Lungleiah eng thli mah a tleh lo

Lunglei khawpuiin kan aiawha kan khaw­pui awptu tur kan thlang dâwn a, Lung­lei Municipal Council inthlanna awm turah tu Party thli emaw tleh bîka sawi te, Ruling Party tawh an la khirh dâwn tih te, Party thar miin an thlir tihte hi kei Lunglei tlangval hian ka hrethiam lo. Eng thli mah a tleh loh bakah a tling tur chu mipui duh ber apiang, a Party ty lam a ni lo ang.

Leitlangpui mipui hi Facebook leh WhatsApp hmanga bawl theih kan ni lo. Social media hmanga boruak siam hian awmzia a nei lo ang. Kan duh chu kan hria a, kan duh loh hlei hlei hi kan hre chiang. Rawn sawi mawi teh mah ula e, Facebook lama in sawi hian kan vote a tiche dawn lo.

MNF a nih vanga tla tur an awm lo ang tho hian MNF a nih loh vanga tling tur an awm chuang lo. Party dang pawh hetiang tho hi a ni. Leitlangpui hian kan tana ṭha kan hria a, Party tana ṭha pawh kan hre chiang tawha kan tihsual tawhna kha tihsual nawn kan tum tawh lo LMC chu a dang tawh ang, kan duh hi kan chiang tlâng.

Aizawl aṭanga an nawm an maka an rawn thunun tur LMC hi neih kan tum tawh lo bur. Covid lai pawha ṭik pawh ti ngam lo kan thlang tling kha kan inchhir vawng vawng asin. Hemi vang hian MNF tán chance a bo a ni lo, Aizawl pheikhawk liak lo tur an niha an ṭhat bawk chuan an tling tho ang.

Kan duh chu Lung­lei tana a tawp thlenga ding ngam tur candidate a ni. Lung­lei aia mahni Party dah hmasa ang chi kha chu kan tisual tawh. Lunglei hi kan ṭang tlâng thiam tawh dawna Party aiin Lunglei kan dah hmasa tawh tur a ni. Hei vang hian alawm, "Chumite party thli chu a tleh nasa" tia Social Media boruak lem hmanga min bum tum hi chu sim rawh u.

Lunglei hian kan tána ṭha hi kan hria, District dang rawn inrawlh buai vak suh u.

- F. Lalhmachhuana