Kawng ṭha kan mamawh tawh
Aizawl khawpui chhungah hian kawng mam ṭha a vang viau mai. PHE in emaw, tuten emaw an han lai a, PWD ten a khuar an han hnawh leh hian a ṭiṭoh nasa ta a, tow wheeler chu sawi loh, motor pangngai tan pawh kal a har em em mai hi engnge a awmzia ni le?
Lirthei kan lei a, kawnga tlan theih nan road tax kan pe a, kum 15 daih te kan pe kha a ni a. Chuti chunga kawng ṭha kan nei thei miah lo hi chu a mawhphurtu PWD-te inthlahdah vang kan ti lo thei lo. Kan kawng zawh man kan pek si chuan kawng ṭha leh mam min hlui ve tur a ni dawn lo'm ni?
A bikin Aizawl khawpui chhungah kawng mam nuam tak a vang khawp mai. An han repair ve na a, ṭiṭoh thei ang berin an siam emaw tih mai turin tlan a har em em a, kan tei nawk nawk reng mai. Heti em ema PWD ten kan khawpui kawng an enkawl hi chu a ni lo deuh a ni.
Pawisa a awm a, an repair fo a, mahse ni hnih khat thilah a ṭil leh a. Chanmari West area-a an siamte kha a zahthlak ngawih ngawih a ni. A hnu ah siamṭhat leh ngai khawpa chhia a nih kha.
PWD engineer-te hi eiru vanga hausa vek an ni lo tih chu tlang hriat sa a ni a, mahse engemaw chu a awm a ni ang; an hausa hlawm riau. Hengte hi kan kawng ṭha neih theih loh chhan a ni thei ang em? Zawhna lian leh pawimawh tak a ni. Lal takin an naute bulah an khawsa a, an hnathawh ṭha hmuh tur a awm leh si lo.
Sorkar sum hi mipui ta a ni kan ti ve ṭhin a, mipuiin insem dur dur ang u tihna a ni lo. Kawng ṭha te, electric power supply ṭha te, tui thianghlim thlachham loa kan khawsak theihna turin sorkarin mipui sum hi hmang ve rawh se. A eiru thei theiin an eiruk kual mai mai tur a ni lo tih hi kan officer-te hian hre nawn leh teh se.
Power supply te, tui supply ṭhate bakah kawngpui ṭha kan neih hi mipui chanvo ve a ni. Kan chanvo tur hi a ni lo lama kalral reng tur a ni lo. A eiru theiin an eiruk a, an fate tana an hman bik tur a ni lo. Hlawh an nei a, an hlawhin an nupui/ pasal leh fanau an chawm ve mai tur a ni. Mipui chanai hi an mimal thilah an hmang thiang bik lo.
- Lalkhirhvela