KAN STATE LEIBA LEH ZUN IN

Assembly lai khan opposition lam khan, "Heti em ema sum puk mawlh mawlh mai chu, leiba in min delh rit dawn em mai" ti khan an rawn au chhuak a. Kan hotupa ber lah khan, "Central phalna veka puk kan ni alawm, sum puk loh tihte chu, Zun In saka zun duh loh ang vel a ni" a ti sam et mai a.

Zun in chu: Zun In hi zunna tur a ni tehmeuh mai a, zun theih tih vanga zun vak vak a, tih fai leh si loh chuan hmun tenawmah a chang thei. Hmanni pawh function kan neihna bul lawkah Zun In tih fai ngai loh a awm a, mipui an phun sup sup mai asin. Zun In hi a nih dan tura hman chuan a ṭangkai a, zun mawlh mawlh mai tur a ni.

Kan leiba chu: Ni e, central chuan bat theihna min rawn hlui ngei mai a. "Lo ba ula kan rawn rulhsak vek ang che u" a ti leh bawk si lo a. An sum min pek baka kan state sum nena lo rulh tur a ni bawk si.

Kan leibat hmang hian hna thawh dan tur dik takin thawk ila chu, ram hmasawnnain a rulh let lehna pawh a thawk chhuak ang a, rulh leh lam pawh a huphurhawm lo. Mahse kan sum hman dan kan thlir hian, man tang ei bangin kan thawk thin bawk si a, a thawk chhuak nep thin em a ni.

Hei vang hian leiba ngah vak vak hian min la delh na dawn tih a hriat reng mai a, duhsak bikte vulh nan kan hmang hmiah hmiah mai bawk si a. Kan leiba leh Zun in hian in unauna tak a nei reng asin.

Thuneihna hman sual hi: India ram hi Democracy ram kan ti naa, thuneihna changtuten an nawm an maka an chet theihna ram chu a ni ve tho. An duh chuan thil an lo ti thei em!

An duh chuan mi dik tak pawh an ching buai nek thei a, mi dik lo pawh mi dik angin thiam an chantir thei.

Tunlai India politics hi: Kan pu Modi te hian, India ram hi party pakhat BJP chauh lalna atan hian hma an la nasa khawp mai a, an party ni lo chu sawp zero hi an tum nasa asin. An chet vel dan hi thlir thuak ang aw.

Delhi Aam Admi sorkar minister, Satyendar Jain, Delhi Mohala Clinic hmingthang tak chhawp chuaktu, leh AAP sorkar Deputy CM Manish Sisodia, Delhi education siam ṭha a, model thar chhawp chhuaktute chu, zu zuar company te hnena sum tam tak thamna laa, Goa inthlanna atana hmang anga puhin, case an siamsak a. Manish Sisodia inte chu dapin, an bang leh an awngphah thleng an enfiah a. Sisodia te khuaa an chhungkhat laina hnai zawng zawng dapin, engmah hmuh tur an nei lo chungin, case siamsakin Tihar Jail-ah an dah a ni. CBI ten chhui chhuah tur an hmuh hleih theih loh hnuah, Enforcement Directorate lamin an rawn chhui ve leh bawk a.

Hetia AAP sorkar hming ṭha tak BJP ten sawp chhiat tum anga hma an lakna chu duh lovin, AAP CM Kejriwal leh an MP, an senior spokes person ni bawk, Raghav Chadha te chuan press conference neiin an rawn au chuak a. An minister an man te hian AAP chhuahsan in BJP-ah inpe se, an thubuai hi chinfelsak an ni ngal ang tiin, an minister te mai ni lo, state dang party hruaitute case an siamsakte rawn sawi chhuakin.

Chung mite chu, Abishek Banerjee W. Bengal TMC party te, Sanjay Rawat Maharastra Shivsena Party te, Farooq Abdullah J&K National Cinference Party hotu te, DK Shivakumar, Karnataka Cong Leader te, K.Kavitha, Telangana CM fanu BRS Party leader te, Tejashwi Yadav Bihar Deputy CM, RJD party te an ni. Anniho hian BJP zawm ni se, an case an chinfelsak nghal ang tiin.

Chumi ti chiangtu atan chuan, BJP Party an zawm hmaa, eirukna thubuai rit tak tak nei, BJP an zawm hnua an thubuai tih fel sak nghal te, rawn sawi chhuakin.

1. Himanta Biswa Sarma - Tuna Assam CM ni lai mek, Congress party a nih laiin a eiruk thubuai an chhui ṭan a, BJP a zawm nghal a, a eiruk thubuai tihfelsak nghal a ni.

2. Suvendu Adikari - W.Bengal Trinamul Congress party hruaitu, W.Bengal Saradha Chit Fund inbumna leh sum leh pai tam tham tak tih chingpennaa a mawhphurtu nia puh chu, BJP-ah a inpe daih a, a thubuai chin felsak a nih mai bakah Z-plus Security pek a ni nghal. W.Bengal opposition leader a ni der tawh.

3. Narayan Rane - Maharastra politician lar tak hi a laka eiruk thubuai an chhui laiin, BJP a zawm daih a, a thubuai chhui zui a ni tawh lo. Tunah central Minister a ni der tawh.

4. Mukul Roy - W Bengal TMC politician chuan BJP a zawm hnuin a laka case awm zawng zawng tih tawp vek a ni.

Mizoram hi le: Pu Modi te ang em ema chet nat chu kan la nei ve lo. Hmanah khan hetiang ang lek lek MLA nihna aṭanga ban tih vel kha chu kan nei ve tawh a, mahse mipui rorelna in a la chhan thei hlauh a.

Sum chunga thuneitu kan nih vanga thuneihna hman sual erawh chu a lar a ni ang, social media-ah te kan vawrh lar em mai.

Leibat pawh chu a hmanna tur dik tak leh chhawr awmah hmang ni ila, mipui intodelhna leh kan state tax ti pung zawnga hman chu ni se, puk vak vak ang hmiang. Zun In pawh fai taka kan enkawl chuan zun huau huau mai tur.

Thil hi a nih dan tura a kal loh vaih chuan, Politics pawh hi hlauhawm deuh asin. Keini erawh chuan Kristian rinna nena inmil politics hi i zuar zel ang u.

- Lalrinliana Colney