Ka nu leh pain vote an thlak ngam lovang

August 27 hian Mizoramah Village Council leh Local Council member tur thlan a ni dawn a, he huna inkaihhruaina Mizoram sorkar Disaster Management & Rehabilitation Department-in July 31, 2020-a a tihchhuah 'ORDER' tiha Lalnunmawia Chuaungo, Chief Secretary, Mizoram & Chairman, State Executive Committee, Mizoram State Disaster Management Authority-in hming a ziah hnanah chuan kum 65 chung lam chu inkhung turin an rawn ti si a, ka nu leh pa hi chuan vote an thlak ve kher ka ring lo.

Ka nu leh pate hian kum 70 an chuang tawh a, sorkar thuchhuah hi kan en chuan, "D. Mipui vantlang tana inkhuahkhirhna hriatturte," an tih hnuah khan Point No. 3-ah chuan, "Loh theih loh thil a nih loh chuan, kum 65 chin chunglam te, taksa hriselna lama harsatna neisa te, nau paite leh naupang kum 10 hnuai lamte chu mahni in chhungah inkharkhip tur a ni." tih a inziak a ni. Mahni in chhunga inkharkhip turin sorkar chuan Chief Secretary hming ziak hnan meuhvin July 31 khan 'Order' a tichhuak a, he Order hi August 31 thleng hman tur a nih bawk avangin sorkar thu zawm hian ka nu leh pa hi chuan Vote an thlak ve ka ring lo.

Kan sorkar thuneitute hian lo en chiang se ka duh chu Chief Secretary meuh hmingin thuchhuah an siam hi 'Ngenna' tih a ni lova, 'Order' tih a ni a, a inziak hi kan chhiar chuan, "No.B.13021/101/2020-DMR/Pt-III - 01.08.2020 LEH 31.08.2020 INKARA MIZORAM CHHUNGA INKAIHHRUAINA KALPUI DAN TUR THUPEK" tih a ni a, thupek reng reng chu zawm tur a ni a, hri leng avanga zawm tur thupek an chhuah laiin chu sorkar hnuah vek chuan inthlan buaipuitute hian August 27-ah inthlang tur an ni a, hei hi eng vang nge ni ang le?

Thiamna lamah mi sang kan nih loh avangin sorkar dan hi kan hre vak lova, mi thiamte ziak hrang hrang social media lama mi ka han hmuh ve theih chinah chuan Village Council term hi thla 18 pawh sei theih a ni an ti a ni. Thla 19 chu kum khat leh a chenve aia sei a ni tihna a ni a, hemi dan tlawh chhan hian kum khat leh a chanve dawn dawn VC term pawh seite pawh hi a lo awm tawh a ni an ti. Tuna mi bik hi chu Mizoram huam bik pawh ni lova khawvel pum daiha hripui Covid-19 a len avangin inthlan hi a hun sawn hlat leh theih a ni dawn lovem ni le?

WhatsApp group pakhata a inziah dan chuan, "August 15-ah Independence Day lawmin Minister te an feh chhuak ang a, Mizoram kil tinah sorkar hnathawh a ṭha lai an sawi ang a, Model Code of Conduct-in a phuar tawh chhung ni siin August 15-ah hi chuan National Day a nih vangin Minister-te hian thu an la sawi thei a, sorkar an fak dawn a. August 27-ah inthlan a nih nghal thut chuan inhnaih takah sorkar official function ni si chhungah khan campagn-na remchang ṭha tak an nei dawn a ni. Opposition lamin Assembly House lamah sorkar beihna an au chhuahpui ve hun tur chu Assembly Session lo awm leh turah a ni a, Independence Day zawh tawh si, Assembly Session hma sia inthlan hi Ruling Party duhthusam a ni," an ti teh mauh mai.

Veng thilte avang hian VC inthlan hi a hmanhmawhthlak em em niin an sawi a, mahse a lehlam zawnga kan thlir dawn chuan Mizorama hripui kui ṭiahna turin VC inthlan hi huaihawt theih a ni tlat a, sorkar hian mawh a phur ngam dawn em ni le? Inthlan tur a rik aṭangin party lam chu an inhmukhawm reng tawh a, Aizawl District chhungah DC-in mi panga aia tam awmkhawm khapna thupek a chhuahte chu vut laka vawih ang a ni a, khaw tin leh veng tinah a tuk zanin mi panga aia tam an pung khawm ṭhin a ni. 

Inthlan campaign hi an ṭan tawh a, khaw ṭhenkhatah chuan uite talhin chaw an eikhawmte an ti leh ṭan der tawh a, House to House Campaign an kalpui mup mup tawh bawk a, Covid-19 an hre chang tawh lo an tih chu maw le. Inthlan puan hi sorkar thuneihna ni lovin Election Commission lam thuneihna a ni daih zawk an ti a, mahse hetia mi mawl ngaihdan ve mai maiah chuan sorkar hi chuan Election Commission hnenah hian ziakin ngenna siam se, "Mizoramah Covid-19 a darh a hlauhawm avangin VC leh LC inthlan hi sawn hlat ni se," tiin ziak se chu State Election Commission hian a sawn hla em em ang. Ka hriat sual loh chuan Congress leh BJP khan inthlan sawn hlat hi an lo dil tawh hrim hrim bawk a, Congress leh BJP hi inhal leh inhmelma an ni a, an ni pahnih an inthurual chuan chhan ṭha tak a awm a nih hmel a, inthlan hi chu kalpui lui lo se a ṭha khawp mai.

July 31-a sorkar thuchhuahah khan, "District headquarters-ah te chuan phalna nei lova vantlang hmuna mi panga (5) aia tam awmkhawm khap a ni. District Magistrate-ten Section 144 CrPC tlawhchhanin thupek an chhuah ang," tih kha a inziak a, "School, college, educational leh coaching institution te chu khar chhunzawm an ni ang," an la ti bawk a, kan Biak Inte pawh kan la khar ṭhup laia 'VC hi kan thlan thuai thuai loh chuan Supreme Court in min hrem ang' tih pawh ni lova kan puten hmanhmawh taka hripui kara VC min thlan tuir an tum dan hi chuan ngaih a ti ṭha lova ni.

He inthlan lo awm tur hi chu ruling party hian Election Commission-ah rawtna han thlen ve duh se chu (Congress leh BJP-in an thlen tawh an ti a) Election Commission pawh hian a sawn hla ve mai awm si a, Political party zawng zawng hian Election Commission-ah rawtna thlen se, ram inrelbawlna thil pawimawh a ni a, sorkar dan vekin kum 65 chung lamte phei chu 'Loh theih loh' a nih loh chuan mahni ina inkhung turin 'ORDER' an pek lai a ni bawk si a, August 27-a inthlan tur hi chu sawn mai rawh se. 

Ka nu leh pa hi chu an kumin a zir loh avangin vote an thlak ve kher lovang, Polling Station-ah mipui an zi hut hut dawn a, a chhehvel boruak zawng zawngte nen, electoral roll hming zawnna tura a bula kal khawm te, kutzungṭanga chhinchhiahtir pawh hi thil risky tak a nih hmel a, mi za tel kha mi pakhatin min hnawihsak chuan hri kai pakhat awm se, a darh theih leh theih loh mi thiamte khan rawn sawi fiah tel bawk se, tuna inthlan rum rum loh hian kan boruak ziaawm deuh hun te pawh lo nghak ve mai se a ṭhat zawk a rinawm a ni.