Temami Pa thukhawchang (Electric Bill chungchangah)

Tunlai hian Elec­tric/ Energy Bill chung changa mipui zawhna ṭhenkhat chu Temami Pa beng a lo thleng ve a, chung zawhnate chu:- 

1. Kan ṭhenawm­te nen electric kan hman dan a inang reng si a, kan bill a tam zawk ziah tih te. 

2.  Thla hmasaa kan hman dan ngai rengin kan hmang si a, bill hi a sang riau tih te hi an ni.

Heng zawhnate hi Temami Pa chuan ngun taka a ngaihtuah hnuah zawhnate dang a zawt let ta mauh mai a. 

a) ‘In ṭhenawmte electric hmandan te minute tinin thla khat chhung in va enpui reng em ni, tin, in-

ṭhen­­awmte Fridge te, Tele­vision te, Washing machine te, Electric Istiri te, tuilumna (Geyser) te leh washing machine te inang chiahin in hmang tihna em ni dawn le? 

Chu lo rengah an light chhit ṭhin, tube light te, CFL bulb te leh a dangte inang chiahin in hmang em ni dawn le? Zanah engtia rei nge an chhit tih te, room hrang hranga an chhit en zawng zawng te, TV an en rei zawngte leh tuilumna an hmandan thlengin a inang reng em ni aw?’ a ti nuah nuah a. Chubakah, computer te leh printer te pawh inang rengin lo nei a, inang chiahin in lo hmang em ni dawn le? a ti bawk a. 

b) ‘Thla hmasaa in eng chhit dan te, buld leh tubelight hrang hrang in chhit ṭhinte chu in hman rei zawng a lo inang vek a nih chuan Power Department lam meter box chu enchian a ngaih hmel mang e aw’ a tih bakah tuilumna te chu thla hmasaa in hman ang chiahin tun thlaah pawh in hmang a, in TV en rei zawng te, computer hman rei zawng te, waching machine in hman rei zawngte chu felfai taka chhinchiahin uluk takin in bill chu in lo chhut ru ve a nih chuan Power Department lama a bialtute hnenah hrilh hriain in record te chu entir vek ta ula. In siamṭhat an ngaihna laite an hre mai dawn a lawm’ a ti fuk fuk a.

‘Heng bakah hian meter reader ten in meter reading an laklaiin thla hmasa lama an reading lak nen a in tam hleihnate lo zawt ula, tin, unit eng emaw zat (100 aṭanga 1000 emaw) in hmana energy/ electric chhit man in chawi theih dan electric bill hnunglama chiang taka ziah aṭanga in lo in chhut thiam ve theih dan turte zawt ṭhin teh u. 

Thil harsa a ni lo, belh leh paih thiam tan hriatthiam loh tur a awm lo a nia’ tiin a thukhawchang chu a tlip ta a.