Leiba-in min delh
Hmanni lawk khan Union Rural Development Minister of State in Mizoram min rawn tlawh a, Mamit district-a PMAY hnuaia in sak ṭanpuina mi 2237 pek a nih tawh laia 424 chauh zawh a ni thu bakah tun hnaia mi 1743 hnena first instalment pek chhuah a ni chauh chu Mizoram sorkar inthlahdah vang a ni tiin min rawn hau a ni ber a. Khatiang thil central lam aṭanga an rawn sawi ta fo mai hian Mizoram sorkar hma lak dan ṭhat tawk lohzia a lantir a ni.
Kei chuan sorkar kalphung hi thuk takin ka hre chiam lo a, mahse central Minister lo kalte reng reng hian Mizoram sorkar hmalak chak loh thu te, pawisa hman dana an lungawi loh thu te an sawi ta fo mai a. Hei hian chiang taka a lantir chu MNF sorkar mek hian thil nih dan turin hna a thawk ngai lo tih a ni.
Congress kha an ṭha e ka ti hauh lo, mahse an term a liam tawh a khatianga an rorel danah khan ka fak bik lo. Tun MLA inthlanah pawh hian Congress vote pawh ka tum chuang lo; ka sawi duh zawk chu tu pawh hi sorkar se thil hi a nih dan turin kalpuiin hma la ve ṭhin turin ka duh a ni. Chu chu party mal inbeihna emaw in fakna lam ni loin Mizoram mipui tan a ni.
Central leh State sorkar sum leh pai chêt vel dan hi mipui nawlpui tan chuan hriat ve vek sen pawh a ni lo, mahse a hre zawkten an rawn en fiah hian kan mark a chhe tlat zel hian hna kan thawh ṭhat lohzia a lantir chiang viau a ni.
Hmasawnna hnathawhna atan sum tam tham tak sorkarin loan puk tur pawh a ni ang. Mahse kan pawisa puk danah pawh hian thil fel lo lian tak a awm mek a ni. Sorkarna chelh leh tur tan pawh huphurhawm khawpin tunah hian leiba kan nei tam tulh tulh a, loan puk thei nih te hi kan sorkar hian inchhuan nan a hmang emaw tih mai turin kan hotute hian thu an la sawi fo mai a. Hetianga thu an sawi fo chhan pawh hi mipui nawlpui thluak suk an duh vang niin alang a, vote zawn duh vanga mipui bum tumna te pawh a ang hial tawh a ni.
Kum 2018 Congress sorkar kum tawp thleng khan Mizoram sorkarin leiba chêng vbch 7315 a nei a. MNF sorkar a rawn sorkar ve leh chiah a, kum 3 chhung lek (2019-2022) a kal hman a, Mizoram leiba chu chêng vbch 12533.08 ah a pung chho dawrh mai. Congress sorkar tlak hnu (kum 3 chhungin) chêng vbch 6000 dawnin Mizoram sorkar leiba hi a pung hman a, hei hi Mizoram tan phur rit dik tak a ni a, central lam aṭanga lo kal ṭhin Minister te pawhin zah lo takin Mizoram hi min ṭawng khum ta fo mai reng a nih hi.
- Vohbika Pu