Sorkar kan ngaichang e...

Kar khat zet stage 2 (local transmission) ah kan awm ta a, inkaichhawng hmuhchhuah belh zel an ni a. Pathian khawngaihna avangin na tak leh thihpui em an la awm lo a, kan vannei hle a ni.

Kar khat chhung hian a darh huk lohna tura hmalakna lian tham a awm miah lo hi nakinah kan inchhir a hlauhawm. Kan ṭhenawm state ṭhenkhat hi an mangangin an buai tawh khawp mai, an chan ang hi kan chan a ni  ve mai ang tih a hlauhawm mang e. 

Ruahmanna fel tak a awm a, theihtawp chhuaha sorkar leh mipui kan ṭanrual chuan vantlanga hripui leng (community transmission) tur a ven theih. 

Sorkar chak tak, rua­hmanna fel tak nena hma la zung zung, mipui nena thawkho thiam apiang he hri donaah hian an hlawhtling. 

Kan sorkar hi Covid-19 chungchanga ka duhkhawp lohna ber chu a che muangin a vuaicha thei lutuk hi a ni.

A hnuah chiai leh phili deuhin a che chung chung tho ṭhin si a. Mipui vantlang hriselna lama mithiamte leh hripui chungchang zirna lama mithiamte rawn chunga hmalak a hun khawp mai. 

Tunah pawh hian cabinet or council of minister in kan dinhmun hi an thlir a, an zir chian a hun khawp mai. A darh tak tak a, ṭawngthu chhe loah vanduaite an awm palh hlauh chuan hun ṭha an bawhpelh vangah mipuiin an puh ngei ang. 

Tunhnai maiah pawh ram pawn aṭanga lo haw ni lo tualchhung mi hri kai Aizawlah an awm nual ta, Vairengte, Darlawn lamah te pawh. 

Anni hi hri kai thei dinhmuna ding an nih avanga test an ni a, anni bak hian an lo kai nual tawh thei tlat. 

1 total lockdown/ mipui che vel khuahkhirh 

2 contact tracing chak tawka neih

3 boundary vil ṭhat

4 a tam thei ang ber test

5 hri vei/ hri kai enkawlna ṭha buatsaih

Heng hi a darh zel tur venna atana hmanraw hlawh­tling ber chu a ni mai em. Hetianga ti thei ram apiang hi he hri donaah hian an hlawhtling.