Mipui tham lotu Politician

Mizote hi hnam dang anga thikthu chhia leh huaisen ni ve ila chu kan Politician ṭhenkhat chet dan hi kan dem satliah lo ang a, kan er lêt (Revolt) nasa ve ngawt ang. Hei hian tharum thawhna lam a kawk lova, tin tharum thawh tura inzirtir hi thil ṭha pawh a ni bawk lo a; mahse Politics ah mahni thiam danin a er let theih a ni.

Kan Politician langsar chuan kawngpui chhia a hmu ve lova, a mipuite an au nasat tehlul nen "Silchar pawh pel lovin kawng chhia lo sawi ve sek suh u," ti lam hawiin a lo sawi tawh a ni.

Politician pakhat leh chu inthlan dawna campaign hun a tawp tawh hnuah Bye Election neihna tur hmunah a kal a. MPF in an lo dan chuan, "Feh kawng ka bo," a lo ti tawh bawk a. Hetiang politician langsar ve tak leh inthlan campaign dan leh dun pawh hre em em tura ngaihin ṭawng­kam a chhak chhuak hi MPF leh mipui zahlohna a tling.

Sorkar hnathawk­in hlawh an la har a, pawisa a van em avangin mipui mangang an chiau vawng vawng a. In luah man pek a tlai a, bank loan nei an rum sup sup laiin Politician langsar pakhat chuan, "Hlawh lak tlai avang­in an hlawh a kiam chuang lo," ti lam hawiin sorkar hnathawkte a lo ṭawng khum ve leh tawh bawk a, hetiang chi hi a lo tam thei hle a ni.

Sorkar tawh Party tan hi chuan ṭawng sual hi a awl bawk a, an lo ṭawng sual ve rem rum tawh ṭhin a ni.

Ṭawng sual palh (Slip of Tounge) hrim hrim hi a awm a, chumi ni lo ṭawng sual luih a awm leh bawk a; kan Politician ṭawngkam tam tak hi chu tihsual palh niin a lang lo. Independent MLA tia MLA aṭanga bang tura an hek khan "Dan ngaih pawimawh vang," tih changchawi khan MLA te hial pawh ban a lo ni tawh.

Mipui tham lova ṭawng te, ṭawng sual luih te, pawisa neih chuan mipui lam ṭanga siam tumtu te, pawisa chhuanga mipui chunga len tum te, sum avanga tla thei lova inngai te, dinhmun ṭhaa din vanga mipui hnuai­chhiah chingte laka mipui revolt dan ṭha chu inthlan hunah 'EVM hmangin' a ni.

- Caleb Lalthanpuia