"In thinlung a eng alawm" type hi kan hne tawh

Hman deuh khan khaw pakhatah hian Politician pakhat a kal a. An khuaah electricity a lut loa an lo dil a ni awm a, "In thinlung a eng alawm," a ti e, an tia lawm. Tak tak a nih leh nih loh ka hre lova, thil a nihna tak zuk man chian fak tur awm si loa thiam taka sawi kual leh sawi mam hi Mizo ṭhangtharte hian kan ning mai ni loin kan hne hluah hluah.

Assembly Budget Session kha Youtube ah ka en nawn ṭhin a, mi pahnih pathum tehkhin thu nena sawi kual ching ka hmu a, khatiang hun kha a liam tawh.

Mi pakhat, ṭawng­kam thiam tak mai thusawi hi ka ennawn leh ṭhina ka hmuh chu a thil sawi kha awmze nei mang lo, a problem solve si lo, a subject sawi fiah si loin pawm nuam deuh si hian a sawi kual a sawi kual a. Amah ṭantute khan an dawhkan kha an han beng ri ham ham chung khan a sawi kha ram tana ṭhatna emaw, a hlawkna awm loin a lehlam thu kha a sawi mam vel ta mai mai a, hetiang hun hi liam tawh rawh se.

Tin, khawi party pawh ni se kum tam lutuk hi chu rawn candidate tawh teh suh u. Assembly House a an ṭawng pawh putar ṭawng ṭuau tawh mai, thu an sawi zawh hlan nghahhlelh awm tak ang chi ho hi chu an hahdam ve a hun tawh. Ṭhangtharten an ning tawh bawk. Hei bakah hian thil sawi fuh hleithei lo MLA te kan nei a, hetiang hi chu khawi party pawhin rawn drop phiar teh u, kan ram rorelna in sanga ṭhu tur chin hi i teh fet tawh ang u.

Ṭhenawm state te chuan an House chhungah policy te an chai a, keini ve chu Footballer pawisa pek leh pek lohte kan subject lian ala ni a. Chumi sawi chhuah leh sawi chhuah loh thuah Speaker ve meuh khan finfiahna a han zawng a, inhnialna pawimawh zawk subject tling zawka inpuhna ṭhenkhat kha finfiah ta zawk se a ṭhat tehlul nen.

"I sawi," tih leh, "Ka sawi lo," tih inhnialna kha chu thil ho tak a ni a, a subject tak footballer khan a inenkawlna pawisa a dawng ta em? tih lamte kha rawn sawi tur zawk a ni a, kha kha chhan in a awm ta lo lehnghal.

State khat kan ni a, kan ram rorelna inah thawnthu sawi ang maia tehkhin thu nen, ṭawngkam thiam taka kan Budget kan sawi mam laiin kan leiba ngah dan te Reserve Bank Of India chuan min rawn phawrh mualpho a. Chu pawh chu kan sawi mam hreh lova, tun hmaa Politician ang chi tehkhin thu nena Fact & Figure hliah tum chi, kan leiba pawh Fact & Figure leh comparative state­ment anga sawi duh loa phuah kual ching chin hi chu lo hah­chawl tawh rawh se.

- KL Thangliana,

Mission Vengthang