Kan ti nek nek a, hun lahin min nghak lovin a liam zel si a, hei MLA Inthlanpui kum chu kan lo thleng leh ta chu a ni dèr mai a, eng ang rilru puin nge kan inthlan ang tih pawh hriat thiam a har fut mai a. Covid hripui leng atalangin, ram chu sawi loh, mahni chenna khua ngei pawh ngaihtuah fum fe hman lovin, mahni chhungkaw damna ngawr ngawr ngaihtuahin kum hnih linglet ṭhak chu kan hmang liam hlawl a, khua a veng ve ta deuh e tih kumah kan inthlang dawn chu a ni leh ta der mai si a, rilru put thiam a har duh fut awm e.
Tun kan sorkar hrawn mek hi han thlir ta ila, an sorkar tirh kum kha chuan Congress NLUP sum hnutchhiah hmang khan kawngpui pawh an chei mam ṭha hle a, mipui pawh kan lawm hle chu a nih kha. Khatiang zel khan kan kal dawn emaw tih laiin khawvel pumah hripui a leng ta chiam mai a, eng dang ngaihtuah thei lo leh cháng dang kan hman lek lovin hripui leng do a ngai a, an sum neih ang ang pawh mipui dam khawchhuah nan hman ral zel a lo ngai ta si a, hmasawnna hna pawh a muhil ta ṭhup mai a ni ber a. Anni, sorkarna chelhtu tan pawh ram hmasawnna lam a chak lo tia mi relna pawh, hnara hnuaiah phatna a bo love tih ang hrimin phat mawina tur a awm zel zawng a nih hi! A sawiseltute tan pawh han mausam lutuk ngaihna a awm bik awm lo ve. Mahse hei, hripui reh hnuah Budget an pharh ta chu a ni a, heta ṭang hian an nihphung chu a chiang mai turah ngai ila, chutihrualin kan mithiam, budget chinchang hriate pawhin beng lo chhi ngun hle ula a ṭha awm e. Heta ṭang hian an tun hnu tur chu lang turah ngai mai ila a ṭha awm e.
Party lian dang Congress party lah hi Central lamah an zuih viau mai si a, chutih rualin kan ramah ngei pawh hian an sorkarna a la rei lovin, an sorkar lai khan an induhsakin, an pumpui lam kha an hmangaih ve deuh a ni ang chu, kan la chhangkham angreng viau mai bawk si a. Mahse heti chung hian member chu an la ngah fut hmel a, rin aiin an la lian viau chuan a rinawm a, an hruaitute hian hma lak an thiam viau chuan chak mai thei pawh an la nih hmel fut awm e. Mahse, ‘ṭhat loh theih lohna bawm’ an tih mai khan mi ngaihzawn a hlawh vak awm lo ve chu a tih theih, a hming hrim hrim pawh a chapo deuh tlat!
Party lian dang ZPM hi eng tak ang ang maw? Mipui mimir hi chuan han ngaihzawn an tum viau chuan a lang a, an CM candidate thleng pawh hian mi duh chu an hlawh viau awm e. Thingtlang lamah pawh hian a ruka an party lo ṭantu hi an ṭhahnem fut chuan a rinawm. Mahse, hetih lai hian an thu leh hla an thlak tam deuh a, a changin kohhran hi kan unit te an ti a, a chang leh unit din an sawi mawi a, an thu an hla hi hlîn tur ber hriat a har deuh a, lo tling ta pawh ni se CM nge lal anga Valupa tih pawh hriat a har a, an inrelbawl dan hi mipui tam ber hian an la thal thiam lo deuh a ni awm e; pawh a tih theih. An thiam viau chuan mipui, rorelna ṭha duha rilṭam hi an hui puk thei mai chuan a rinawm.
Hetiang hi kan party lian pathumte nihphung a nih laiin party chhunga awmte pawh hian kal dan an thiam vak lo fo bawk. Tuna sorkar mek party pawh hi thingtlang lama an hruaitu tam takte hi chuan an party chhunga mite hi duh bik leh duh loh, kawm serh deuhte an nei niin an sawi ṭhin a. Hei hi chu ruling zia ve pakhat a niin, tun sorkar hnuaiah hian a tam deuh hlek nia sawite a awm bawk a. Engpawh ni se, rorel lai pawh hi an inenfiah a, an insiamṭhat viau loh chuan an tan sorkar lehna chance hi a sang hranpa vak chuan a rinawm loh. Sorkar department aṭanga work lo kal ang chite, hun tlai tawh lama party induhsak nana lo pawh pen ang chite pawh tun sorkar lai hian an nei nual nia sawite pawh a awm a, hengte hi a nih tak tak phei chuan inthlanpuia an chance tibotu a ni thei mai ang tih a hlauhawm hial thei awm e.
Aw le, engpawh ni se, kumin kum tawp lamah hi chuan kan inthlang dawn ngei ngei chuan a rinawm a, chu vangin kumin kum khat chhung na na na hi chu ram vei tak takin, mahni pumpui leh party unaute hmakhua ngai lovin, ram, khua leh veng hma ngaiin kan sorkar hruaitute pawh hian hna han thawk teh se. Hmasawnna lama mawngvawm ba ang hrima an beih chuan an hma a eng a ni tih hria se, chutih rualin party dang pawhin social media lama thu belhchian dawl lo tak tak hmanga inbeihna hi bansanin, ram tana an hma lakna tur ringawt ngaihtuahin hna han thawk bawk teh se.
- Patrick Z, Chhingchhip