Lungleia hla inchuh phena thil awm

Zaithiam leh hla phuah thiam mual liam ta Lalramnghinglova kha lo tho leh ta se a hmangaih Mizoram tana a hla phuah hmanga Political Party inhnialna awm hi a thin a rim hian ka ring ṭhin. "Kan ram thlaphang" tih hla phuah hunlai hi han dawn kir ila, he hla Lunglei Municipal Council inthlan dawna inhnialna chawk chhuaktu hi engtika phuah nge tih a lo lang dawn a ni.

Lalramnghinglova hian he hla hi kum 1992 kum tawp lamah a phuah ṭan a, a rilruah a khat liam ve ngang a ni ang a phuah uluk hle a ni, 1993 April ah khan a phuah zo ve chauh a ni. He hla hi ram leh hnam veina leh inpekna hla (Patriotic song) tiin kan dah thei ang chu.

1992 khan "Aw ka ram, Mizoram, zan mut chhin a hun tawh lo," a lo ti a, "Retheite retheih chhan, hausate hausak chhan, Dawn chiangin lung hi a awi mawlh lo," a lo ti tawh. A thu mawi em em chu, "Ram hmangaih inti siin hlemhletnain an khat, Tu nge ram riangte tungding thei ang?" tiin zawhna a zawt a, "Ram hmangaihtu derte huai taka do ngam turin, Chanhaiten min au lo chhuak ru," a ti a ni. 1989-1998 chhung hi Congress sorkar lai a ni a, a phuahtu hi ram rorelnaah a lungawi lo a nih chuan roreltu chu a hriat mai a ni.

He hla hi Lalenkawli Pautu hian a sa thiam em em a, July 19, 2020 khan YouTube-ah a dah ṭan a, tun hnaiah a viewer an pung chak em ema mi 5,50,000 chuangin an en tawh a ni. He hla a rawn lar chhuah lehna erawh chu 2018 inthlan dawn khan a ni a, ZPM boruak rawn siam chhoh khan he hla hi an thlang fuh em em a. Rebek Lalruatfeli, Dawrpui tleirawl in a sa a, Oct. 24, 2018 khan YouTube ah an dah daih tawha mi 8,60,000 chuangin an ngaithla tawh a, Enkawli aiin a lo dah hmasa bawk nen ngaithlatu pawh a ngah hle a ni.

Hetiang hla ṭha hi Party Politics hla chuam atan miin an hmang a nih pawhin a nachang an hria, tih ni se inhnial bur burna atan hmang lo ila. Enkawli tak pawh hi a lainatawm a, a thiam loh awm lovah inhnialna chawk chhuaktu angin a thang ta hial mai a, a zialo hle a ni.

MNF in an hla chuama an hman tak 'Kan ram hi kan ram a ni' tih hi C Lalṭanpuia, Sialsuk phuah a ni a, MNF tana a phuah a ni hranpa lo. Lalsangzuali Sailo-in thiam takin a sa a, a thluk a nalh sia a hla thu a ṭha bawk nen thinlai chhungril hi a fan phak a ni. 1966-ah ram a buai a, he hla hi buai hma hret 1964-65 chhoa a phuah niin an sawi. Lalṭanpuia hi chuan zalenna pumhlum 'Total Independence' thlir chungin he hla hi a phuah a, Political Party pakhat tana a phuah a ni lova, mahse MNF in an ta chei a, a tawpa 'Kan ram hi kan ram a ni' tih tura Lalsangzuali sak sual palh, 'Zoram hi kan ram a ni' tih hla hi an ta neih ta a ni. MNF hi an fing hle a ni.

Tuna hla inchuh ni thar leh ta "Kan ram thlaphang" tih pawh hi Lalramnghinglova hian ZPM awm hma daiha a phuah niin ZPM tana a phuah a ni lo tih hi a chiang a. ZPM hian 2018 inthlan dawna thiam taka an ta neih avangin 'ZPM hla' tiin an pe mai a, a sa lartu hmasa Rebeki aia zai lama hmingthang zawk Enkawli'n a sak hnu pawh hian ZPM hlaa ngaih a ni a, LMC lama Enkawli'n Congress a ṭan tak avang hian a hla hlutna leh mawina hi a dal chuang lo.

Enkawli'n Congress Campaign hla atana a sak erawh inhmeh lohna lian tak a neia chu chu Congress sorkar thlir chungin Lalramnghinglova hian, "Dik lote hnawl ngam tur leh, pamhamte endawng ngam an, Kan ramin min au e, i chhang dawn em?" a ti a, hnawl tura a tih Party (a phuah hun 1992 & 1993 hi Congress hunlai a ni)campaign naa sak chu khawhar ina 'Happy Birthday' tih nen a inhlat lo a ni.

- Maremmawia