Lunglei lam boruak X Ray

Lunglei Munici­pal Council inthlan result hian Mizoram mipui tan beiseina thar a siam a ni. He inthlanna neih a nih hma khan mi tam tak rilru a beidawng hman tawh a ni.

Lunglei inthlan result hian mipui chakna ropuizia leh thiltih theihzia a rawn tilang chiang a. State dangte angin mipuiin an chakna an lantir ve a, hruaitute thlem leh vau theih an ni tawh lo tih a takin an lan tir a ni.

Inthlan result hi ZPM hian an party hnehna emaw an lo tih mai a hlauhawm. He hnehna leh chak­na hi mipui hnehna leh chakna a ni.

Lunglei khawpui­ah hian, "ZPM ka ni e," ti hi chhiar ta fak fak se tuna an vote hmuh zatve pawh hi an awm lo ang. Chuti a nih laia ZPM in seat 11 an vai lak theih chhan hi mipuiin MNF sorkar lakah an lungawi lohna an lantir duh vang a ni. ZPM hi an duh tak vang pawh a la ni lo.

Congress-ah rinna an la nghat ngam si lo a, MNF in Lunglei mipui a sawp dan an hria a, Lunglei MNF MLA te nepzia an hre bawk. Tichuan Lungleia inthlanna awm leh hmasa berah MNF sorkar laka an lungawi lohna an lantir ta a, chu chu ZPM hian a rah an seng a ni lek fang.

Mipui inthurual hi thil mak a ni lo. Mipui inthurual tir tur khawpa MNF in Lunglei mipui an sawp hi a mak zawk chu a ni. An khaw chhung kawngpui hun rei tak a chhe hle a, a panna kawngpui tun thlengin a la chhe bawk. Lunglei khawpui bypass road siamna NEDP lama Congress sorkarin a dah ṭhat sa chu hmun dangah an hmang daih bawk.

Covid laia mahni mipui chhan ngam lo, Lunglei mipui aia Aizawla Hnam Run lama MNF hruaitu hlau zawk MLA an nei bawk. Heng in fuan khawm hian Ruling Party chu Municipal Election-ah an nil tir ta ṭhak a ni.

Thil dang pathum a la awm. Pakhat­na chu SEDP a nuai 3 intiam an tih­hlawhtlin loh vang a ni a, nuai 3 hi mipuiin an phût miah loha MNF in an tiam a ni a, chhuanlam ho te te hmangin Rs 25,000 an sem thei hram a, mipui lung a dam lo.

Kum 2023 MLA inthlan hmaa nuai 3 an sem loh chuan bial dangah pawh MNF chan a chhiat phah ang. Pahnihna leh chu Minister intithei fal leh CM inzawm an tih hian mipuiah MNF ninna a ti lang a. Lunglei aiawh MLA leh Minister te chu dinhmun chhe taka dinga ngaih leh duat loh hlawha ngaih an ni, mipui lung a awi lo a ni.

Pathum lehna chu heng thil hrang hrang:- Kamrul, Abu Mazumdar, Kuhva smuggling mitsiai, Ngaizawl kawng laih nuai 100 bo, PAHOSS induhsakna uchuak lutuk, Lem ang der, PMJVK sum vai hma etc etc etc hi mipuiin an theihngilh lo a, an vote duh loh phah a ni.

- Lalkhawngaiha,

Chanmari West