Pawisaa tlin tum an awm chiang

Hman zan khan Youtube lamah Chief Minister Pu Zoramthanga thusawi ka ngaithla a, "Hei hi kan Chief Minister-in a sawi si maw!!!" tiin ka ngaihtuah zui vawng vawng a. Pawisa hmanga tlin tumna an neih a zep zo tawh lo a, a pawisa sawi kha MNF party pawisa ni loin SEDP pawisa leh SASCI hnuaia pawisa lo kal tur a ni a, chiang lêng lawngin a sawi a ni.

He thusawi hi khawia mi nge a nih ka hre lo a, a sawi hun tak hre lo mah ila kumin kum tawp inthlang tura party mipui a fuihna a ni. Tun hnai thil chu a ni a, ṭhahnem a ngaihna a fakawm a, MNF party chu MLA ngah ber an nih thu leh chu chakna thahrui hman tur an neih ang chu eptu lamin an neih ve loh thu a sawi.

Tun hma inthlan sawiin inthlan dâwn tak taka Congress lamin helicopter hmanga pawisa an dâwn ṭhin thu leh chilputa an thlir thu a sawi a, Congress pawisa dâwn a sawi. Chutiang dinhmunah chuan MNF an din tawh zawk thu a sawi a, a pawisa nei zawk an nih thu a sawi bawk.

SASCI sum vaibelchhe 5-10 vêl zel chu bial ṭhenkhatah a awm dâwn a, chu chu MNF tana advantage a ni tih a sawi.

Pu Zoramthanga hian SEDP kalpui mêk chu second instalment an sem hunah tuna Rs 25,000 hi Rs 25,000 vek an pek belh dâwn a, chhungkaw 60,000 hnenah Rs 50,000 an pek chuan tlinna chance an nei ṭha tih a sawi.

MNF chakna bakah SASCI sum leh SEDP sum an sem chuan inthlan lo awm turah an chak a ring a, hei hi uar takin a sawi a ni.

He thusawi ka ngaihthlak hian ka thinlung a nâ a ni. He thusawi ngaihthlak hian kan politics ka hmù chiang hle a, a va hrehawm em! He politics hmanga kan ram hi kaihhruai kan tum a nih chuan kan hmaah hian beisei tur ka hmù ta miah lo.

Vawiinah hian ZPM leh PM lo lam hi ka sawi ve tur niin ka hre lo. Vawiina ka sawi ve tur chu sum hmanga Mizo-te vote lei tumna ualau taka kan sawi ngam tawh chuan sum khawla inthlan dawna vote leina atana hman hi an tum ru reng tih inpuanna a ni.

Covid vanga pawisa awm lo leh hnathawh theih loh thu sawituten bawkin sum hmanga 2023 election campaign kalpui an tum hi a nâ a ni. Min tina bertu chu an sum sawi rik hi mipui sum (government/ public money) a ni a, mipui pawisa hmanga party pakhatin campaign an tum ta mai hi he thusawiah hian a lang chiang viau a ni.

- J Vanlalsanga