimawh a ṭul hle mai. Mipui nawlpui hmakhaw ngaia heti lamah hmasawnna a chak lehzual theih nan kawngro an su hle dawn a ni.

Ralthuam leh nawmchenna lama ram hruaitute intlansiakna te tih tlem ni tawh se, heng pawisa aiah hian Scientific Research leh thil thar siamchhuahna tur atan sum tam zawk dah ni se, chak lehzualin hmasawnna a lo thleng ang a, khawvel hi chhuan lo awm lehzel tur te tan chenna nuam leh a lo ni thei ang. Hawh u, consumer te i harh ang u. Consumer zawng zawngte nasa lehzuala tih chak zel ni rawh se.

- A. Lalhmangaihzuala

Gen. Secy MCU Hqrs.