Tute nge kan nih?

Mizote tute nge kan nih han tih ngawt mai chu, mi chi hrang hrang kan nih bakah hnam peng hrang hrang kan awm a, sawi thiam a har mai thei. Mihring pangai angah hi chuan kan ṭha viau emaw kan intih lai hian mite chuan min lo hmu ru kar thei a, ṭha lo viau emaw kan intih lai vek hian mite chuan min lo fak ve viau thei bawk. A hnam ang pawh hian hmuh dan leh sawi dan hrang hrang a tam thei ang.

Tun hma kha chuan Japanese te hi hnam rinawm ber ang deuha sawi ṭhin an ni a. Sap hote hi kan lo hriat dan chuan hnam changkang, fai, taima, kan ti. Chinese ho chu kungfu thiam, tiin kan lo hmel hriat ṭhin. Burmese ho ve thung chu ram rethei, an ram hausaknate pawh an eiru zo zel, tiin kan hre ve a ni. Bangladesh ho pawh ram changkang lo tiin kan hre ṭhin a, Pakistan mite chu India hmelma angin kan hre ṭhin.

Tun hma chuan Mizote chu hnam mawl, milu la hnam, tiin min hre ṭhin. Sapho in min han awp a, missionary-te an lo lut a, min hriat dan leh pakhat chu hnam bal, tih a ni leh. Kristian kan lo nih hnu hian a, aw, b, te kan lo nei ve ta viau a ni.

Keimahni inhriat dan chuan, Mizote chu ṭhian chhan thih ngam, sa leh ral hma a zam ngai lo kan ni. India Independent hnu, District Council kan nih hnu aṭang khan politics-te pawh kan lo hmel hriat ve ṭan a. Loneih kha kan eizawnna bul ber a ni ṭhin a, mahse, ration buhfai a lo awm chinah chuan kan lo innghat ta zawk a ni.

Hnam tenau tribal kan ni a, hnam dangin min han chim ve tak tak chinah chuan Mizote pawn an tih dan te la in, a ṭhen laiah kan ṭhat phah a, hlawk pui lem lohna te pawh kan nei nual. Tribal chu kan la ni reng a, mahse, milu la hnam chu min ti tawh lo. Mi min hriat dan pakhat chu Kristian ram tih a ni ta. Min hriat dan pakhat leh chu ziak leh chhiar thiam tamna ram tih a ni ve tawh.

Kristian ram min tih rual hian - cancer tamna, AIDS vei tamna, fahrah tamna tih te kan ni leh a. Zuk leh hmuam uar ber pawl kan ni bawk. Vaiho min hriat dan pakhat leh chu intodelh lo, chawmhlawm state, tih a ni. Keimahni han in en hi chuan lehkhathiam state, kan in leh lo, engkim mai hi tunlai ber ber hlir a ni. Chuvang chuan, mi changkang/ ram changkang ni awm tak kan ni.

Sawrkar pawh a hausak hmel viau a, mahse a hausa lo, a hnathawk te hlawh pek tur neih loh chang a nei ta fo mai. Mipuite pawh chuti deuh mai mai chu kan ni, pawisa emaw a thlawn/ awlsam taka kan hmuh theihna tur a nih chuan khua kan hmu thui vak ngai lo. Pawn langah chuan thil ṭha duh kan inti a, mahse kan ho ru riau thung.

Mizote kan tan a ngai, min engtin nge min hria se kan duh ber ang aw? Thatchhia, rethei, tih te chu kan duh der si lo ang a. Hnam rinawm, taima, hrisel, intodelh tih te chu min hriat dan ni thei zawk se duhthusam a ni, mahse, a ni ngawt thei si lo.

Hnam rinawm leh zah­awm ni turin a bul aṭanga kan ṭan a ngai a, cheng khatah kan rinawm phawt a ngai. Kan Kristianaah ka chian a ngai a, Pathian thu kan awih a ngai.

Kan politics khelh dan te pawh hi in enlet a va ṭha em. Hnam taima ni turin inchhungkhur aṭanga kan ṭan ṭhat a ngai. Kan ei leh in tur te pawh thianghlim leh hrisel kan thlan thiam a pawimawh a. Sum tam tak aiin hmingṭhat thlang ngam ṭheuh ila, tichuan, Pathian thuawih kan lo ni ang a, kan ram a lo nuam sawt ang a, central politician lo kalte pawhin zahlo takin min sawi ngam tawh lo ang.

Hmingṭha tur leh zahawm tur chuan kan thawhrim ve a ngai, a bul aṭanga kan ṭan ṭhat a ngai a, dawt te pawh kan sawi loh a ngai. Zuk leh hmuam lakah te pawh kan inthiarfihlim deuh deuh a ngai.

Kan awmna hmun ṭheuh aṭangin ngaihtuahna seng ila kan hotupa ber aṭanga ṭanpui mipuite pawh in siam ṭha ngam teh ang u. Sawrkar ṭha leh ṭha lo hian kawngro a su thui viau bawk a nia. I duhthlanna hmang fimkhur ang che.

Mizote hi tute nge kan nih le?

- Lalchhandama Colney