MLA inthlanah MPF an chet a ngai

Kum 2018 MLA inthlan dawn khan Mizoram People Forum (MPF) chuan, inthlanah tlin duh vanga thil intiam an remtih loh thu an sawi a, Contract leh sorkar hna intiamte pawh rem kan ti lo tiin thuchhuah an siam hial a. MPF hi kan ram inthlanna felfai a awm theih nana tha thawhtu pawl lian ber an la ni deuh hrih mai a, anni hi tun kum inthlan lo awm turah pawh hian an chet chhuah leh loh chuan kan inthlan lo awm turah hian party ṭhenkhat hi chuan an duh tui leh lo viau mai thei a. An party tlinna tur a nih chuan tui nu pawh an hmang leh duh ngei dawnin a rin theih a, chu vang chuan Kohhran hruaitute leh MPF hian chak taka hma an lak a, inthlanna felfai kan neih theih nana tha an thawh leh a ngai dawn a ni.

MPF hian inthlan dawnah political party-te nen thawh­hona thuthlung an siam ṭhin kha a ni a, Political party-te nen thawhhona a ṭhat chuan tu party tan pawh lawmna tur a ni a. A bikin mipui rilru thiang taka vote thlaktu turte tan hian a pawimawh ber zawk a ni. Party mi leh sate chuan an party hamṭhatna tur a nih chuan engmah tih hreh leh pawisak an nei lo emaw tih hial tur a ni ṭhin a, chuvangin mipuiten rilru fima vote an thlak theih nan MPF hi an chet chhuah leh a ngai a ni.

Kum dang an lo tih tawh ṭhin danah chuan MPF hian house to house campaign neih danah pawh Political party lam nawrna avangin local forum kaihhruaina hnuaiah house to house neih hi candidate tan chuan an remtih sak kha a nia. Party worker-te tan erawh chuan House to house campaign hi an phalsak lo thung kha a ni a, khatianga awmze nei taka campaign dan an siam te kha chin zui zel atan a duhawm hle a ni.

Tin, party mal hamṭhatna tur atana hel pawl te hmanruaa hman leh ralthuam chelekna awm theite huai taka dodal pawh hi a pawimawh hle mai a, hei hi khauh taka dodal tur a ni. Mipuite pawhin hetiang lama inhnamhnawih party an awm vaih chuan hui san ngam ila a ṭha dawn a ni.

Tin, MLA candi­date te mipui lamin an intiamtir ṭhin tih thawm te pawh a awm fo a, heng te pawh hi chin chhunzawm tlak a nih loh avangin khauh taka dodal ni se a duhawm khawp mai. Mipui, pawl hrang hrang leh kohhrante pawhin party leh candidate-te hnenah thil phût neih tur lo ngam ila, MLA candidate-te thil tiamtir lo turin mipuite pawh hrilh hriat ni se a duhawm hle.

Mi ṭhenkhatin jersey, football, mobile phone handset leh a dangte pawh candidate hnenah dil tih hriat a ni tawh ṭhin a, hengte pawh hi khap tur a ni.

Hmun ṭhenkhatah sorkar hna leh contract intiam te a awm tih hriat a ni a, hetiang thil te hi an ti hlawhtling a nih pawhin dan bawhchhiatna lian tak a nih avangin MPF hian uluk takin vil se. Social media hmanga dik lo thehdarh te pawh a awm leh maithei a, heng te pawh hi dan bawhchhiatna a nih avangin khauh taka vil ni se a duhawm hle.

- Lalpekhlua Colney