ASSAM RIFFLE RAM, ṬAHNA NGE HLIM NAN?
Mizoram mipuite tan chuan kan Aizawl khawpui lunlai bera Assam Riffle ram awm duai mai hi a hnawk ta em em a. A chhan bulpui ber nia lang chu kan khawchhung hmunhma tawt ta lutuk vang hi a ni ber awm e.
Assam Riffle te hian Lammual hi chhuahsan ta se, kawng hnihin a hlawkna a awm thei ang. Pakhatnaah chuan Sorkar hmun pawimawh leh building sak ni ta se. A pahnihnaah chuan kan kawngpui tawt lutuk, nitina traffic jam in a tihbuai vanga hun hlu tak kan khawhral ṭhinna tih tlem nana Parking Lot leh Terminal building lian tak siamna atan a hman nise.
Tun dinhmuna kan khawpui mamawh lian ber chu Sorkar Building pawimawh sak lam ai chuan kawngpui tawt tih ziaawm hi a ni awm e. Private leh commercial vehicle te kan duh vang reng ni loin kan in tlanchhawk a ngai a, traffic jam ah hun hlu tak kan paih fo. Hei hian kawng tam takin kan khawpui chhung thil tih engkim mai hi direct in emaw indirect takin a ṭha lo zawngin a nghawng. Traffic jam hian Aizawl khawpui hi a tinuam lo a, Assam Riffle chhuah hun tur leh he hmun kan hman ṭangkai hun tur hi kan mitthla nasa a nih hi.
Khawpui hulum lai Dawrpui, Zarkawt, Electric veng, Saron, Chhinga veng, Venghlui leh Tuikual bawrah hian hmun pawimawh tak tak Bazar pui ber te, Hospital lian leh medical clinic hrang hrang leh a kaihhnawih Laboratory te, Bank leh Bawrhsap pisa pui thlengin a awm a. Helai bawr lirthei chevel, kawng sira lirthei park te leh mipui chetvelna hian kan khaw chhung traffic jam tam tak hi a thlen a ni.
Lammual hmunah hian motor lian ber aṭanga a te ber thlenga park leh building mumal taka enkawl, thla kipa pawisa chawi theih emaw a darkara hman man chawi ngai han awm sela. Kan sawi tak veng hrang hrang kawngsira hun ṭhin lirthei zawng zawng hun nana hman han nisela chu traffic jam a van ti ziaawm dawn tak em!
Kan bazarpui a dawr nei te, Bazarpuia thil lei tur te, Civil Hospital pantute leh a thawk te, DC office pan tur te, Bank dawrtu tur etc tan motor dahna a ni ang a, ava hlu dawn em. Lammual hi motor parking lian tak han ni sela chu Chanmari aṭanga Venghlui, Tuithiang leh Dinthar lam thleng hian ke a kal mai theihna khawpa hnai a nih avang hian a hlu hle dawn a ni. Heng lai venga chengte tan chuan kawng sira lirthei dah ai chuan helaia man tlawm te a va park kha a hlu em em dawn a ni.
Khawpui chhunga service, Bus te leh Thingtlang Maxi Cab chhuak leh lut tur thlenga an hman theih tur Terminal lian tak awm bawk se. Zemabawk, leh Kulikawn Ngaizel inkara City bus te (Sihphir lam leh Vaivkawn lam tiamin) hi Lammual aṭanga control leh chhuak ni vek thei sela mipui tan a chhawr nahawmin a enkawltu tan pawh buaipui a awlsam zawk ngeiin ang. Maxi cab tam tak leng leh leng lova Electric veng Power house bul leh hmun hrang hrang aṭanga rem lo tak taka chhuak ṭhin hi a reh tawh bawk ang.
Hetianga hman tangkai a nih theihna tur chuan tuna Lammual leh a chhak tlang te, Mandir awmna tleng hian kawngpui zawla nawr mam vek ni se. Parking leh Terminal building etc bakah hian kawngpui zau tak Four Lane pawh a siam theih hial awm e. Kan khelmual ngaihsan em em Lammual erawh Mualpui lamah khelmual ṭha zawk kan nei tawh a, huau huau buatsaih a nih apianga kan khawpui hulum lai bera mipui tan buaina thlen tura eng motor mah che mumal thei lova min siam ṭhin hi a reh tawh bawk ang.
Amaherawh chu kan hman ṭangkai thiam loh chuan Lammual hi kan fate thlenga min demna hmanraw lian tak a ni thei dawn a ni.
- Dza ralte