Lunglei boruak a ngaihnawm

Tunlai chu Mizoramin Lunglei lam a hawi ṭhup a ni ber a, kumin kum tawpa General Election hlimthla hmasa chu Lunglei Municipal Council inthlanah hian a lo lang dâwn a ni.

Mi ṭhenkhat chuan he inthlan result hian MLA inthlan a nghawng an ring lo a nih pawhin ngaih ṭhat phahna emaw ngaih ṭhat loh phahna emaw a ni dâwn tho tho a ni.

MNF party aiin Congress leh ZPM an phur zawk an ti a, engpawhnise MNF tán chuan an chak lo a nih chuan an LMC candidate thiam loh ni loin an MNF MLA te thiam loh zawk a ni ang.

Lunglei kawng chhia pawh au chhuahpui ngam lo khawpin Aizawl lama an pute tih lungawi loh an hläu a, tunah Lunglei tana auna remchang a awm leh ta chiah dawn, eng ang pawhin au mahse Covid laia au ngam lo, Lunglei mipui tana ding ngam lote tán chuan tuna an au hi awmzia a nei tawh lo a ni mai lo maw?

Han sawi ta zel ila Congress tán chuan tun hi insiam ṭhatna last chance a nia. Congress hian LMC hi an lâk theih ngat chuan an rawn comeback thei ang.

Congress hi LMC ah pawh an chet chhiat leh chuan an zam chhe zo ang a, MLA inthlan hi an tán a harsa dâwn a ni. Congress lam thapui tak tak thawha Aizawl aṭanga an ri phei hut hut hi an tih tur dik tak a ni.

Aizawl lama hian in kaih thawhna turin Lunglei lam result ṭha an mamawh a ni.

Lunglei ah an chet ṭhat chuan an tho leh thei dâwn a ni. Lunglei ah an chet chhiat chuan Congress hi Northeast State dangte ang bawkin an hun a tawp tawh dâwn a ni.

ZPM tán chuan chawm bawka hawp bawk hun a ni. An chet ṭhat chuan MLA inthlan an tán a huphurhawm tawh lo sawt ang. An chet chhiat pawhin Party 3 zinga a te ber an nih avangin chhuanlam chhe te an nei. ZPM tán chuan Golden Chance a ni.

ZPM hian LMC hi an lâk chuan MLA inthlan pawh hi bel chhunga sâ ang a ni thei a, Lunglei piah lamah MLA nei lo mahse Lunglei District chakna hian an sorkar zo mai ang. LMC inthlan hi party 3 tán a pawimawh hle a ni.

- KC Lalngilneia