SOLOMONA TE PAFA
Solomona kha a hausa a, a ropui em em a; a ropuina ṭhenkhat erawh chu tunlai ngaihtuahna aṭang chuan a ropui tehchiam lo a; a finna pawh hi sawrkar inrelbawlna tak tak atan a ṭha tawk lo hle a ni mai thei. Mipui phur a rit em em a. A fapa Rehoboama a lo lal hnu lawkah an ram chu a phel ta phawk mai a ni.
Rehoboama lal tirh hian Israel hmar lam mite chu Jeroboama hovin an lo kal a. An nghawngkawl tizangkhai deuh turin an rawn ngen a. Rehoboama hian thurawn chi hnih a dawng a; a ṭha lo zawk a thlang a. Thurawn ṭha lo avang hian an ram a phel phawk mai a ni. Thurawntu a nei, thurawn ṭha pawh a dawng. Mahse a ṭha leh ṭha lo a thliar thiam lo.
Han ngaihtuah thui deuh ta ila. Solomona pawh khan a hunlai khan thurawn petu khawnbawl upa a nei ngei niin a lang a; a fapa Rehoboama hnena thurawn dik petute tho kha a hunlaia khawnbawl upa an ni. Zawhna a awm thei ta a ni: Eng ngati nge a dam lai khan mipui nghawngkawl kha a tihzangkhai mai loh? A khawnbawl upate khan thurawn an pe lo em ni?
Thawnthu lama an sawi ṭhenkhat aṭanga kan teh dawn chuan, Solomona fin dan kha mipui tana malsawmna hawi a ni lo. Chawp leh chilha khingpuite chhàn thlâk fek fekna chi, hnialhrat sa bawp chang tawk vel lek tur a ni. Mi chutiang chu a nih tak tak chuan fing a inti hle ang a; a hriat loh leh a zir loh pawh hre ber emaw a inti tlat ang a; thurawn pek theih rual a ni lo vang. A khawnbawl upate thurawn pawh a ngaithla ṭha duh lo a ni mai thei. A nih loh vek chuan thurawn pek ngamawm loh khawpin a intilal a ni mai thei bawk. Rinthu mai a ni na a, kan ram tan zirlai pawimawh tak a ni thei tlat a ni.
India ram lal ropui Akbar-a hunlai khan khawnbawl upa fing tak Birbala a awm a; Birbala kha fing hle mah se, Lalber Akbara kha Rehoboama ang ni ngat se chuan Birbala finna kha mipuiin an chhawr hauh lo vang. Mahse Lal Akbar-a kha lal fing tak a ni a; thurawn ṭha leh dik a hrethiam a; amah pawhin a ropui phah tih loh rual a ni lo. Solomona te pafa nen chuan an danglam hle.
Thurawntu an nei a; thurawntute chu an fing vek lo va, an â vek hek lo. A tawpa thurawn lo dawngsawngtu lalber kha mawhphurtu chu a ni.
Eng pawh nise, ram leh hnam chhiat leh ṭhat hi lal berin mawhphurhna an nei sang ber zel a ni tih a lang. Israel fate chanchinah a lang a; ram dang chanchinah pawh a lang zel a. Kum zabi 21 thleng hian thil awmdan a la ni zel a. Ram tin hi, Prime Minister/President an neih ṭhat laiin an ram a kal dik a, hma an sawn a; hruaitu ṭha lo an neih laiin an ram kalsiam a buai mai ṭhin a ni. Hei hi khawvel kalhmang a nih avangin keini Mizote leh Mizoram pawh hruaitu kan neih ṭhat leh ṭhat loh hian kan dinhmun ṭhat leh ṭhat loh a hril zel dawn a ni.
Ram kalsiamah ngat chuan hruaituten mipui min dem thei lo. A lalber leh thuneihna ngah berin mawh a phur nasa ber. Thurawn petu leh ṭhuihruai lehkhathiam em em, degree ziak tlar duah duah thei eng zat pawh nei se, a tawpa thutlukna siamtu ber kha Rehoboama anga thurawn ṭha leh ṭha lo thliar thiam lo emaw, kan ngaihruat Solomona anga thurawn pek mamawh lova inhria, fing bera inngai tlat a nih chuan ramin a ṭhatpui hauh lo vang.
Tunah chuan Rehoboamate hun lai a ni tawh lo va, lal chhungkua aṭanga roreltu lo chhuak tawh lovin mipuiin kan thlang a; kan thlan lalte chungah mawhphurhna a awm tawh.
Mipui nawlpui hian sawrkar kalhmang kan hre lo va, budget kalhmang kan man phak hek lo. Chuvang chuan hruaitu kan mamawh a; kan aiawha hnathawk tur kan thlang chhuak a; chutiang mite chuan keini aiin ram hmasawnna kawngah mawh an phur nasa fe zawk a ni.
Kan aiawha sawrkar khalhtu tur kan thlan danah mawhphurhna kan nei sâng hle. Ka duhthlanna hian ka hmalam hun a hril a; ka tu leh fate dinhmun tur a hril phâk daih a ni. Kan mawhphurhna hi a hrana sermon-pui tham a ni a; pahnih khat lek i han tarlang teh ang.
Kan thlan an ni a; kan vote tling a; endik hna pawh kan thawk ngam tur a ni. Sawisel ngai an nih pawhin kan sawisel ngam tur a ni.
Hruaitu an pawimawh a; hruaitu tur thlangtu mipui pawhin mawhphurhna kan nei.
I ram leh hnam a boral chuan, nang leh i chhungte in him bik lo vang.
- Lalchhuanawma Tochhawng