SAZA THAH CHUNGCHANG

Mizoram hi kan ram neih chhun a ni a, tun hnaiah kan state ramsa chhin­chhiahna (state animal) Saza meuh zahna nei lova thah a ni. A pawi hle! Zoram dung leh vang chu hemi chungchang hian reiloteah a deng chhuak nghal a. Social media vel­ah inhnialna a tam nghal hle. 

Kan State animal khawngaihna tel miah lova thattute thlavang hauh zawnga dang ro thei hial tur khawpa kan lo au ring ve a nih chuan inenlet kan ngai hle a ni ang. 

Mahni State ani­mal meuh pawh thla­vang hauh duh lo chuan he kan Zoram thlavang hi rál leh hmelma lakah pawh an hauh duh kher ang em? 

Kan ram leh a chhunga chengte kan ngaihhlut thiam a, kan ram tana thil hlute kan humhalh a, kan venhim zel hi Zoram hmangaih dan kan lantirna pawimawh tak pakhat a ni. A bikin kan ram timawi zualtu leh tinuam zualtu nungchate hi dimdawi takin i enkawl zel ang u. 

Tunhnaiah ram­vah leh sapel a lar thar leh ta riau hi thil pawi tak a ni. Tunlai ramvak mite hi chhungkaw eizawnna leh chhungkaw intunnunna aiin mah­ni nuam tih vang mai maia ramvaka sapel hi an ni zawk mah hian an hriat hlawm. Khaw tin leh veng tina ramvak mite hi chuan nuam an ti em a, an nawmchenna kawng khatah a ngaih theih lek lek asin! Chuvang chuan hmanlai ramvak mite leh tunlai ramvak mite hi khaikhin chi an ni awm lo e. 

Tin, tunlai kan Zoramah hian mi thil hre tak tak leh thil inti hria hi kan awm a. Mi thil hria chuan ngun takin a ngaihtuah a, mahni duh zawng aiin mipui tam zawk duh dan leh ram tana ṭha zel turin thu a sawiin a ṭawng ṭhin a, chutih laiin mi thil intihria erawh chuan midang ngaih dan aiin ama ngaihdan a dah lal zawk a, mipui tam zawk leh ram tana ṭhatna tur ngaihtuah aiin mahni duhdan leh pawm dan a chawi vawng zel zawk ṭhin. 

Tuna Saza thah a nih chungchangah pawh hian ram tana ṭhatna tur leh mawina tur ngaihtuah lek lova  mahni ngaihdan lo aupui vak vak kan tam hle niin a lang a, a pawi ṭhin hle. 

 Mizoramah ramsa kan humhalh zual deuh deuh a, nungcha chunga ngil kan neih zel hi a hun tawh tak zet zet a, chu chu kan ram tana thil ṭha tak a ni si a. 

Chuvang chuan state animal Saza thah a nih chung­changah pawh hian mi tam takin Saza thlavang an hauh hi a sawiseltu ni mai lovin, nakin zela kan ram zahawmna leh mawina tur a ni tih hriain i thlawp tlat ang u.