LMC INTHLAN THLIRLETNA

Solid seat lak tawp mai chu, democracy khawvelah chuan thil vang tak a ni. A chhan lian tak a awm a ni mai. Inthlan boruak kha thlir let thuak ang.

Campaign lai: Hun tepter tak karah campaign rusum thlak a ngai a, Party tin an che ngawrh vek. Candidate pawh nei ṭha an inti tlang vek a, tling tura inchhut deuh vek an ni. Party ṭhenkhat sum hmachhuan an awm tih sawi rik a awm tih loh chu, an campaign dan a mawi hlawm khawp mai. Aizawl lam aṭangin Party tin hotute an lo thawk phei a, boruak rawn siam hluai an tum vek. Lunglei mipui erawh chu kan ngawi duk thung. Campaign tawp niah ZPM lamin celeb rual hmangin open air-ah thawm lian tak an nei tih loh chu, mipui pun khawmna lian tak a tam lem lo.

Hriatthiam a har: LMC chu MLA thlan nen a inang lo, an bial a zim a, chhung leh khat leh veng induhsakna boruakin awmzia a nei thui ang tih a ni. Bial tam ber chu veng hnih huam chhung a ni a, veng khata mi pahnih candidate nei chu an inpawt chhe tawn ang tih te, anni chu mi hlun an ni a, vua leh vang an ngah tihte a ni nawk mai. Thlir lawk dik awm tak tak thu a tam khawp a, inthlan result hriat a ti chakawm zual.

Result chu: Wow a va mak ve, rin aiin an chakna a sang daih mai. Ward VI chu postal vote-ah ruling an sang tlat mai, chak zawkah an ṭang ve dawn a ni ang. Khai a hetah pawh an chak leh ta chuang lo, a va mak em em. Ward IV chu ruling aiin INC an chak tlat mai, mahse hetah pawh ZPM chakna a va la sang ve. A mak hle mai tih a ni tluan thak.

A chhan ni theite: Heti taka ZPM an chak mai hi, a chhan chi hrang hrang sawi a ngai. Tu party tan pawh in en let nan a tha ve hrim hrim.

1. Lunglei mipuite sorkar hrawn mek lakah an lungawi lo. RT-PCR dah sak duh lo nia hriatna te, Thenzawl aṭang Lunglei kawng chhe char char mai te, Pukpui Engineering College din nana hma la ṭha duh lo nia hriatna te, Theiriat Vengchhak playground siam tur intiam a hma la la si lo te, Lunglei Bypass kawng siamna tur, khawpui chhung kawng siamna atana hman a ni ta daih te kha, a langsar zualte an ni awm e.

Hengte hi LMC hma lak phak a ni lo tih an hre tho. Chhungkua leh Veng mi candidate induhsakna lam aiin, chhim thlipui tleh tir theihna vote hman an chak a ni ber.

2. ZPM an taima fal, an leader aṭangin, awr phiar ṭawng ṭawngin, inthlan hma zawng chu, ni tin zan tin an au hi a ni ringawt mai. Candidate ten in lama mi tlawh chhuah an taima bawk si.

An taihmakna chu thu­hran ni se, campaign au hla an nei ṭha em a ni. Sorkar in a ngaihsak lohna an vuipui thiam vel bawk si a. "Development khai rual lo" tih slogan an hman uar em emte khan, Lunglei nu, Lunglei pa tan chuan, "Khawnge...." han tih ve mai kha a chakawm ve bawk a ni.

3. Mipui-ah ZPM en chhin duhna a lian, "Kan danglam bik ang" an ti deuh reng bawk si a, party 2 hrawn tawh ai chuan, en chhin ve hrim hrim duhna a lian a ni.

Mipui moral a la chhe em em lo: LMC inthlan hian mipui thinlung chhe tawh nia kan insawi ṭhinna pawh, a la chhiat lohzia a ti lang. Kan lungawi lohna chu vote hmanga rel fel theih a ni tih hria mipui an lo la tam khawp mai.

Hei hi party tinten hre rawh se, kan party kan lian tih theih a ni lo, kan hna thawh ṭhat leh ṭhat loh hian, kan tlin zel leh zel loh tur a hril zawk.

Chuvangin, thil ṭha tih lamah inel ila, kan tih ṭhatte chhuang thiam ila, ka chanvo tur aiin mipui chanvo tur dah lian ila; Party mi induhsakna hmanga development kalpui tawh lo hian. ZPM-in "Mipui sorkar din kan tum" an tih ang hi, party dang pawhin kan set up hi thlak ve ngam ila. Ram ṭha lehzual kan nei ve em em ang.

- Lalrinliana Colney