Fak tlak ṭhalai an la awm
Ṭhangtharten Mizo nun ze mawi an tla chham tial tial an ti a, a dikna chen pawh a awm. Aia upa zahna chang pawh hre lo, zirtirtute zahna chang pawh hre lo an pung zel a, mahni chawmtu nu leh pa ngei ngei zahna chang hre lo pawh an awm hial!
Mizo nuna pawimawh tak aia upa te zahna a tlakhiam mek lai hian tlawmngaihna pawh a tla hniam zel a, mahni dikna (rights) kan ngai pawimawh tial tial bawk. Ṭha lai aiin ṭha lo lai hriat tur a tam a, Mizo nula leh tlangval an thatchhe tial tial nite pawhin a lang.
Khawtlang leh Kohhran hnatlanga thawk chhuak ngai miah lo, zahna chang hre si lo hi veng tinah an tam hle. Veng ṭhenkhatah phei chuan thlan laih dan inzirte a ngai ta hial a, Mizo tlangval zingah hian thlan lai lo emaw mitthi lumennaa la tlaivar lo hi eng zat tak awm ang maw? An awm ṭheuh hi ka ring ta hial.
Chutihrualin, zirna lamah nasa takin hma kan sawn a, hnathawh tur ṭha awm chhoh zel avangin sum lak luh pawh a tam. Ṭhalai zinga sum la lut tam an awm avangin pawl anga inhlawh emaw hnatlan emaw pawhin tharum thawh an huphurh tial tial bawk.
Hriat tel atana ṭha erawh ṭhalai zawng zawngin sum an la lut tam vek lo a, thla bia hlawh la lo veng tinah an kat nuk.
Nu leh pa chawm hlawm hnathawh nachang hre lo ṭhahnem tak karah mahni theih ang tawk pawh thawh hreh lo an awm ve ṭeuh tho. A bik takin thingtlanga aṭanga lehkha zira Aizawla awm zingah hun awl neih apianga inhlawh ṭhin an awm a, Mizo ṭhalai zinga mahni inhlawhchawpa zirte hi fak tlak chu an ni.
Chutihrualin an tum ber chu hna ṭha tak thawk tura lehkha zir a ni a, an hmachhawp lian ber hi hun harsa an tawh lai pawhin an theihnghilh loh a pawimawh hle.
Mahni nu leh pate harsatna chhawka hna thawk ṭhinte hi an fakawm a, sorkar hna emaw mimal hnuaiah emaw an thawk a nih pawhin an tawnhriat ṭha tak avangin chhawr tlak tak an nih pawh ka ring tlat a ni.
- Lalrinpuia