ZMC building ngaihsak a ngai e!

Fur ruahtui a tla a, tam pawh a la tla hman lo. Kawng min leh chhiatna hrang hrang kan hriat hmaa kan hriat hmasak chu Zoram Medical College chung phui lo a ni a, a lungchhiat thlakin a zahthlak takzet.

Mizoram Pradesh Youth Congress Committee chuan thuchhuah an rawn siam zui nghal zat a, Mizorama kan damdawi in lian leh langsar tak chung pawp hi pawi an tih thu sawiin, 'siamṭhat nghal ni rawh se' an rawn ti.

MPYCC chuan ZMC chung chu siam ṭha nghal turin Mizoram sorkar an phut a, kan ram rohlu medical college hi uluk taka enkawl turin Mizoram sorkar an phut thu an tarlang bawk.

Inchung phui lo video a rawn darh rual khan mi tam tak chuan dem tur an zawng nghal a, a chhan ngaihtuah pawh an awm laiin mipui vantlang chuan siamṭhat thuai ni thei se tih kha an duh dan a ni, siamṭhat duh thuah chuan MPYCC leh Mizo mipui ngaihdan a inang ngeiin a rinawm.

ZMC hi Mizorama Medical College kan neih chhun a ni a, hun rei tak chhung tluk leh din fawma a kal hnuah kan chhawr thei ta hram a ni tih chu kan hre vek awm e. Ar vulh nan leh sipai dah nana hman tum leh hman a nih dante pawh kan la theihnghilh hman lo.

A bilhah a tho tawh lo miau a, a buil­ding tam tak a ṭha tawk lo, a pawn lam a ṭha tawk lo a ni satliah lo a, a chhung lam pawh a ṭha tawk chuang lo. Damlo tan hahdam taka awm theihna tur ni si kha mit ti kham em emtu a khat nuk mai a ni.

ZMC chung­chang­ah MNF leh MPCC ten a ti hlawhtling leh bul tumtu nih an inchuh ṭhin a, tu ti hlawhtlin leh bul tum pawh chu lo ni se an party suma an siam a ni lo a, mimal sum an hmang hek lo - mipui sum hmanga siam, thuneihna an neih laia an tih puitlin mai a ni.

Chuvangin, a buil­ding ṭhat tawk lohzia leh kan duh khawp lohna thil kan sawi a nih chuan MNF leh Congress te hi dem tur kan neih chu an ni mai a, fak tlak leh fakna lai tur a awm a nih pawhin anni pahnih bawk hi an ni leh mai awm e.

Hun kal tawh a hnuhkir theih loh, a lo la thleng tur erawh kan ruahman lawkin kan inbuatsaih thei. ZMC kan sak leh enkawl danah mipui kan lungawi tawk lo tih chu tlang hriat a ni a, a enkawl zui zel tura kan duh thu vote hmangin kan thlang mai dawn a ni.

Eng party pawhin sawrkarna lo siam se, thuneitu chu tu pawh ni rawh se. Mi rethei leh chanchhe zawkte tlan luhna hmun, sum tam tak sen ngai loa kan in enkawl ve theihna a nih avangin ZMC hi ngaihsak a ngai a, duat leh dimdawi taka enkawl a mamawh takzet.

- Lala, Aizawl