AR chhuah tur hi thil thar a ni lo, Order awm sa a ni
Kan hnung Inrinni, April 1, 2023 khan Union Home Minister Amit Shah chu Lammualah a rawn zin a. Assam Rifles Battalion hmun thar Zokhawsanga mi leh project dang hrang hrang a rawn hawng a, Assam Rifles chu an chhuah tur thu sawiin an chhuah hun tur erawh chu a puang tel lo thung a ni.
Assam Rifles chhuah tur hun hi chu May 31, 2019 kha a ni a, hetah hian Assam Rifles chu Lammual hmun chhuahsanin Zokhawsanga insawn turin thu pek (order) an ni tawh a, kan Chief Minister pawhin Lammualah Chapchar Kutah a puang tawh a ni. Assam Rifles chu an chhuak leh duh ta si lova Chief Minister chu dawt an sawi tir ta mai mai a ni.
Kan Chief Miniser khan kum 2019 khan Chapchar Kutah Mizo mipui hriat turin AR chhuah tur thu hi a lo puang tawh a, an chhuah leh loh kha CM thu a ni lova, Union Home Ministry thiam loh a ni zawk. Kan CM khan kha thu a puan khan Order awm sa milin a puang a ni.
Kan hmuh chian em em chu AR sawn chhuahah hian kan CM-in thu a nei lo tih a ni. Order awm sa tawh, CM meuhin Mizoram mipui hmaa Mizo kut ngaihhlut bera a puan nawn leh sak pawhin Chapchar Kut lama mipui kalten kan CM chu 'Dawt Sawi' tia an puh turin MHA chuan AR an chhuahtir duh ta tlat lo a ni. AR chhuahtira chhuah tir lo theitu chu Pu Lal Thanhawla leh Pu Zoramthanga lam ni lovin Union Home Ministry lam an ni tih a chiang ta viau a ni.
Order awm sa vek chu kan CM in a han puang nawn leh a, Assam Rifles ho chu an la che eih lo. CM hian an chhuah loh chhanah Covid a puh a, hei hi thu belhchian dawl lo a ni thung. May, 2019-ah Zokhawsanga chhuak tura tih an ni tawh a, Covid hi chu kum 2020 ah pawh April lamah Mizoramin kan buaipui ṭan chauh a, a hma thla 11 chhung khan an che chang miah lo, CM tan AR sawn theih a ni lo.
Amit Shah hi AR sawn theitu a ni a, a rawn zin taa AR chhuah tur thu Order-a inziak sa chu a rawn puang leh ta a, an chhuah hun tur ziakin a awm lova Amit Shah hian a sawi lang hek lo. AR hian Lammual hmun an chhuahsan fel hunah hi chuan Krismas sa kan ei leh hman a rinawm ta rum rum a, order hi chu kum 2019 khan an chhuahna turin a awm thlap tawh a ni.
Lammual aṭanga AR te Zokhawsanga an chhuahna tur Order awm sa CM in a puan nawn hnu kum li dawnah Amit Shah chuan a rawn puang nawn leh ta a. Tuna a puangtu hi chu a thu ber a ni bawka Amit Shah hian AR chu a sawn chhuah a rinawm a, a thusawiah Mizoram sorkarin sawn chhuah an duh thu leh BJP, Mizoramin sawn chhuah an duh thu an hrilh a tih kher kher chhan kha BJP Mizoram lam thurawn a nih a rinawm. AR sawn chhuah politics hi tawp se, chhuak vang vang teh se.
- Zothanpuia (Mapuia)