PMJVK hmang thiam versus hmang thiam lo
School Education Department chuan Mizoram school building chei ṭhatna turin rulh leh tur loan NABARD aṭangin cheng nuai hlir 3500 an puk a, Assembly Budget Session ah khan Sports Minister Pu Robert Romawia Royte khan department dang pawhin proposal/project an siam thu leh a tlang loh avanga Sports Project tlang ta chuan sawi a hlawh tih lam hawi zawng khan a sawi a, Mizoram Minister zingah sorkar laipuia thil sawi chhuak thei leh sawi chhuak thei lo an awm a ni.
Keini chin hi chuan Google bak hi kan hmang ve thiam lo va, Google aṭanga a lan dan chuan Press Information Bureau-in December 15, 2022 khan PMJVK heti hian a sawi fiah a :- "The Minister of Minority Affairs, Smt. Smriti Zubin Irani in a written reply to a question in the Lok Sabha today informed that the Pradhan Mantri Jan Vikas Karyakram (PMJVK), a Centrally Sponsored Scheme (CSS), is being implemented by the Ministry of Minority Affairs, with the objective to develop infrastructure projects in identified areas, for socio economic development of said areas. The priority sectors under PMJVK are education, health, skill development, women centric projects etc. " tih a ni a, Sports tih reng reng a inziak lang lo.
Hetah hian Mizoram Sports Minister hi demna tur pakhat mah a awm lo va, kan fak zawk tur a ni a, PIB-in 'priority sectors' a tiha a inziak lo aṭang pawhin sum a hai chhuak thiam tihna a nih chu. Hetih lai hian kan Health Minister Dr R Lalthangliana leh School Education Minister chuan PMJVK aṭangin sum an hai chhuak ve thei si lo va, Health department chuan Asian Development Bank aṭangin rulh leh turin sum tam tak an pûk dawn a, School Education Minister chuan rulh leh turin NABARD aṭangin a pûk bawk a, Mizo mipui pawisa aṭanga rulh chhoh zel tur a ni.
Hetah tak hian 'Chief Minister Blessing hmu leh hmu lo' an tih a lo lang ta a, hei hi chu Politician mi ril lam sawi bak mipuiin kan hre ve thiam lo va, PMJVK chungchangah hian thil awm dan hriat chian thiam a chakawm a ni. MNF ṭheuh ṭheuh hi Pu ber enkawl dan a inang lo tihna nge ni ang a, khu lama tlaktlum leh tlaktlum loh nge ni ang? A chhan zawn chhuah a ṭha a ni.
- David Lalremruata