Chanchinthar ngaihthlák emaw chhiar emaw apianga Covid-19 chungchang hlir hmuh tur leh hriat tur awm ziah hi a hneawm tawh ngawt mai. Kan tunlai boruak a ni miau si a, eng kan han tih chuan ang le? He Covid-19 hripui hian mizo ze hrang hrang chu a thai lang ta chu a ni ber a, a la thai lan belh zel dawn pawh a ni ang. Inkharkhip tirh aṭangin bazarah buhfai leh thil dang inchuhin bul kan ṭan phawt a. Mi duham leh duham lo deuh te, mahni ṭanghma hai chak deuh leh deuh lo te, mi phunchiar leh dawthei deuh te, àn cheh deuh leh dawhthei deuh te, mi tlawmngai leh mahni hmasial deuh te an lo lang­chhuak zelin a rinawm.

Mizote hi tháwkaphita chi-ai hma em em hnam kan ni, tin, kan emotional (rilru belebut awlsam) em em bawk. Ringtu inti si, kan boruak tawn azira luang thli chhem nghîn ang mai, kan rilrute hi a danglam zung zung a, rilru nghet tak neih kan mamawh. Ram pumah Total Lockdown a han ni a, In lamah Home Crusade kan han nei a, speaker te hmangin T.V kaltlangin mi tam takin damna an chan thu an puang ruih ruih a nih kha, dik tak chuan khatianga damna puang zawng zawng (100%) khan an dampui tak tak hi ka ring lem lo! 'Chumi khami/chumi venga mi zu ngawlvei chuan tûna sermon a ngaihthlak zawh aṭang khan a sim ta/a dam ta' tih ang reng te kha Zoram mipui hmaah kan han puang duh a ni a, intihlâr châkna mai mai niin ka hria. An dam tak tak leh dam tak tak loh chu hunin a la hril mai turah ka ngai.

Pastor ropui leh zahawm, Pathian ṭih mi dik tak, eng pawh sawiin emaw ti dawn emaw ila, a pawimawh ber chu, "Pathian duhzawng a ni em? Pathian duhzawng a ni ang em?" tih a, chutiang taka inkaihhruai hi a 

ṭha ber a, a him ber, titu Rev. Saiaithanga kha Sairum khaw mihlim pakhatin, "Ka pu, i piang­thar ve tawh em?" tiin a zawt a. Ani chuan, "Ka pianthar leh thar loh chu ka ṭhenawmte zawt ta che. Mahniina ka piang­thar tih hi a dik lo. Kan piantharna chu miin an hre tur a ni." tiin a chhang a. Rev. Saiaithanga kha ringtu tam takin Mizorama pastor-te zinga ropui ber leh zahawm berah an ngai ṭhin.

Hripuiin khawvel ram ropui tak takte leh India ram hmun hrang hrangte a nuai mek zel a, mi tam tak chuan kan hlauh luat avangte, râlkhèl leh chi-ai tura zirtirna kan dawn tam luat avangte hian inkharkhip (Total Lockdown) neih leh mai ṭha titu hi kan tam hle niin a lang.

Thihnate hlau tawp lo turin kan nunna thuhruk a ni tih hla saa lamtuala khúp durusuih uih uih paha Pathian faka lam ṭhinte kha khawiah nge kan awm zawh tak aw? Chhungkaw ṭhenkhat chuan bawnghnute sem te, chanchinbu semte leh bill eng eng emaw rawn khawntute kan thinhrik ṭan a ang! 'Isua ni se engtin nge a tih ang' tih hi kan inzawh nawn fo a ṭhain ka hria.

He virus hi kan inkharkhip avang ngawtin a reh dawn lo. Hri kai pawh kan la pung chho zelin a rinawm. Amaherawhchu, he virus hi thihpui ngei ngeina 'deadly virus' a ni lo tih i hre thar leh ang u. A hri kai dàn pawh kan mithiam zawkte'n an rawn sawi chamchi tawh a; kan hre tláng ṭheuh tawhin a rinawm. He virus hian kan taksa khawi laiah pawh a lut mai thei lo tih hre thar leh ila. A luh nan hian vunin a tuam chiah loh, 'mucus membrance' a mamawh a ni. Chuvangin kan kâ, hnar leh mita a hrik a luh loh chuan, kan kai dawn lo. Kai tur chuan min khuh/hahchhiau khum emaw chil per kan lo dawn fuh aṭangin a ni ang. A nih loh chuan, keimahni kut ngei hmangin kan mit, kâ leh hnar kan khawihin mahni leh mahni kan inkaitir thei. A venna chu, mi dang hlat, kut sil ngun leh mask vuah ṭhat a ni mai. 

Tin, taksate hi hrisel ṭha se, fit ṭha se, insawizawi uar ila, bible chhiar leh ṭawngṭai hi ni tin mathei lovin nei ṭhin bawk ila, tun ai hian kan hlauh thlabâr dan pawh hi a nêp deuh ang maw le. Amaherawhchu, mipui an thuhmun fo thei lo tih angin hlauh záwng te hi a inang lo va, tin, hriselna-te a inchen lo bawk nen, damlo chak lo leh kum upa lam, mahni pawh inbawihsáwm hleithei tawh lote'n he hripui hi an va rál hlauh chiam a nih erawh chuan an demawm hran chuang lo ve. 

Mahni han insawi ve rawih ila, ni tin darkar chanve aṭanga darkar khat vel hi taksa sawizawi (workout) nan hun ka hmang ve hram hram ṭhin a; Pathian zarah ka taksa hriselna pawh a pang­ngai ve viau a, chuvangin he hripui hi chutin ka va sapui hlauh ve tehchiam lo! Chumi ka hlauh loh vang erawh chuan he virus hi ka va cho tihna lam a ni lo va; ka va fimkhur lovin mi dang ka va lèn pawh chiam chiam tihna lam a ni hek lo. Mahni inringtáwk tur khawpin ka hriselna ka vawng (maintain) uluk tihna mai a ni e. He thuziak lo chhiartute pawh hian ka tih ang hian ti ve ta ula'ng, ka rilru put ang hi in pu ve thovin ka ring.

Tun thlengin kan state chhûng­ah Covid-19 avânga thi kan la awm lo a, kan vannei tak zet a ni. Hlauva philiin awmzia a nei lo ang bawkin, páwng hlauh loh ringawt pawh a ṭha kher lo vang. Fimkhur taka invenna erawhin awmzia a nei mai a ni lo va, tawrhna tam tak min pumpelhtir thei bawk a ni.

Bible hian hlauh tur pakhat chiah a sawi. "Tin, taksa tihluma tharau tihlum thei lotute chu hlau suh ula; Gehena-a thlarau leh taksa tiboral theitu erawh chu hlau zawk ang che u." - Matthaia 10:28. Ka lawm e.