ZIRSANGZELA PHENGPHE NUNNEM LEH KAN NUN

A châknate chawpa boral leh mai tur chhûnga kumhlun lo tura dùan hringfate hian, 'kumtluang atan' tiin biahthu kan inhlan ve ngei ṭhin tak a. A hlântu ber pawhin hmangaihna awmzia a hriat hmain chu thutiam chu bawhchhiatin a awm leh ṭhin si. Kan kumtluang hi tuktinpâr ai pawhin a hlu chuang  lo chu a nih ber hi maw! Rinawmna kawnga inchhuang ṭhin hnam te kha tuna kan rinawmna rinawm lohzia han dàwn chang hian hringnun hi ṭahpui a awl mang e. Hengte vang pawh hi a ni mahna, amah Pu Zirsangzela Hnamte pawh khan 'Phengphe nunnem leh kan nun' khaikhin chunga hringnun hi a lo ṭahpui tak hial ni!

Mahni ṭhatna tur a nih phawt chuan tia mi dang nek per lawp lawp duh, mahni sahmim puarna tur a nih dawn phawt chuan mi dangte ke chheh pawh pheh thlûksak hnial miah lo, Bible zirtirna letling chiaha mi dang aia mahni ṭha zawka inruat tlat ṭhin te hringnun; a ni, he hringnun ngei hi - phengphe nunnem, vahkhuai, tho leh hmiripa ten lungrual taka pârzû an tlânzâ lai nunzia nena tlir khawp chuan a depdê lulai em bawk a ni!

He planet zau takah hian, mahni inphata mi dangte tana thiamna leh theihna zawng zawng hlantu, mittui leh thlan tui nena mahni mihringpuite tana thawktute chu khawvel hian a theihnghilh ngai lo. An hnathawh leh thil ṭha tih avangin mite thinlungah hniak hnu fiah tak an hnutchhiat a, chu an hniakhnu chu tu ma nawhreh leh tihchhiat theih a ni ve lo. An lu-ah ropuina khum loin an nghawnga leng lo khawp pârṭhi awrh lo mah se an vui lo a, an zâm eih lo.

Keini zawng, min faka min chawimawitu an awm loh chuan kan ropuina a nêp a, pârṭhi min hlântu kan neih loh chuan kan hmingṭhatna a chuai leh mai ṭhin. Mite thinlungah hriat reng tlak hniak kan hnutchhiah ve lo a ni mai lo maw? Kan thil tih an hmuh hian buaipui zui tlakah min ruat lo em ni zawk le? Mi dangte aiin mahni kan langsar lutuk ṭhin em ni? Chu chu a hming kan lam fo, kan Pathian duh dan nia a lan loh tlat avangin chunglam khian mite hriat rengna bâwm luah tlakah min ngai lo a ni mai lo maw?

'Sem sem dam dam, ei bil, thi thi' ti ṭhin hnam, rinawmna leh dikna vawng nungtu, tlawmngai leh mi dangte tana inphal ṭhin hnam kha tunah chuan, amah Pu Lalsangluaia Renthlei hla ang deuh khan, 'Sem sem chân chân, ei bil, puar puar' kan lo ti zo ta mai em ni le? Pathian an ṭih bik em em vang ni hauh lo tih chiang reng chung hian kan Bible thu angreng ni si hian a nei apiang pek belhin an awm ta zel mai a, retheite retheihna erawh a ni têlin a nâ tial tial chu a nih ber hi maw! Mi hausa leh mi rethei inkar hi englai mahin, khawi hmunah mah a intlukin a zim tak tak ngai lo tih hi chu phat rual a ni lo. Mahse, keini aia dinhmum hniam zawkten lei rem an rah vena tur pawh a neinung nung a feng chhing chhingten kan lo ît a, kan lo vaihma hreh hauh lo ṭhin hi chu a lutuk deuh chu a ni lo'm ni? Kan tana Pathianin min pek ram, he ram zau lo takah hian, aw, tunah hian lungrualin han lêng ve ila, pangpâr kung pakhata thilsiam hrang hrangten indîp lo leh lungrualna zion tlang chunga chuang ang maia pârzû an dâwnzâ ang hian han awm thei teh reng i la aw...

'Theihchang ve se lên thiaman,

ṭuangṭuah pâr an vul lai ni;

Chhunrâwlah va ring i la,

Hringnun sual hnutiang chhawnin.'