THLAI THAR LEI THEI SORKAR MIZORAMIN A MAMAWH

Kum 1996 lai khan Congress sorkarin Mizoram loneitute hnenah sawhthing chin an sawi mawi a, ka pa ram 1947 a fu huan atana siam chu a hnu kum 50 hnuah sawhthing chin nan kan va vat ve a. Thing leh mau hmun ngaw a lo ni ta hial a, kum 50 lenga upa, ram rem tak ni chungin ka Pa hi Primary zirtirtu hnathawk (1928-1955) a ni.

He ka pa ram hi 1996 khan kan nu hovin hlawhfa hlirin ṭin 7 vel hmun zet tur chu an lo vat duai mai a. Keini chhung pawhin theih tawp chhuahin ṭin 7 hmunah hian sawhthing kan ching khat vek a. Ram upa kum 50 leng ram rem takah hian sawhthing kan ching khat a. A tak em em mai a, a kum leh 1997-ah hlawhfa tam tak ruaiin kan cho ta vek a, hlawhfaho hnenah hian a lei kai a fai thei ang bera ti tur leh a zung pawh pawt fai vek turin kan hrilh ngun em em a ni.

Kan check deuh reng a, a fai tawk hle hnuah bag-ah kan khung a. Aizawl Zuangtui a leina hmunah truck motor 3 in kan phur phei a, kan hmaah truck ding an lo tam tawh hle a, keini ta chu a tuka teh turin kan haw san ta a. An han en chuan bawlhlawh nawi leh lei a tam ang, a zung te in ti fai lo ang, a tam ang tih chuanlamin quintal khatah Kg 20 zel an cut ta ringawt mai a, ka thin a rim hle mai.

Kan chinna hmun North Chaltlang khua-ah a fai thei ang berin kan check sa vek si “midang ta pawh kan cut vek” an ti ringawt a. A leitute hi Mizoram sorkar hnuaia MAMCO te an ni a, an director pawh kan MCS pui a ni chungin an cut ta tho a ni.

Tin, a man pawh hi thla tam tak min pe thei lo a, a tawp a tawpah UCO Bank-ah kan la ta hram a ni. Lo vah man, a thlawh man, a chawh man, a tih fai nen, buara ngaihtuah ngai nen, a phurhna tur truck zawn hmuh har nen, a rate hi quintal-ah cheng 500 chauh zel a ni. A ṭha lo ber chu quintal khatah Kg 20 zel an deduct hi a ni; a tha nat thlak ngei mai.

Ṭum khat chu MNF President Pu Zoramthanga’n, “In kawtkaiah sawhthing cheng….. in kan rawn la zar zar ang” a tih lai TV-ah vawi khat chu ka hmu a. A sawi ang hian a ti ta nge ti ta lo chu kan hre ṭheuh awm e.

Vawikhat leh chu aieng chin hi an rawn sawi mawi a. Aieng chi ṭha ber chi kan lo ching ve leh vak a, a tak ṭha leh em em a. Amaherawhchu, a sawi mawitu sorkar hian a hralhna tur min ngaihtuah pui leh chuang miah lo. A tawpah ka mangangin Kolasib DAO ka be ta chawt a. Ani’n tlawmngaih chhuahin quintal 10 chu man ṭha pangngai takin min lo lak sak ta a, ka lawm hle mai.

Kan ram hruaitute hi tunge kan rin tak ang? Tuna ZPM hotupa Pu Lalduhawma hian hman aṭangin ZNP a nih lai aṭangin thlai thar lei hi a lo buaipui ngar ngar tawh a. Tunah ZPM hotupa a nih hnu pawh hian tun hmaa a sawi ang thoin Budget-ah thlai leina tur dah a ni ang a, man hre lawk sa vekin loneitute kan chin tir ang tih a la sawi reng a, a thupui ber a la ni fan a. Chuvangin, tun ṭum inthlan turah hi chuan ZPM hi enchhin ngam niin ka hria.

Thlai thar lei thei Party ka support chhan ber chu kan ṭhalaite thawh tur nei lo lutuk sual kawng zawh ta mai mai an tam tak em avang hian heng thlai thar hralhna ṭha a awm chuan kan nula tlangvalte hi hna thawk peih lo tur an awm lovin ka ring. Sawhthing hi a hralhna rate a ṭhat chuan chhung khatin cheng nuai 40/ 50 hmuh a harsa viau lo ang. Chuvangin, thlai thar lei vei tlattu Pu Lalduhawma pawl ZPM hi ṭum khat chu chance pek phawt hi a ṭul tak meuh a ni.

Thu dang pakhatah han kai lawk ila. Tuna Congress President Pu Lalsawta hi mi rinawm rintlak inren mi, mi taima a ni. MCS hmasa ber (1974) Top 10 ho Delhi a 1975-1976 kan training ho bakah Lunglei DCSO a nih laiin kei Tlabung SDO ka ni a, kan in hre chiang tawn hle.

Pu Sawta hi mi tak tak a ni. ZPM nen la thawk ho thei se kan ram hmakhua chu a ngaihṭhat thlak hlein ka ring.

- S.Lianhrima hauhnar