SHERLOCKIANS MEET 2023

Kohhran hmeichhe inkhawmpui an neih mup mup lai khan Mizorama Sherlock Holmes tuipuitu leh ngainatute chu Synod Conference Center, Mission vengah March ni 11 khan kan tlin tawk te tein kan lo inhawt buk ve a. He meet kan buatsaih leh kohhran hmeichhe inkhawmpui hun a inrual avang hian inkhawmpuina lama kal an tlem phah a rinawm loh va, meet chhimtu kan tlem phah pawh kan hre lo. Inkhawmpui hmang ve ve si kan intibuai dun lo ve ngawt mai.

Hunbi nei lo Sherlockians Meet : He Sherlockians meet hi Aizawla ṭum li hmanna a lo ni ve ta mai hi meet chhang khât ve pawl tak a ni mai awm mang e. A vawi khatna 2002 kumah Khatla South-ah, a vawi hnihna 2006 Durtlangah. A ṭum thumna 2017 Tourist Lodge, Chaltlangah. A vawi lina tuna kan hman zawh tâk hi a ni leh a. Hunbi mumal lo ve zet chu a ni. A hun a mumal loh ang bawk hian kan hun hman pawh hi a mumal chiah lo. A mumal lutuk ang tih kha kan hlauh berte pawh a ni ve bawk.

Khuallian awm lo Meet : Mizote hi khuallian buaiin kan buai a, eng thil emaw han buatsaih hian ṭhenkhat chuan kan tihtur leh kan punkhawm chhan lam aiin khuallian mawlh mai hi kan vei a. A chang phei chuan khuallian dawnsawn dan tur te, khuallian ei tur chhawp nana kan inbuatsaihna te, khuallian ṭhutna tur ngaihtuah nan te kan ngaihtuahna kan seng nasa lutuk a, mipui mimir chanvo leh pawimawhnate a bo zo va, kan punkhawmna pawh a khingbai zo vek ṭhin. Khuallian mai duh tawk lovin khual zahawm kan ti thul, khual zahawm bâk pawh chu ngaihtuah belhin 'Uaptu' tih te kan han ngaihtuah chhuak thiam hi chu khuallian leh a behbawm vel ngaihtuahna kawngah hian kan rilru a chak a, duhsak bik tur ngaihtuah chhuah kawnga kan chemkal dan hi pui beu beu tak zawng a ni. Kan Sherlockians Meet ve-ah chuan a tu pawh mai kha khuallian kan ni vek mai a, kan kalkhawm chhanah kan chiang a, khuallianin min hrilh leh chuan reng reng kan ngai lo va, khuallian hnen aṭanga beisei kan nei lo va, khuallian sawngbawl nan tha leh tui pakhat mah kan seng lo va, kan va han hlawk tak em. A intithu deuh an thu a, a intineitu deuh an buai deuh a. Tlema a hotu chan intichang peih deuh chu a buai buaia ṭan a ni mai a. A kal zawng zawngin ei leh in angkhat, hmun khatah kan han chang tlâng a. Ṭhutna ruak remchang apiangah tu tan pawh ṭhut a thiang vek. A sir lama tu m'a ruat hleih lohva Pu Chuauhnuna te leh Pu Vanneihtluanga ten dawhsan aṭanga lo chhuk apiang an lo chibai ve ringawtte kha rawngbawltu nge an nih inti-'official' phur thatho thiltih pawh kan hre tawh chiah lo. Mahse khatia an han tih takah kha chuan kan Meet kha a ropui ve deuh sawt nia.

Kim lo chungin Scoundrel Six : Sherlock Holmes leh Scoundrel Six hian inzawmna engmah an nei lo, mahse a inzawma hre deuh tlat kan awm. Hemi ni hian Scoundrel Six member pathum, Pu R.Lalmalsawma, Pu Vanneihtluanga leh lehkhabu letlingtute hmel a lang a. Kal ve thei lo F.Lalhuliana te, chin hriat lohva kal lo ringawt Laldawnga leh pialral kai tawh vanga kal lo S.Thangkhuma te hmel a lang ve ta lo. Senior Pu Ngailova te, Pu LT Zodinliana te leh Pi Lalchhingi te an han ṭhute kha an awm mai mai khan min uap a, phuah belh ngai hauh lova uaptu an ni mai. Pu C.H.Thangkhuma hmel hmuh ringawt pawh kha thlamuanpui tham a ni.

Inthlahrunawm loh Meet : Sherlockians Meet hmannaah chuan mumal lo langsar tak chu Quiz a ni. Tun ṭuma kan quiz han ti vel pawh kha a va pui rep rep tak e aw! A ti veltute kha mipa rual kan ni bawk a, kan dan leh hrai han zamte chu 'A ruala chhang dik pahnih an awm hlauh chuan a hmeichhia zawk duhsak tur' tihte kha a ni a. Chutah pawh a chhang diktu pahnih chu hmeichhia ve ve an nih chuan a hnute lian zawk zawk hnenah lawmman hlan tur kan ti lo chauh zawng a ni. A buaipuitu lam kan fel loh tehlul nen keini aiin a mipui lam khan mumal loh kha an la tlin lehzual a.

"Cecil Barker James kha khawi khua nge?"

"Darlawn!"

"Porlock leh Holmes te khan khawi dak inah nge lehkha an inthawn ṭhin?"

"Chhingchhip"

A thiam lo lo kha a chhang huai an nih tawh chuan boruak kha a zangkhai lo thei tawh ṭhin lo.

Sherlockians Meet tihlutute : Khatih karah khan a thiama thiam tak tak leh a hriata hre tak tak, Lunglei aṭanga lo kal vang vang Jimmy-a te an han awm bawk a. Nuam ve heih heih tak chu a ni. Prof. Moriarty-a ni awm fahrana a dum 'suit' a rawn inthuam a, kutkawr leh lukhum nen thlapa lo chhuak; Nanaua te kha chuan Meet kha an tiphuisui a. Mrs Hudson ni awm takin Pi K.Hmingthanzauvi te an rawn inchei a, Becktei hmel hmuh chuan Irene Adler-i kan han hrechhuak lo thei lo va. Mr Holmes lemah K.Lalnunhlima te changin Dr Watson-a lemah Dr H.Lalsangliana te an han chang a. Sherlockians Meet kha hlu lo thei a ni lo.

Hlawk tum lo te avanga hlawkna : Party thil leh kohhran thilah te Mizote hi kan pungkhawm reng reng a. Thlarau lam ruai pawh kan kîl zing narawh e. Mahse, khawvel thawnthu inchhiar ṭawm hmanga punkhawmna awmchhun tlem te zinga pakhat chu Sherlockians Meet hi a ni. Kan thawm thangva pawh Pu H.C.Vanlalruata te zarah India ram chanchinbu lianah a chhuah ve tak kha. Tisa leh thlarau lama hlawk tumna awm lo, punkhawm thianghlima punkhawm kawngah khawvel rualin Mizoramin hemi avang hian ke kan pen ve kan ti thei ang. Hriata, Larsa, Zauva, Sangzuala te thawhrim zar a ni. Man nei lo banner kan zar a, thla min laksaktu Zonet leh Rinzauva Sailo ten pawisa pakhat mah an phut lo va, Chanmari West KTP Group lah an hnuhma a mamin an rintlak em em lehnghal.

Tlangnel em em te : He Meet-ah hian Sherlock Holmes leh a letlingtu lehkhabu dang ṭhenkhat a tlawma lei theihin a awm a. Chumi hralh bang chu mi ṭhenkhat, Pu Dara tih ang chi khan a neitu thu pawh hmu lem lo khan an lo va la a. Lawmman angreng atan an duh zawng zawng an han sem hmiah hmiah mai a. Pu Hriata phei kha chuan Arabian Nights set kim thlap kha dawhsana a lettu ko chhovin amah leh amah kha a'n inpektir tehreng ah! A tlangnela te chu kan tlangnel khawp mai.

Hemi ni hian William Booth music school aṭangin ṭum thum zet rimawi kan ngaithla. Hetiang rimawi danglam hi chhim mai a harsa ve ṭhin.

- Lalrotluanga