Aizawl in Lunglei Vote a belh lo

Lunglei Muni­cipal Council inthlanah Aizawl aṭangin political party hruaitu an tleh phei nasa dul dul hle a, Lunglei hian Aizawl thusawi an lo awih a nih chuan mahnia ngaihdan nei rual nia ka ngaihna kha a bo ang. Ka rin dan mai mai sawi ta ila Aizawl campaign avang hian Lunglei hian an vote tur an thlak ka ring lo.

Keifang lamah VC Bye Election a awm khan Party pakhat chuan lirthei tam tawk hruaiin traffic jam mup mup khawpin an han inzui tawh a, Keifang vote thlakna tihdanglam khawp an awm lo tih chu a result kan en khan kan hmù ta a ni.

Lunglei lamah hian Aizawl hian ka theih tak emaw tiin an party rawng huai an va ser kual vêl chu a nia, Lunglei mipui rilru an thlak pawh ka ring lo.

Kan Lunglei ṭhianpa chuan, "Pawisa sem langsar chi kha a awm lo a, pawisa sem lo langsar tak tak a awm e," a rawn ti. Ka zawh chian chuan mi ṭhenkhat inthlan hmaa maksak tak taka Party awmna thlak an awm a, mahni chhia leh ṭha hriatna vanga insawn ni loin pawisa sem langsar lo chi a thleng a ni mai kan ti e, Lunglei lam chuan a ti. Lunglei lam chuan an khaw mi Aizawl ho lo phei hnua Party inlet chu an lo dah sang vak lo a ni.

Lunglei khaw tlangval ni ila Aizawl lam rawn phei sup sup hi hnawk ka ti ang. Aizawla AMC inthlan dawnah Lunglei lam an rawn phei kan hre lo. Aizawl hian Lunglei hi kan nau lutuk a ni.

Lunglei tán chuan vote tur a chian tawha hnu Aizawl mi boruak siam tum chu mi hnawksak, Traffic ti jam mai an ni.

- Lalhnehzoa