Ram pawna in kah chhuah
Hman deuh khan Mizoram Youth Commission (MYC) khan Mizo ṭhalaite ram danga hna thawk thei tura chher hriam kha an thil tum a nih thu a sawi tawh a. Kei pawh hian kan ṭhalaite hmakhua ka han thlir sak ve chang hian kan hna thawh duh zawng leh kan living standard te ka khaikhin a, kan ṭhalaite hmakhua hi a thim ang reng viau mai tih hi ka hmuh dan a ni.
Sorkar hna leh hna changkang deuh, hlawh pawh ṭha ve pangngai deuh a nih loh chuan thawh tlakah kan ngai lo nghal deuh zel mai a, hei vang tak hian Mizoramah hnam dang pawh an lo luh nasat phah niin ka hmu.
Mizoramah kan ṭhalaite hna beisei ang leh thawh duh ang a tam loh avangin state pawna hnathawk turin Mizo ṭhalai eng emawzat an chhuak mek a. State pawn leh ram pawna hnathawh kan intihhmuh chho mek bawk a, Dubai leh China tlengin Mizo ṭhalaite kan feh chhuak ta zut mai.
Kan ṭhalaite’n state dang leh ram dangah pawh hna an thawk thiam a, anmahni leh an chhungte chawm turin hna an thawk peih a, sum an lalut thei a ni tih an finfiah tawh hei hi mahni awm hmuna awma chhungte chawm hlawm nih ringawt i chuan hmasawnna chi khat a ni ngei mai a, hmasawnna rahbi thar a ni.
Chutih laia ka rilrua lo awm ve chu, kan ṭhalaite hnathawh turah hian kan fimkhur tlan a ngai a. An tana him lo leh hlauhawm thei tur thil tam tak awm theih a nih avangin sorkar, pawl leh sumdawngte’n hnathawktu an tirh chhuahte hi an en zui a ngai khawp mai. India ramah ṭhalai ṭhahnem tak an awm a, heng mite hi hnathawh tur zawng an ni deuh vek a, anni thawh duh loh chin thawk tura kan chhuak a nih chuan a fel lo thei a, an thawh thiam loh thawk thei tura kan inzir hi a ngai viau a ni.
Mizo ṭhalaite hnathawhna hmunte a him nge him lo tih hriat chian hmasak a ngai a, an kalna tur kawhhmuhtute hi a mawhphurtu an ni zui tih an inhriat a ṭha khawp mai. State pawn leh ram pawna hnathawka chhuak zingah harsatna tawk zui ta sawi tur an awm ṭhin avangin hian, a him chinah chauh hnathawk tura in tirh chhuah ṭhin ni se, buaina tam tak tawh hnua in buaipui leh a sum leh tha tam tak sen hi kan pumpelh bawk ang.
Kan hna thawh tur hi a tirah tawktarh hlawh tam leh nuam ringawt um mai loin eng ang hna nge a nih a, hna rintlak a ni em tih ngaihtuah hmasa phawt ila. A pawimawh ber chu sum ni loin mihringte bawk hi kan nih avangin kan hna chu a him tawk em, a hnu lama buaina zakhua min thlentu mai a ni dawn em tih lam hi en fiah hmasa phawt ṭhin ang u.
- Vohbika Pu