Mizoramah Covid-19 a darh mek VC leh LC inthlan sawn ni se

Mizoram State Election Commission (SEC) chuan Mizoram district pakuaah village council leh local council inthlan hun a puang tawh a, a hun chu August 27, 2020 a ni. Chutih laiin, khawvel pum buaina Covid-19 hripui chu kan ramah a hluar zual mek a, khua leh veng hrang hrangah total lockdown an inpuan chhâwk ta zak zak mai.

Covid-19 leh Mizoram

'Covid-19 kan hlauh vànglai kha kai a hlauhawm vànglai a lo ni lo a, kan hlauh vak tawh loh hnuah, tunlai hi kai a hlauhawm lai a ni chho mek a; kài kan hlauh vanglai ai khan tunah hian kai a hlauhawm zawk fé tawh,' tiin a sawi thei ang. Chutih rualin, he hripui hi hri thar, a nihphung te, a mizia te, kai a awlsam leh harsat danahte leh thil dangahte hriat thar tur a awm zel a, khawvela damdawi lama mithiamte pawhin an hriat dan a inthlâk hret hret ve tho a. Chuvang chuan, March thla tàwp lam leh April thla vela kan hlau viau leh khauh taka kan inkhàrkhip kha han innuihsawh zuina tur erawh chu a ni lo.

Covid-19 hi Mizoramah, a bikin Aizawlah mipui vantlangah a darh ṭan niin a ngaih theih a, India rama a darh nasat zualna hmunte ang em em erawh a la ni lo. Aizawlah a darh ta vak a nih chuan, khaw dang pawh a kângkai thuai ang. Chaltlang Lily Veng lama mi eng emaw zatin an kai tih hriat chian a nih hnuah phei chuan Aizawl khawlai (main road) a tháwl sawt a, mipui náwlpui hi ṭul tak takah lo chuan an chhuak tam lo ta viau niin a lang. Mipui hian hripui hi kai ve mai kan hlau tak tak ta a ni, a tih theih àwm e. 

Tun kar chhoa nasa lutuk loa hripui darh ta hian eng nge a an zel dawn kan hre lo. A ziaawm ve leh nghal mai thei a, a darh nasa sauh thei bawk. Chuvangin, kan fimkhur lehzual a ngai ta tih a chiang.

Sorkar thuneitute lam pawh a theih ang angin, an duhna chinah chuan an fimkhur a, mipui punkhawm tam loh theih dan tur pawh an ngaihtuah viauin a hriat. Inneih inkhawm leh mitthi vui dan chungchangah pawh thuchhuak khauh zawk sorkarin a nei thar leh ta a. Hei hi kan ṭhat tlânna zawk turah han ngai phawt mai ila. Chutih rualin, tun aia ngun leh zuala ngaihtuahna kan sèn erawh a ngai viau mai.

Covid-19 Ordinance 2020 (a tâwi zawngin sawi mai ila)-in tih tur leh tih loh tur a tarlan zingah, hmai tuam leh tuam loh chungchangah sorkar a khauh a, hmai tuam lote a ngaihtheih loh viau laiin, kan sawi uar viau tho si, social distancing erawh a namnùl viau thung. A nihna takah chuan, tuna kan kal danah hi chuan, social distancing hi Covid-19 Ordinance-in a sawi angin kenkawh theih a ni lo hrim hrim.

VC/LC term kal mek hi

Kum 2015-a thlan chhuah tuna VC leh LC term kal mek hi May 7, 2020-a tàwp tawh tur a ni a, mahse, Covid-19 hripui léng vanga inthlan theih a nih loh avang leh, sorkarin an hun a pawhsei theih bawk avangin VC/LC term chu thla thum atan sorkarin a pawtsei a, chu chu August 7, 2020 thleng kha a ni. August 7 pawh chu a tàwp leh dawn tâk avangin, a tàwp hmain Mizoram sorkar chuan thla khat dang, September 7, 2020 thleng a pawtsei leh tawh.

VC leh LC term chu pawhsei belh leh ngai pawh ni se, dan ang thlapin sorkarin a la pawtsei thei. Danah chuan, state sorkarin VC leh LC-te term hi chhan ṭha tak avangin thla 18 a pawtsei thei a (Vanglaini June 27, 2020 issue); chumi awmzia chu - November 7, 2021 thleng a pawtsei thei tihna a nih chu.

Covid-19 hripui léng hi khawvel Indopui Pahnihna hnua khawvel pum huapa chhiatna thleng rapthlak bera ngaih a ni a, India sorkar pawhin chhiatna lian tham bik (disaster)-ah a puang niin an sawi a. India ram leh Mizoramah ngei pawh heti tak mai hian kan buai phah a, kohhrante pawh thla nga dáwn lai kan inkhawm theih loh phah tawh a nih hi. 

Hetiang rêng rênga Mizoram min tibuaitu hi rambuai hnuah a la awm ngai lo niin an sawi. Hun harsa leh khirh bik kan tawng a, chuvangin, VC leh LC term hi thla 18 pawh pawhsei ni dawn ta se, tun hun aia pawhsei 'chhan tling' hi a awm kher lo ang.

VC/LC inthlan chu le

Kawng tinrénga mitthi buaipuitu YMA leh mitthi vuitu kohhrante'n sorkar thuchhuakte hre chunga ṭha an tih anga an kalpui mai tura ngaih mitthi vui chungchangah sorkar lamin tih tur leh tih loh tur kimchang taka a puan chhuah mek laiin, sorkar ber chuan mipui punkhawm loh theih lohna tur thil - VC leh LC inthlan kaltlangpui a la tum zel niin a lang a. Tuna kan dinhmun mek ngaihtuahin, mipui himna kan duh tak tak a nih chuan inthlan hi sawn emaw, ṭhulh rih emaw a ṭha zawk lo'm ni?

Inthlanah mipui punkhawm loh theih a ni lo. Social distan­cing-te chu sawi ve bawk mah ila, political party-te an 'inhawt buk' tho tho ang. Inthlang ta ila, mipui a tam thei ang berin vote thlak se kan duh em? Kan duh a nih chuan pitar putar thlengin vote thlaka an chhuah a ngai ang. Upa lam, a bikin kum 60 chung lamte tawm-im tura ngenna thu tihchhuah ṭhin nen a inpersan dawn - an tan a him lo viau thei; kum upate tan chauh ni lo, kum 50 hnuai lamte tan pawh.

Vote thlâk turin mi kan duhthawh vak lo a, vote tla ṭha lo se a pawi lo kan ti em ni? Pawi lo, tia kan chháng a nih chuan, Election Commission of India duh dan nen a inkalh hle ang; SEC emaw, sorkar emaw rilru tur a ni lo. 'No voter to be left behind' tih auhla (slogan) an tihchhuah chuai chuai ṭhinte nen chuan a inpersan hle ang. Inthlan hi kaltlangpui ni ta se, hripui léng vanga vote thlâk duh lo tur tam tak an awm hmel bawk. Chu'ngte chu sorkar leh SEC hian an ngaihtuah tel em?

Hun kal tawhte thlìrin, tualchhung roreltu tur thlan­naah hian state sorkara rorel lai party-te an chak tam zawk tlangpui a tih theih a. Chu chu hriain tuna kan state-a sorkar lai party hian tualchhungah thuneihna chan an thlahlel a, khua leh veng hrang hrangah khawtlang rorelna thunun an duh a, hun harsa bik leh mipui punkhawm a remchang rih lo, tih pawh namnùlin inthlan kaltlangpui ngei an duh a ni thei ang em? Tuna VC leh LC term kal mek pawh hi Congress sorkar laia thlan chhuah an nih avangin Congress party-in thuneihna an channa khua leh veng a tam zawk rih si a.

Tlangkawmna

Kan sawi tawh angin, state sorkarin VC leh LC term hi a la pawtsei thei a, pawtsei chhan tur pawh a ṭha tawk. State sorkarin a pawtsei duh lo tlat a nih chuan, SEC tan chuan inthlan buatsaih tura hmalak loh theih a ni si lo. Inthlan leh inthlan loh hi SEC kutah eng emaw chen a innghah ve tho rualin, a mawhphurtu tak, thuneihna tàwp neitu chu state sorkar tho tho a ni.

Chuvangin, kan hun tawn mek te, a kaihhnawih thil chi hrang hrangte ngaihtuah hian, August 27, 2020-a neih tura tih VC/LC inthlan hi sawn emaw, ṭhulh rih emaw ni hrâm se, mipui náwlpui an lâwm tlang ngawtin a rinawm.