Ngaih ṭhatlohna Kuhva pawisa
Kum hnih kum thum chhung Mizorama titi lian ber pawl ni reng ṭhin chu kuhva smuggling kha a ni. Kuhva smuggling chu Assembly House lamah a titawp theitute chuan 'Mit kan siai' an ti ta hlauh mai a, kawngpui zawng zawng rap chhe khawp motor lianin ualau takin chhun engah an han smuggling ta riap riap mai a. Tlai khaw hnuah Kuhva Check Gate an han siam leh hnuhnawh a, Kuhva hlawkna kha tunge tel ang?
Check Gate awm lo ang maia an paltlang theih lai khan pawisa tuak an awm thei em? Chu pawisa chu kum 2023 kum tawp inthlan dawna hman ṭangkaina a awm ang em?
Mizoram zim te ah pawh hian zawhna zawh pawh kan ṭi deuh duk tawh ang tih hlauhawm khawp hian kan ral muang lo ru tlat tawh a ni. Social security a ṭha tawk loa hriatna kan nei a, kuhva pawisa han sawi pawh hian kha leh chen man theih loh, check ve bawk sia man theih miah loh kha tun hnaia an man thei lem ta em em a.
MLA Election boruak awm ṭan nikum chawhnu lam aṭanga kuhva kan man ta chat chat mai pawh hi ngaihtuah peihte tan ni ta se. A hma zawng khan eng vanga man thei lo nge kan nih a? Tun hnuah eng vanga man thei ta thut nge maw kan nih le? tih pawh hi kan ngaihtuah ngam a ngai bawk lo maw?
Kuhva kuhva kan tih lai hian a letling zawngin Leiṭha (Fertilizer) smuggling hi lian takin a kal mup mup reng tho a, hei pawh hi ngaihtuah tham a ni mang e.
Champhai District chhunga an phurh luh pawh hian Champhai Registration 04 motor ah an hlang leh kher a, kuhva smuggling vanglaia an lei motor lian tlanna tur hmù lo khan Mizoram District dang registration leh state pawn registration motor aṭangin lei ṭha smuggling hi an phur chhawng mup mup tih te pawh ennawn a ṭha lo maw?
Bialtu nei lo ang maiin MLA te chu an ngawi ṭhap a. Champhai Voters zingah smuggling lama hausa leh chu lama inhnamhnawih an tam tih an hre chiang si a. MNF chang ni lo Congress leh ZPM pawh an ngawi a, smuggling dem ngam an awm lo a nih hi.
Kuhva smuggling pawisa sawi chhuak ngam an awm lo an tih pawh hi chhui chian tham a ni.
- RK Lalmanga, Ralte Cottage