Lunglei inthlan hian nghawng anei dawn em?

Kan hriat ṭheuh angin kan hnung lawkah khan Lunglei Municipal Council (LMC) chu an inthlang zo ta a, ZPM chuan mipui rin khumin chakna an chang fai hneh hle a ni. Seat 11 em em hi an lak rinna kan nei lo tlang a, anmahni pawh hian an inrin phak a rinawm loh laiin ZPM chu Lungleiah na na na chuan an chak chiang a ni.

Kum 2023 kum tawp lamah hian Mizoramah MLA inthlanpui a lo thleng dawn ta a, result chhuah tirh aṭang khan ZPM tan chuan kum tawp inthlan chu awlsam sawt tura ngaihna lian tak a awm a ni. Mi ṭhenkhat thu post kan hmuh dan chuan Lunglei chhunga MLA bial 4 chu ZPM tana bel chhunga sa ang hial a ni a, mahse a ni dawn si lo tih hi huaisen takin ka sawi ngam a ni.

Lunglei inthlan issue hi State inthlan issue nen a inang lo a ni. Pu Zoramthanga kaihhruai sorkar chuan Congress sorkar pawisa dah tawh sa Lunglei By Pass Road siamna tur sum chu a hmang duh loa thil dangah a pawt peng a ni. Hei hi Lunglei mipui hian an hre reng a, an kawngpui ngaih tuah duh lo tu MNF candidate hnawlna remchang atan an lo hmang a ni mai. ZPM an chak hrim hrim vang emaw kha in lo ti ang e.

Covid hripui hrik enna RTPCR khawl pawh Pu Zorama sorkar hian Lunglei tan a pe duh loa High Court an kal hnuah a pe chauh a, Thuamluaia Mual phullem phah thar tih mai mai chu mipuiin engah mah an ngai lo, Lunglei inthlan result en hian phullem hian vote a keng tel lo tih a lo lang tel bawk a ni a, thil lem mai mai chu a tak a lo ni lo. Mahse heng kan sawi avang hian bial dangah ZPM hi an lian hluai dawn tihna a ni lem loin ka ngai a, Champhai leh Aizawl District a nghawng phak dawn em ni? Lunglei boruak hi chu Lungleiah hian a tawp mai dawn nge Lunglei boruak hian kum tawpah MLA hi ZPM lamah a pun tir dawn? tih zawhna hi Krismas dawnah chiah kan chhang thei ang.

- Lalmalsawma