JointT ENTRANCE EXAMINATON (JEE) MAIN & JEE-ADVANCED CHUNGCHANG

Joint Entrance Examination (JEE) Main hi All India Engineering Entrance Examination (AIEEE) tih ṭhin a ni a, kum 2013 aṭangin JEE-Main tiha thlak a ni. A tirah chuan Central Board of Secondary Education (CBSE) in a conduct ṭhin a, mahse kum 2019 aṭang khan National Testing Agency (NTA) in a conduct ta a ni. JEE-Main hi India ram chhunga Engineering, Architecture leh Planning College-a Undergraduate Course chi hrang hrang zirturte thlanna tur Common Entrance a ni. Paper leh pen hmangin exam hi buatsaih ṭhin a ni a, mahse kum 2019 aṭangin online in computerized-based exam a ni ta a ni.

JEE-Main hi kum 2019 aṭangin kum khatah exam hi vawi hnih neih ṭhin niin, Session 1 leh Session 2 ah ṭhen a ni. Zirlai pakhatin a duh zawk zawkah exam a pe thei a, a pahnih pawhin a exam kawp thei. A pahnihah a exam kawp chuan a tih ṭhat zawkna kha lak tur a ni. India ram pumpuiah kum tinin zirlai nuai sawm pakhat (11 lakhs) velin exam an pe ṭhin a. Kum 2014 khan mi 14 lakhs dawnin JEE-Main hi an exam a, kum 2022 khan 11 lakh an tling lo hret a, kum tina exam hi tam hret hret àwm hi, an tlem hret hret zawk a ni.

JEE – Main ah hian Paper pahnih- Paper 1 leh Paper 2 a awm a. Paper-1 hi BE/B.Tech zir tum te tan a ni a. Paper -2 erawh hi chu Architect leh Planning zir turte tan a ni. Paper 1 leh 2 te hi exam kawp theih a ni, Paper 1 hi online-a computer hmang chauha exam theih a ni. JEE- Main ah hian Subject pathum- Mathematics, Physics leh Chemistry te a awm. Subject pakhat hian mark 100 theuh puin, a pumpuiah total mark chu 300 a ni. India ram khawpui hrang hrangah hmun 286-ah Exam hi ṭawng hrang hrang 13 hmanga buatsaih ṭhin a ni. Question-te hi multiple choice questions leh fill in the blank (numerical type) vek an ni a. Question pakhat chhan dikin 4 mark a keng a, pakhat chhan dik lohah 1 mark paih tur a ni.

Mizoram sawrkar hian BE/B.Tech leh B.Arch zirna seat hi Govt. Of India (Central Pool) aṭangin 121 seats vel kan hmu ṭhin a. Hei bakah hian NIT Mizoramah hian Engineering Branch hrang hrang 5 a awm a, Mizoram University ah Engineering Courses chi hrang hrang 7 a awm bawk, chungah te chuan Mizoram naupang tan luh theihna chance sang tak a awm bawk. Mahse, kan seat neihte hi kan luah khat zo lo hle. Engineering branch hrang hrangah seat 200 chuang nei thei kan nih laiin, kum khatah mi 80 vel bak Engineering hi zir kan awm meuh lo a ni. BE courses bikah chuan BE (Civil) kan bawh deuh a. B. Arch hi Central aṭangin kum tin 5 seat min pe a, chu chu kan zirlaite'n kan thlang duh leh deuh bawk a ni.

JEE- Main hi kum 2023 atan Session 1-na hi zawh fel tawh a ni a. Ni 24, 25, 29, 30, 31 January and February 1, 2023 ah tluang taka conduct tawh a ni. Session 2-na hi ni 6, 8, 10, 11, 12 April 2023 ah neih leh tur a ni. Mizoramah exam centre pakhat chauh kan nei a, chu chu Aizawlah niin a exam Centre hming chu iON Digital Zone, ITI Mualpui a ni. Hetah hian a rualin mi 180 velin online hmangin an exam thei a. Exam tur zirlai an tam deuh chuan NIT Mizoram, NIELIT Zuangtui leh Mizoram University ah te pawh online exam hi kalpui theih tho a ni.

Kum 2022 JEE Main Paper-1 a Mizoram aṭanga ti ṭha ber chu Simon Lalremsiama Shangpliang Falkland Veng niin 99.114 percentile a hmu pha a. India ram pumah 7,846-na a ni pha, Schedule Tribe exam zawng zawng mi 31,191 zingah 38-na lai a ni pha a ni. Ani hi JEE Main Paper-1 ah Mizo naupang zingah chuan tun thlenga la ti ṭha ber nia hriat a ni.

Tin, JEE-Main hi JEE-Advanced exam thei turte thlannaah hman nghal a ni bawk. JEE-Main-a mark hmu sang mi 224000 te chu JEE-Advanced exam tura thlan chhuah ṭhin a ni. India ramah hian Engineering College ṭha chungchuang, Indian Institutes of Technology (IIT) hi sawmhnih pathum (23) a awm. Chung Institution a lut turte thlanna chu JEE-Advanced an tih chu a ni.

JEE-Advanced ah pawh hian Paper 1 leh Paper 2 a awm a, paper pahnih a exam ngai a ni a. English leh Hindi chauha exam pek theih a ni. India rama IIT awmna Zone chi hrang pasarih ten an in-conduct chhawk a ni. Kum khatah vawi khat chauh online-in exam hi neih ṭhin a ni. Ni 4th June 2023 ah JEE Advanced hi exam tur a ni. IIT-ah hian seat awm zawng zawng zat hi 11279 a ni. Exam Centre hi Aizawl ah a awm ve tawh a, an examna hmun chu iON Digital Zone, ITI Mualpui a ni.

Mizo zirlaite zingah JEE-Advanced exam pha hi kan awm ve fo a, mahse tling hi kan awm ngai meuh lo. Chutiang a nih laiin tun hnaiah nasa takin hma kan sawn a. JEE-Advanced ah hian kum 2020 ah mi pakhat tling kan nei a, kum 2021 ah mi 3 leh kum 2022 ah phei chuan mi 8 lai an tling a, heng zinga 5 hian IIT hmun hrang hrangah tunah BE/B.Tech an zir mek a ni. Kum 2023 ah phei chuan 10 chuang tling thei turah i beisei phawt ang. IIT ah hian Company hrang hrangten Campus placement kalpui ṭhin a. Zirlai tam zawkte chu an zir zawh veleh an thawh nghalna tur hna an hmu lawk ṭhin a ni.

- Dr Zirlianngura Govt. Zirtiri Res. Science College