VAI MISTIRI VS MIZO MISTIRI

Hnam inpumkhatna (National integration) tichhe zawng emaw chi inlakbingna tichhuak zawng ni si lova Mizo hnam damna hi kan ngaih pawimawh a hun takzet ta e. Mizo hnam dam khaw chhuahna tura pawimawh tak kan intodelh theih si, hnamdangin min chan khalh tlat hi tharum tel lova kan pumbilh theih dan kawng hawi zawnga inzirtir a hun.

Mistiri awmzia chu?

Mistiri kan tih hi Gujarati thumal 'Mistri emaw Mistry' aṭanga lo lãr chho niin, anniho hian Portuguese thumal 'Mestre' tih aṭanga an lak chhãwn veleh a ni. Sapṭawng chuan 'Master/ teacher emaw 'Supervisor' tih a ni thei awm e. Mizoṭawng chuan 'Hotu, zirtirtu, endiktu, enkawltu emaw kut hnathawh peng hrang hranga thiam nãl tak, kawng hmang hria, mite zirtir chhawng zel thei khawpa hre bel, mahnia hma la thei' ti ila a dik zaw ber mai awm e.

Hetih lai hian vai misiri tam tak finfiah lem lova Mizoramin kan lo pãk huam huam te hi a tam zawk chu misitiri puitling zuia thla hnih khat vel helper-a ṭang, mistiri bungrua nen thawk chhuaka inti-mistiri chawp mai mai an tam. Mizo mistiri erawh Synod Social Front (SSF) leh Central YMA hmalaknaa uluk taka trained chhuahtirte an ni. Chuvangin, vai cement mistiri nazawng hi ngaih ṭha taka lo chhawr chi a ni lem lo.

Tunge thiam zawk?

Cement mistiri puitling thiam nãl tawh chinah chuan Mizo Cement mistiri-te hi an thiamna (skill) a ṭha zawk. Mitthlaa suangtuahna (idea) an nei ṭha a, an rilru a chakin an fing (intelligent) zawk a, chakna leh theihna (ability/ potential) an ngah zawk. An tling/ tlãk (efficient) zawk a, mahni inrintãwkna (confidence) an ngah zawk a, hmalam hun thlir lãwkna (vision) pawh an nei ṭha zawk tlangpui. Mahse, vai mistiriri angin tawrh theihna leh dawhtheihna (tolerance/ patience) an nei tlem a, thunun kawngah an awlsam (flexible) tãwk lo bawk. Hun vawn dik (punctuality) kawngah inpalzut an ching deuh zawk bawk niin a lang. Hei bakah hian ei leh in chhia hi an tei thei lo zual bawk.

Pumbilh dan tur

Kan CM hlui zahawm tak Pu Lalthanhawla khan kan rama Karimganj tlangval tam lutuk tharum thawh si lova tihtlem dan tur a sawi fo chu Cement mistiri tur Mizo tlangval kan chher chhuah tam hi niin a sawi ṭhin.

Thing mistiri (Carpenter) lam chu Pathian zarah kan intodelh a, Mizo cement mistiri erawh kan la tlem hle. Central YMA leh Synod Social front-te ṭhahnemngaihnain a thlawnin Mizo tlangval eng­emaw zah chu cement mistiri chherchhuah an ni tawh a, mahse an la tam tawk loh avangin Karimganj tlangval an la tam belh zel niin a ngaih theih.

Chuvangin, vai cement mistiri luahlan thei khawpin Mizo Cement mistiri chher chhuah vat theih ni se, Mizo cement mistiri thawk mek tawhte pawh hian vaiho ang bawkin thlarau rah dawhtheihna (Gal. 5:22) neiin vaiho an la phaklohna lai la awm kan han tarlan takte khi vaiho aia ṭha zawka ti thei turin tihtakzetin ṭan la thar se.

In satute pawhin mahni Mizo lo chu chhawr lo ngam ta ila, ṭhat zawng (quality) inang rau rauah mahni Mizopui chu kan chhawr duh vek zawk ang. Chutianga ram leh hnam rilru pua chhawrtute leh thawktute kan inthurual ṭhap a, cement mistiri ten thawh tur an neih miau loh chuan tharuma ūm haw ngai lovin anmahni chēnna hmun lamah an haw zeuh zeuh ang a. An kuta Mizopain mawhphurhna tam tak kan dah mek hi kan pumbilh thei mai dawn a ni.

Engpawhnise, thiam dan inchenah Mizo tlangval chuan rem a hre zawk a, a thawk chakin a taima zawk a, mahse, kal hma leh haw tlai lamah dawh theihna an nei tlem a, thunun an har duh zawk tlangpui bawk niin a lang.

Karimgangj tlangval chuan sum a hmuhna tur a nih phawt chuan eng anga vin leh ankhum pawh hrehawm tiru hle ṭhin mah se ngawi rengin dawhthei takin a tuar chhuak ṭhin.

Mizo tlangvalte hi thunun awl (flexible) ve phei ila chuan in sa apiang hian kan ruai duh vek zawkin a rinawm. Mizo Cement Mistiri zir chhuak tam takin chhawr zui an hlawh loh chhan ber pawh thunun an ngai thei lo hi a ni thei.

Thil pawimawh dang leh chu an nitin hlawh in tam hleih hi a ni. Hausak dan a inchen lova, neih chuang liama a ruala in pahnih pathum sa thei an awm laiin 95% te hi chu neih chhun tak meuha In sa kan ni. Chuvangin, vai mistiri ni khat hlawh ang tho hlawh hian thunun nuam taima bawk siin thawk thei ve se'ng chuan mahni Mizopui chhawr kan tam tial tial ang a, a tawpah chuan Mizo tlangval hlirin Mizoramah concrete building ropui leh nalh tak tak an sa ngaw khup tawh mai dawn a lo ni.

Mizo tlangval hlir Cement Mistiri & Helper kan hman/ chhawr theih hunah chuan vai mistiri-in thawh tur a hmu tawh lovang a, tharum thawh ngai lovin Karimganj lamah leh state dangah ei zawng turin an kal bo diak tawh ang. Tichuan, Vai mistiri vs Mizo mistiri' tih chhanna chu "Mizo tlangvalin hnehna a chang ta" tih a ni tawh ang.

- Dr. C. Lalrampana