Political barter system

Tunlaia ka rilrua thil lang ve deuh tlat reng mai chu 'Political Barter System' tih a ni. Hei hi midangin an hman pawh ka la hre ngai lo. Mizoram Politics khawvelah hian inthleng kual tawn theih ni ngai se thil hi a ṭhat zawk rinna ka nei lian khawp mai.

Congress party President Pu Lalsawta hi kei chuan Chief Minister atana ka awh ber a ni. Mi thiam a ni a, chu aia ka dah san chu mi dik a nihna hi a ni. Nimahsela a awmna Congress hi an tling dâwn lo mai ni lovin MLA nei lo thei dinhmunah an ding mêk a ni. Chuti chu Pu Sawta hi. Chief Minister theih dan awm chhun chu ZPM lama a luh mai hi a ni.

MNF chu a chhuahsan tawh a nih avangin a chhuahsan tawh hnu party ah chuan a lut duh tawh lovang. Congress party-ah hian President ni si lo thuneitu ni si a awm an ti bawk. Congress Elected OB zingah hian thu a inhmu lo ṭhin tih a ni leh bawk.

ZPM hi Lunglei boruak leh Social Media mar kan deh chuan tuna hmahruaitu an ni. Boruak hi tlin theihna chu ni se a tling tur an ni. Nimahsela boruak chu boruak mai mai a nih chuan beiseina sang tak nei an tla thei a ni. Hei vang hian ZPM hian MNF MLA ṭha hi lakluh dan zawng se, MNF MLA zingah mi thiam leh fel em em, sorkara theihna nei miah lo te hi lalut se. MNF hian mithiam an kawl ṭawl a, Chief Minister leh Minister in Chief lo zawng hi chuan pawisa bâng an rut ve phak chauh a ni si.

Tichuan MNF hian tun inthlanah hian tlin nawn an duh a nih chuan tlutlukna huaisen tak an siam ngam a ngai ta a ni. Han en vang vang hian chu thutlukna pawi­mawh tak mai chu an siam ngam dâwn miah si lo.

An hotu lian leh mipui nin zual Minister pahnih khat hi chawlhtir se an ṭha a ni mai. MNF hian a lu nunga chhiar chuan MLA tlak mithiam an ngah ber. Party mi leh sâ pawh an la ngah berin a rinawm.

Mahse tun boruakah chuan MNF hrim hrim hi Zoram mipuiin an chhang kham tawh tlat si a ni. MNF tán tlin theihna tur chuan an palian nia lang pathum vêl hi mi party ah pe daih se a fel dâwn a ni.

Inthlan kum hi chu a nuam ṭhin a, kum 2023 hi kum dang zawng aiin politics boruak a ri chhuak hma a ni.

- Malsawmtluanga