Politics inpuhna chhui chian ngai
Assam lam mi Smuggler a nih vanga jail pawh tang tawh Abu Mazumdar chu Kolasib-ah Minister pakhat inah chaw a ei lai thlalak kan hmu a, a rik hluai hnu khan a reh ta vang vang a. Mizorama buhfai supplier lian, Assam sorkarin Smuggler an tih ni lawi si leh kan sorkar inlaichinna a awm leh awm lohte hi chhui chian viau a ngai ta a ni.
Ngaizawl khaw kawngpui laihah Class I Contractor Pi Collin Lalsangpuii hmingin midangin hna an thawk a, a thawktu Pi Romuanpuii Zadeng lakah Speaker-in nuai 100 a la tih Voice Record a leak out a. Assembly Speaker Pu Lalrinliana Sailo in Assembly Budget Session a kaihhruai chu duh lovin eptu pawl pahnih, Congress leh ZPM Member-te chuan Assembly House an chhuahsan kha a la rei lo viau a, cheng nuai 100 kha engtin nge a awm tak zel?
Congress sorkar lai pawhin hetiang chi hi politics inpuhna hi a awm ṭhin a, ZPM leh BJP pawh hi sorkar ve ta se miin chhe tak tak hian an puh ve tho dawn tih hi a chiang a ni. Hetiang a nih chuan an puhna hi a dik nge dik lo? tih hi chhui chhuah zel a ṭul a ni.
Mipui hian thu sawi tawp hlen ta angin kan ngai tawh lova, internet-ah hai chhuah leh tur a awm tho si a, inpuhna rapthlak tak tak hi a reh zel dawn chuan a fuh lo a ni.
Hman deuh khan 1:45 tihte kha a lar a, chumi nena sawi zawm theih turin Assembly House zahawm takah khan kan hming lemte kha kan inphuah sak a. Tuirial Bye Election-ah khan Election Campaign tawp hnuah khan 'Feh Kawng Bo' te kha kan awm a. Politics kaihhnawih inpuhna hi chu Politics huang chhungah hian a zuih ral ta zel nge? tihte hi sawi chian a ngai a, mipui hian thu dik hriat hi an phu a ni.
Sakawrhmuituai Sky Walk chungchang pawisa chingpen tamzia te hi le... Horticulture Department hnuaia pawisa chingpen CAG Report te phei kha chu chhui ngai loa lang sa a ni hial a, a tawp zel dawn em ni? tih hi ngaihtuah a thui.
MNF leh Congress dang lo se, ZPM leh BJP pawh dang chuang lo se, eng party pawh inpuhna chungchang hi chu zep nei lo hian sawifiah mai ṭhin rawh se.
Mipuiin rilru fim takin kum tawp inthlan dawnah hian kan hre thei dawn a, nasa taka an puhte pawh hi an lo fihlim daih thei a, an puhna pawh a lo dik thei bawk a ni.
- R Lalkhawngaiha