Ruihhlo leh Aizawl
Tuk khat chu zing dar 5 rik hma in chhungkaw thilah ka pa nen kan chhuak dun a. Remchang ang reng deuhin Aizawl khawpuia ruihhlo ngawlvei chettlatna ṭhin te fangin ring kan fan iak iak a.
Hmel pawr fap, mit khur thuk tak leh khamkhawp ei in hmu lo tih hriat fahrante hi an lo awm khawm laih a. Pawisa neih hmel zawk ka pa kha, "a box in em ni i duh?" an rawn ti a - kan ka hau!
Muthlu ngaih ngaih te, hmanhmawh taka damdawi la sawk sawk - liam leh thuai mi pangai hmel fai vang te, hmun biru deuh laia riak ta mai mai leh rilṭam hmel deuh deuh ka ṭhalaipui, Mizo vâl ruihhlo bawiha tang an va tam e aw - damdawi a tam hle tih lah a hriat!
"Zing tin hetah hian ka kal ṭhin" tih te, "ka u nen in kan luah dun a, kohhran lawina a inang lo va, ka out - thirchhia ka hralh ṭhin" tih te. "Tunlai chu kan riahna ṭhinah mi pali/ nga bak kan awm ngai lo" tih te a ni kan ngaihthlak!
Aizawl Bridge hnuai ka'n bih leh dek dek a, mihring riahna ṭhin hnuhma a awm... Chanchinbu hlui in phah hnum hlarh te chu hmuh loh har tak a ni! An riahna aṭangin ruihhlo ngai ṭhalai an rawn chhuak khawm zel a, mit ek nuai nawk nawk pahin tlangval pakhat hian Rs 30 a rawn hum ṭat a. Inthlahrung takin hnam dang dawrah a ram neitu zawk Mizo valin awki tham ṭiakin ei tur a lam - lainatawm tak a ni!
Kan ramah heti em ema ruihhlo a hluar leh kan ṭhalaiten an tuar ta lutuk te, chanchinthar lama ruang chhar a awm tuk tin ta mai te leh hausa thut te hi mitthlaah an awm vang vang e!
Kan khawpui hi chhan a ngai tak zet a ni. Zuk leh hmuam sim harsa ti tak tak te hian thisena ruihhlo chiu luh sim har dan tur chhut chungin, ruihhlo do kawngah sum leh pai mai bakah thapui thawha chet a hun. Kan unaute an thal hnem ta lua e!
- Tpa Bunghai