Mizo ṭhalai an beidawng em ni?

Mizoram Uni­versity buatsaiha Political Party hrang hrang aiawhte an kawmnaah MNF aiawha thusawitu chuan Mizoram mipui leh ṭhalaite tih beidawn a, chu beidawnna chu politics lama hamṭhatna atana hman tum an awm thu a sawi mauh mai a. He thu ka hriat rual rual hian ka law chhunga naute a che dawt mai a, sawi zui ve hlek a ṭul a ni.

Tun dinhmuna kan Zoram politics awm dan te han thlir hian rin phak bakin MNF party ah hian rinna kan nei tawh lo emaw tih mai turin mipui kan baihvai a. Ram dang leh state ṭha zawkte hruaitu neih ang hruaitu ṭha neih ve kan duh thu te hi kan sawi chamchi a ni.

Hetiang din­hmuna Zoram a din mek lai hian Lunglei Municipal Council thar lo awm tura inthlannaah sorkar lai dinhmun a chhe em em mai bawk nen, kan ṭhalaite aiin MNF party dinhmun hi a derthawngin a lang a, rilru in ar bo an zawng ni berin ka hria. Tlem ka han sawi zawm ang e.

1. Midangte bei­dawng tura infuih hi thil theih loh a nih em loh pawhin thil la thleng ngai lo a ni. Mi pangngai tak chu mi thusawi avangin a beidawng ringawt lo ang. Mipui leh ṭhalai ang zawng phei chuan a huhoa fuih beidawn tum chu thil thleng thei lo hulhual a ni.

2. Beidawng an awm a nih chuan Sorkar kalphunga beidawng an ni zawk ang. Sorkara an beidawng a nih chuan sorkarna changtu thiam loh a ni tihna a ni. Ṭhalaiten kan ram dinhmun leh in kaihhruai dan te an en a, an beidawng a nih chuan a mawh­phurhna latu tur chu kan ram enkawl tawhtute an ni.

3. Ruling Party zawkin a ruling lo lamte beih teh daih hi a beidawng aw ka tawh zawk a, chuvangin ṭhalaite tihbeidawn tum an awm anga puhtu lam hian kan ṭhalaite hi an lo tibeidawng tawh zawk niin a lang. Hei hi alawm ram hruaitu ṭha kan mamawh chhan chu.

4. Mizoramah ṭhalai beidawng an tam chuan Oppo­sition Party vang a ni ngai lo ang. Ram an thlira an beidawng a nih chuan ram enkawltute vang tihna a ni.

5. Mipui hi bei­dawn zirtir theih an ni lo. Mipui hi fuih beidawn theih an ni lo. An bei a dawng a nih chuan chhan a awm a, chu chu Opposition party te vang a ni thei ngai lo bawk. Beidawng tawh zawkin mi an hmù beidawng a, chu chu tute emaw fuih beidawn anga an hmù a nih ngat phei chuan a bei­dawn thlak chu a ni Ramlian!

- Samuel Rohlupuia