Zo Lalu

Tirhkoh Paula’n “Tuna chinah hian keini zawngin tisa lamah chuan tumah kan hre tawh lovang...” a tih ang deuhin han sawrkar meuh hi chuan tisa lama min mamawhtute hi kan hre tawh mang lo chu a nih hi, ruling party office ah pawh an in hre ṭha duh tawh mang lo. Thenkhat an mawm a ṭhenkhat an hawi hil a; kar tluana party office kai pawh kartawp lamah an hlim chuang lova, ngui takin Inrinni bazarna tur sum puk tur zawngin an hawi ruk ruk mai.

Chutihlaiin, kum 2018 inthlan campaign lai a thawh hlawk em em lo, vawi khat pawh campaign a che chhuak lo kha a mawm mawm an ni leh lawi si a. Pathian leh kan ram tan tia mahni nupui fanaute kalsana campaign a chhuakte kekawr ipte lah chu a ruak hiau si a, beidawng takin an hawi fi hmuk hmuk mai a ni.

Hetiang taka party worker beidawngte hi kan lainat a ni, mahse mak deuh mai chu heti khawpa pute laka beidawngte hian Party President ah beiseina an nei tlat zuk nia. Ni, a khat mawi tawkin Party President in ban vai pahin lungngai suh u, a hunah in hmu mai ang a tih hi an ring viau lawi si.

Ram Sq ft. nuai khat zeta zau CBI-in cheng vaibelchhe 4.39 man vel tura an chhut chu cheng nuai 26 chauhin a lei thei a. Kum 2004 – 2009 chhunga Union Railway Minister a nih lai khan mi 12 hnenah Sawrkar hna Group D pe in ram zau tak tak nen a lo thleng kual pek a, chuavangin thubuai ‘Land for Jobs Case’ tih a lo piang a. Hetiang a chanchin ngah ve tak India ram politics a kum 45 vel zet lo tal tawh, kum 1990 – 1997 chhunga Bihar CM Lalu Prasad Yadav, mipui hriat hlawh tak khan a hunlaiin Bihar sawpchhe hle mahse amah a rinna nghat mi sang tam tak an awm tho.

Bihar a hnam hnuai­hnung­ten an tana dikna petu a ni an ti mauh mai. Hnam hnuaihnungte hmang ṭangkaiin politics-ah hamṭhatna a hui thiam em avangin 'Lalu Caste Arithmetic' tih a ni. Chanchinbu mite chuan Lalu hi sual bulpui ‘epicenter of crime' an ti fiam hial a, chumai duh tawk lovin Bihar hi lung hriam hman hunlai ‘stone age' ah a hruai kir a ni tiin ngaihnawm tak takin an ziak kur ngei nguai ṭhin. Thalai hna nei lote hna pek aiin sual ti tura kut zalenna pek an ni.

Fodder Scam kan hria a, ran chaw man cheng vaibelchhe tam tak khawih chingpen a, sawrkar sum bawm aṭanga duh tawka sum sawk chhuak a 'Bihar ei chhetu' an tih Lalu hian a hunlaiin CBI umzui hlawh viau mahse, politics tuinu malsawmna changin mi tam takin an zui dul dul tho a ni. Lalu hian India ram tan thil ropui tak tih a nei ve tho, Indian Railway sum tam tak hloh ṭhin kha sum tam tak thawk chhuak theiah a chawisang a. Khawvela zirna in ropui tak takten a ruahman dan hriat chakin thusawiah an sawm fo. Mahse, heng a thil tih ṭhat hian CBI umzui a ṭhulh tir chuang lo.

Vanduaithlak takin keini hian Zo Lalu kan kawl mai lo maw? Leilung hausakna ngah tak leh hnathawk thei mihring (man power) ngah em em Bihar State chu CM chhemi in a kaihhruai chhungin state hnufual takah a chhuah a ni. Pu Denga khan “Kan ram pianhmang hi chu changkha ang mai a ni" a ti a ni awm e. Chutichungin, oil lipui chunga awm kan nih thu te, agri leh horti lam tana sik leh sa duhthusam kan neih thu te, ramhmul damdawi lam hausakna la varpawh loh kan ngahzia te, ram hmasawnna atana pawimawh ber mai ziak leh chhiar thiam kan tamzia te adt. kan sawi ṭhin.

Tualchher zawlnei te phei chuan, Zofate hi khawvel ram hausa ten min la intlawnsiak dawn te an ti deuh deuh a. Chu mai ni lovin kan Kristianna hi kan nunpui hunah ram hausakna inphum hi pawnpui sawr ang maiin kan la sawr chhuak tlu tluk dawn a ni tih thlengin an au chhuahpui a ni. A thu-ah hi chuan kan va hausa em! Thu hi tisaah a chan theih loh chhan chu tu emaw hian Lalu hnung min zuipui a ni ber mai.

Engpawhnise, Zo Lalu kaih­hruaina hnuaia kan khawsak chhung hi chuan, Mosian Pisgah tlang aṭanga Ramtiam a thlir ang chauhin, dingdihlipin kan beisei ram chu kan thlir ta reng mai a nih hi.

Pu Rokunga’n “engtik­nge, sappui nun ngai lo rengin” a tih te hi a thuk ta lutuk. Tunah chuan kan ram hian “engtiknge Cachar vainun ngai lo rengin” tih hi kan inhmeh tawk vel chauh chu a nih tak hi!

- Rosangzela,

Vh ( 8974138026 )