LIRTHEI INTLANCHHAWK HIAN HUAM LOH NEI SE

Aizawl khaw chhunga lirthei tawt tihziaawmna atan lirtheite intlanchhawk tir a ni a. Mi tam takin lirthei dang kan lei belh phah a, lirthei zuartu tan chuan a va lawmmawm dawn em. Kawng a zauh phah chuang si lo a, engtikah emaw chuan lirthei a tawt leh nasa dawn tho mai. Natna atana nachhawkna ei ang deuh a ni a, a damdawi tak erawh ei kan tum lem hlei law.

1. Intlanchhawk huam chin siam vawikhatna: Intlanchhawk khan a hma kha chuan AMC huam chhung pumpui kha a huam tawp mai a. A dar bi pawh awm lo khan kan awm mai a, Covid-19 hripui lo len takah khan a dar bi kha tuk a ni a, a fuh ta phian a. Zing dar 9 te, dar 9:30 te aṭanga inṭanin tlai dar 5 te, 6:30-ah te a tawp ta a, a ziaawm ta phian. Pisa kai duh tan zing lamah chuan Pisa kan thleng hman a, tlai lam erawh dar 6:30 a nih hnu hian a buaithlak ta deuh a.

2. Khaw daideng huam lo se: AMC huam chhung pawp mai he intlanchhawkin a huap hi a fuh lohna leh harsatna a tam hle. Intlanchhawk tum ber chu lirthei tawt tihziaawm a ni a. Zemabawk aṭanga ITI inkar te, Rangvamual lam te, Saikhama kawn lam te, Durtlang lam te hi chu lirthei a tawt ve hauh lo, mahse, tlan phal a ni chuang lo.

Chuvangin, Chhimlamah Kuli­kawn, chhak lamah Pi Pangi peng (Upper Republic), hmar lamah Durtlang tan Green Wood Hospital, Zema­bawk lam tan Vishal dawr te hi pelh phal lo mai se, a va ṭha dawn e.

3. A huam hun: Zing lam dar 9:30 aṭanga inṭan hi a ṭha viau, tlai lam erawh pisa ban rual ni thei se a ṭha hle ang.

4. Hmun dang lirthei: Engemaw avangin Aizawl khaw pawn lirtheite’n Aizawl an rawn zin chang a tam a, tlai dar 6:30 hma Aizawl an lut thei lo hi an khawngaihthlak hle. An awmna khua VC/ Traffic Police aṭangin lehkha rawn la se la, an ni mamawhna avanga Aizawl lokal te hi chu an tam tham lo a, ngaihhnathiam dan dap ni se, a ṭha khawp ang.

5. Zin hawn lirthei: Aizawl lirthei pawh an zin haw ni a lo awm a, khaw daiah dar 6:30 nghah ngawt kha an buaithlak viau bawk. Pastor pakhat pawh an tlan loh ni a nih avangin a zinna aṭangin a zan haw ngawt tawh a, hetiang hi an tam ang. Zana lirthei khalh vak hian chetsual pawh a thlen thei a, a him lo. Hetiangho tan pawh an zinna khaw VC/ Traffic Police aṭangin lehkha lo la se, remruatsak an ṭha hle.

6. Khawpui thar kan mamawh: State khawpui Aizawl hi han sawn rual a ni tawh lo, han sawn dawn ila, a awmna thar tur hmun atan zangnadawmna tur a nasa em em dawn, a ngaihna a awm tawh lo. A tih theih awmchhuan chu Aizawl hian State khawpui ber a nihna hi chhawm se la, District khawpui a nihna erawh hi chu sawn daih ni se. Seling tlang dungah emaw, Aibawk lamah emaw. Tichuan, district Office ho hi an chhuak nguah nguah ang a, Aizawl hi a thawl hawk mai ang.

Chu chuan ṭhatna tam tak a nei ang. (1) Lirthei tlan khawm ṭuk ṭuk a ti nep ang a, (2) District Capital thar tur tan hmasawnna tam tak a siam ang, (3) Sumdawnna kawng a hawng ang, (4) Hnathawh tur a pung ang, (5) Mi zawng zawng pankhawm Aizawl a nihna a nep deuh ang a, (6) Aizawla inhmun lo ram man sang fur fur tur a ziaawm ang, (7) Aizawl a lo thianghlim phah deuh ang, (8) Zirna leh hriselna lamah kan ziaawm phah bawk ang, (9) A dang tam tak a la awm bawk.

Thuneituten heng hi khawngaihin ngaithuah se, mipui phurrit chhawk­na a ni dawn a, ava lawmawm dawn e.

- Prof. JV. Nunchunga, Durtlang Leitan